Microsoft Word kr dunyoning ishlari ziyouz com doc

www.ziyouz.com кутубхонаси 
71
қайнсингилларига сало-о-ом! 
Ҳаким аканинг укаси йўқ, учта синглиси бор эди. Учовлари иккита-иккитадан пиёла кўтариб 
қаторлашиб боришди. Бирига атир, бирига сочиқ, энг кичкина Саидага рўмолча тегди... 
Отин хола келиннинг рўмолини ўнглаб қўйди-да, тағин янги куч билан ҳайқирди: 
— Ассалому алайкум, келин сало-о-ом! Оёғи олти, қўли етти бўлиб хизмат қилган, келиннинг 
қўлидан ишини оладиган, оғзига ошини соладиган ён қўшни-жон қўшниларга сало-о-о-ом! 
Ойим шу ерда эканини энди пайқадим. У одамлар орасидан ранги ўчиброқ ўтди-да, қандайдир, 
ишончсиз қадамлар билан келин томонга юра бошлади. Ҳатто остона олдига борганда бир 
қалқиб кетгандек бўлди. Қўлида ҳеч нима йўқ эди. Бироқ секин-секин зинадан кўтарилди-ю, 
келиннинг юзидаги пардани қия очди. Ҳовлидаги хотинлар пичир-пичирга тушиб қолишди. 
— Нима қиляптилар? 
— Вой, ўлмасам! 
Отин холанинг ҳам ғаши келди шекилли, дашном берди: 
— Номаҳрамлар бор-а, пошша! 
— Тўхтанг, — деди ойим негадир овози титраб. Шоша-пиша келиннинг қулоғидаги зиракларни 
еча бошлади. 
— Ушланг буни! — деди сирғаларни келиннинг қўлига тутқазиб. Кейин ўзининг нимчасига қўл 
солдию каттакон олтин ойбалдоғини чиқарди. Қўллари титраганча иккаласини келиннинг икки 
қулоғига тақди. 
— Ният қилгандим, — деди ойим отин холага қараб.— Шуни ният қилиб қўювдим. — Шундай 
дедию секин эгилиб, келиннинг пешонасидан ўпди. 
— Илоё қўша қаринглар! 
Ойбалдоқ шол рўмол тагидан ҳам ярақлаб кўриниб турар, келиннинг ҳуснига ҳусн қўшиб 
юборгандек эди. Чекка-чеккадаги хотинларнинг ҳайратли хитоби эшитилди: 
— Вуй-й-й-й! 
— Асл тилламикан? 
— Нима, қалбакисини қилиб эсини ебдими? 
— Мана бундоқ қўшнилар бўлади жаҳонда! 
Бир зум гангиб қолган отин хола овози борича ҳайқирди: 
— Қиличдек ўғилларни ўстирган, тўйда елиб-югурган, ой деса, ойдек, Хотам Тойдек пошша 
опасига сало-о-м! 
Ойим одамлар орасидан туртиниб ўтди-да, чеккага чиқди. Шундагина келин томонга ўгирилиб, 
мамнун жилмайди... Унинг кўзида ёш бор эди.