Microsoft Word kr dunyoning ishlari ziyouz com doc

www.ziyouz.com кутубхонаси 
69
нари кетди. Дарвоза олдига борганида орқасига қайрилиб қаради. — Яхшиси бўйнингизга 
олинг, бўлмаса, қиёматда азобини тортасиз! 
Зум ўтмай аммам билан отин хола чиқиб кетишди. Сепкилли хола ҳамон пиқиллаб йиғлар, 
ойим супа олдида бошини хам қилганча мунғайиб турар эди. 
— Илоё туҳмат қилган туҳмат балосига учрасин!— деди Сепкилли хола йиғлаб. — Илоё ниятига 
етмасин! 
— Қўйинг, овсинжон. — Ойимнинг ўзи ҳам йиғлаб юборай деб турарди. — Худоё ўша бир пой 
зирак ўлсин! Кўнглингизга олманг, жон овсинжон! 
— Туҳмат балосига учрамаса, розимасман! — Сепкилли хола шундай дедию йиғлаганча уйига 
кириб кетди. 
Ойим бир зум супа олдида турди-турди-да, бирдан менга ўшқирди: 
— Нимага серрайиб турибсан? Йўқол кўзимдан, жувонмарг! 
Ёмон бўлди. Ўша кундан бошлаб Сепкилли хола ойим билан юзкўрмас бўлиб кетди. Аммо энг 
ёмони яна икки ойча ўтгач, салқин тушган кунлардан бирида бўлди. 
Ўша куни мактабдан қайтсам, ойим сандиқ устига мук тушиб ўтирибди. Иссиқ кийимларни 
сандиқдан олган шекилли, уй ичини куя дорининг ҳиди тутиб кетган, бумази кўйлаклар, 
чопонлар, қулоқчинининг ипи узилган телпаклар ер билан битта бўлиб ётибди. Йиғлайвериб, 
ойимнинг кўзлари шишиб кетган. Дадам урган бўлса керак, деб қўрқиб кетдим. Секин олдига 
келдим. У бўлса қайрилиб қарамади. Қўлидан ушлаган эдим, ойим илон чаққандек қўлини 
тортиб олди. 
— Сен болани ер ютса бўлмасмиди! — деди ғазабдан кўзи ёниб. — Шу кунингдан кўра ўлиб қўя 
қолсанг бўлмасмиди, ер юткур! 
Ойим ҳеч қачон бунақа қарғамагани учунми, йиғлаб юборай дедим. 
Аммо шунча ёмон гапни тўсатдан эшитганимга карахт бўлиб қолган эдим. 
— Ўшанда нега унақа дединг, бўйгинанг лаҳатда чиригур! — деди у яна дағдаға билан. 
— Қачон? Нима дедим? 
— Фолбинникида, гўрсўхта, фолбинникида! — Ойим овози борича чинқирди. — Нега Сепкилли 
холамни кўрдим, дединг? 
— Нима қилай? — дедим аламдан чийиллаб. — Кўзимга кўринганини айтдим-да! 
— Мана-ку, кўзгинанг тешилгур, мана-ку! — Ойим кафтидаги алланимани ерга улоқтирди. 
Олтин балдоқ ерга тушиб жиринглаб сакраб кетди. 
— Тўркўйлагимга илиниб қолган экан-ку! Йўқот, кўзимдан йўқот! Бир бегуноҳга туҳмат 
қилгандан кўра ўлганим яхшимасми! — У бирдан мени қучоқлаб, юзимни юзига босганча 
ҳиқиллаб қолди. — Энди нима қиламиз, жон болам! 
Ойимнинг кўз ёши бирпасда юзимни жиққа сув қилиб юборди. 
— Нима қиламиз, ўғлим! Бу шармандаликка қандоқ чидайман, ўғилжоним! — Ойим мадори 
қуригандек, сандиқ устига мук тушиб қолди. 
Орадан кўп ўтмай тўй бўлди. Сепкилли хола ойимни тўйга айтмади. Бироқ ойим бир тоғора 
қуштили пиширди. Ҳеч нима бўлмагандек, тўйхонага чиқдию елиб-югуриб хизмат қилиб 
кетаверди. 
Кечқурун ҳовлининг ўртасида тўнка қўйиб гулхан ёқишди. Сепкилли холанинг ўзига ўхшаб 
кетадиган сарғиш юзли Ҳаким акага тўн кийгизиб, салла ўратишди, гулхан атрофини уч марта 
айлантиришди, карнай-сурнай чалинди... Уй ичида аёллар, Зеби хола дутор чертган, хотинлар 
тортишмачоқ қилган... Хўжа, Той, Вали, мен — тўртовлашиб тортишмачоқ билан овора бўлиб 
турган хотинлар орасига шўнғиймизу чўнтакни ширинликка тўлдириб чиқамиз... Кейин 
тўйхонанинг қоронғи бурчакларида роса бекинмачоқ ўйнадик. 
Ўша куни кеч ётган бўлсам ҳам жуда эрта уйғондим. Энди тонг отган экан. Қарасам, уйда ҳеч 
ким йўқ. Демак, тўйхонага чиқишган. 
Мен ҳам юзимни «мушук ювиш» қилдиму ўша ёққа чопдим. Бўлмаса-чи, ҳозир «келин салом» 

---

Дунёнинг ишлари (қисса). Ўткир Ҳошимов