Microsoft Word kr dunyoning ishlari ziyouz com doc

www.ziyouz.com кутубхонаси 
77
тағин. 
Бир қўлимда дутор, бир қўлим билан ғилдирак ғилдиратганча йўлга тушдим. Вали ҳам 
ғилдирагини айлантириб ёнма-ён борар, аммо энди аввалгидек югурмас эдик. Қулоғимда ҳамон 
Зеби холанинг қўшиғи янграб турар, гўё ғилдираклар ҳам ғилдирак эмас, дуторнинг икки тори 
эди. Ана, иккови бир-бирига жўр бўлиб жаранглаяпти. Зеби хола бўлса ҳамон қўшиқ айтяпти: 
«Жон болам, жоним болам, қайлардасан, бергил хабар...» 
Четини ўт босган ариқчадан ўтаётганда ғилдирагим сакраб кетди. Бир ҳатлаб олдинга 
талпинган эдим, ўтга сирғаниб йиқилиб тушдим. Дутор ерга урилди... қарс этди. Тамом! Куй 
ҳам, қўшиқ ҳам тинди-қолди. 
— Синди! — дедим овозим титраб. 
Вали югуриб тепамга келди: 
— Вой-й-й! Энди даданг ўлдиради! 
Иккаламиз қўлимиз титраганча ғилоф боғичини ечдик. Қарасам, дуторнинг ип тортадиган 
қулоғи синиб тушибди. 
— Энди нима қиламиз? — деди Вали кўм-кўк кўзларини жовдиратиб. 
Йиғламоқдан бери бўлиб, елкамни қисдим. 
— Юр! — Вали қўлимдан тутиб уйига бошлади. Иккаламиз уларнинг ҳовлисига кирдик. Ҳовли 
этагидаги бостирмада эски қути бор экан. Вали қутини титкилаб занглаб кетган темир топди. 
— Мана! — деди тантана билан. — Энди ҳеч ҳам синмайди! 
Дуторнинг синган қулоғи ўрнига темир тиқдикда, ими-жимида ғилофга солиб жойига илиб 
қўйдик. 
Кечқурун ойимга нима бўлганини айтиб бергандим, ранги ўчиб кетди. Лекин нима қилишни 
ойим ҳам билмасди. 
Ўша куни эмас-ку, уч кундан кейин сир очилди. Дадам ҳужрадан туриб жаҳл билан қичқириб 
қолди: 
— Дуторга ким тегди? 
Зум ўтмай дуторни кўтариб чиқди. 
— Гарангмисанлар? Қайси биринг синдирдинг? Бу нима қилиқ? — деди Вали «тузатган» 
дуторни кўрсатиб. 
Ойим айбдор қиёфада ўтирар, акаларим ҳайрон бўлиб бир-бирига қарашар эди. Ҳозир катта 
жанжал бўлишини сезиб қўрқиб кетдим. 
— Тилинг борми?! — дадам баттар тутақиб кетди. 
— Зеби опа чалувди, — деди ойим секин. — Сумалакка чиққанимизда... бир чалиб берай, 
девди... 
Қизиқ, дадам бирдан ҳовуридан тушди. 
— Майли, — деди овози пасайиб. — Зеби чалса майли. — У ҳужрага кириб кетди-да, анчадан 
кейин бир бўлак ёғоч кўтариб чиқди. Дандон сопли пичоғи билан ёғочни кеса бошлади. — 
Дуторнинг қулоғини тутдан қилмаса синаверади, — деди секин. Ёғочнинг уёқ-буёғини ўяр экан, 
уҳ тортди. — Қараб туриб Худонинг ишларига ҳам қойил қолмайман. Ота-боладан бир ойда 
«қорахат» келса-я! 
— Шуни айтинг, — деди ойим жонланиб. — Тағин ҳам одамзод чидаркан. Ҳам эридан, ҳам 
якка-ёлғиз ўғлидан жудо бўлиб ўтирибди боёқиш. — У бир зум ўйланиб турди-да, қўшиб қўйди. 
— Бечора, Валисига жуда суяниб қолган. Ишқилиб, орзу-ҳавасини шундан кўрсин... 
* * * 
Валентин тузатиб кетган машинани ҳайдаб борарканман, беихтиёр Зеби холанинг кўчасига 
бурилдим. Ана, Валентиннинг участкаси. Шифер томли уй олдида ЗИЛ турибди. Кабина 
зинасида катта-кичик уч бола оёғини ликиллатиб ўтирибди. Бири дўппи кийган, бири 

---

Дунёнинг ишлари (қисса). Ўткир Ҳошимов