Microsoft Word kr dunyoning ishlari ziyouz com doc

www.ziyouz.com кутубхонаси 
85
суриштиришни билмасдим. Мабодо онаси вафот этган бўлса нима қиламан ярасини янгилаб. У 
кўзимдаги саволни уқди. 
— Биздаям шундоқ бўлган. Уч йил илгари... — деди бир нуқтага тикилиб. — Ойим: «Ҳеч 
бўлмаса, битта болангни кўрсам, армоним йўқ», дердилар. Бир эмас, учтасини опичлаб катта 
қилдилар... Кейин яна Тошкентга келиб қолдик. Қорасувда турамиз. 
Касал бир ёқда қолиб ўзимизнинг суҳбатимизга берилиб кетдик. Асакага кўчиб боришгани, 
онаси Орифнинг врач бўлишини орзу қилгани, Ориф Андижон мединститутида ўқигани... 
Гапимиз чўзилиб кетди шекилли, ҳадеб йўталаётган соқолли киши эшикни икки марта очиб 
ичкарига маъноли мўралади. Суҳбатимиз чала қолди. Ориф ёзиб берган дори қоғозларни олиб 
чиқиб кетарканман, болалик хотиралари тағин ёдимга тушди. 
...Ўша йили қиш қаттиқ келди. Туф деса, тупук яхлайди. Дадам менга биринчи марта пийма 
олиб берди. Яхмалак ўйнашга ярамаса ҳам, яхши, иссиққина. Бироқ қор шунчалик қалин 
ёққанки, из тушмаган жойда юрсам, пиймамнинг қўнжидан бемалол кириб кетаверади. Рисолат 
опаларнинг ҳовлиси бизникидан нарида бўлгани учун деярли ҳар куни дарсдан ўқитувчим 
билан бирга қайтамиз. У калиш-маҳси кийиб олган. Йўл очиб кетаверади. Мен кетидан 
эргашаман. 
Қаҳратон тонглардан бири эди. Танчага тиқилиб ётибман. Акаларим ўқишга кетган. Мен 
пешиндан кейин бораман. Чопон кийган дадам тўрда сандалга тиқилиб ярим мудраб ўтирибди. 
Бир томонда бошига қалин рўмол ўраган ойим. Унинг ёнида самовар. Самоварнинг қорнига 
ғалати тасвирлар туширилган. Ойимнинг айтишига қараганда, булар эски замонда чиққан 
тангалар эмиш. Жўмрак остига қўйилган товоққа самовар тумшуғидан муттасил сув томади: 
чик-чак, чик-чак... Деразаларга «Қорбобо расм чизиб кетган». Ташқари кўринмайди. Ҳатто 
эшикни ҳам қиров босган. Аммо-лекин танча мазза. Одам бир ётгандан кейин тургиси 
келмайди. Сандал устидаги эски дастурхонда уч-тўрт бўлак қора нон, жийда, туршак... 
Бир маҳал ташқарида гуржи кучугимнинг акиллагани эшитилди. Дадам бир кўзини очиб ойимга 
савол назари билан қаради. Ойим энди ўрнидан тураётган эди, эшик шахт билан очилди. Уйга 
аввал аммам, кетидан совуқ ғуриллаб кирди. Аммамнинг қалин тивит рўмоли, қора бахмал 
палтоси, ҳатто киприкларигача қиров қўнган эди. Ойим илдам бориб, унинг қўлидаги катта 
тугунни олди. 
Дадам ҳам шошиб қолди. 
— Ие, ие! — деди чеҳраси ёришиб. Аммо бошқа гапиролмади. Оғзида носвой бор эди. У шоша-
пиша сандал кўрпасининг бир четини кўтарди-да, танчага тупурди. 
— Тузукмисиз, опа? — деди ўрнидан туриб. 
Аммам муздек лаблари билан пешонамдан ўпди-да, қўлини танчага тиқди. 
— Хаҳ, ўлсин-а! — деди қалтираб. — Қўлимга сўзак кириб кетди-я. 
Ойим чойни янгилаш учун дарров самоварни кўтариб чиқиб кетди. Дадам аммамнинг кўзига 
тикилиб қарадию хавотирланиб сўради: 
— Тинчликми, опа, нима бўлди? 
— Дард бўлди! Бало бўлди! Сен бу ерда танчага кетингни тиқии-иб ётгин, хўпми! Опамнинг 
аҳволи нима кечди, демагин, хўпми! 
— Нима бўлди ўзи? — деди дадам муросага чақирган оҳангда. 
Аммам тўсатдан йиғлаб юборди: 
— Не умидлар билан кутувдим бу болани! Мана, уруш битди, болам эсон-омон келди, энди 
яхши тўйлар қиламан, деган умидим бор эди. 
Дадамнинг ранги ўчди: 
— Афзалхонга бир нима бўлдими? 
Урушдан ялтироқ тугмали шинел кийиб келган, аммамнинг ўзига ўхшаш чиройли Афзалхон 
акам кўз ўнгимга келди. Қайтиб кирган ойим ҳам дадамнинг хавотирли саволини эшитиб уй 
ўртасида туриб қолди. 

---

Дунёнинг ишлари (қисса). Ўткир Ҳошимов