Microsoft Word kr dunyoning ishlari ziyouz com doc

www.ziyouz.com кутубхонаси 
59
Мен онам пулни олдириб қўйди деб қўрқиб кетдим. 
— Эчкини арқони билан бериб юборибмиз-ку! — У шундай деди-ю, қўлимдан маҳкам тутганча 
одамлар орасига шўнғиб яна орқага судраб кетди.— Ирими ёмон бўлади. Молни арқони билан 
сотиб бўлмайди. Вой, мени ер ютсин! Энди нима қилдик-а? Бизни кутиб ўтирармиди. Кетиб 
бўлди энди! — У шундай дерди-ю, одамларга урилиб, сурилиб мол бозорига шошиларди. Ана, 
яна бозорга кирдик. Энди моллар хийла камайган, бироқ одам қалин эди. Бояги «ўзимизнинг» 
жойга қайтиб келдик. Аммо энди бу ерда тойчоқ савдоси бўлаётган экан. 
— Даллол шу ернинг одами-ку. Топилар ахир, — дерди ойим меними, ўзиними юпатиб. 
Одамлар тўдасида анчагина гарангсиб юрдик. Бир маҳал... бир маҳал мўжиза кўргандек таққа 
тўхтаб қолдим. Атрофга аланг-жаланг қараётган онам қўлимдан силтади. 
— Юрсанг-чи, анқаймасдан! 
— Қорақулоқ, — дедим секин. — Ана, Қорақулоқ! Ўзимнинг эчким. 
Мен эчкимни дарров танидим. Қулоғидан танидим. Йўқ, ўзи оқ, қулоғи қора бўлгани учунмас. 
Чап қулоғининг қийшиқлиги учун. Эрталаблари эчкини соғишдан олдин ойим уни ийитиш учун 
боласини бирпас эмизиб оларди. Улоқ онасининг елинига бир ёпишгандан кейин ажратиш 
қийин бўлади. Шунда мен унинг қулоғидан ушлаб тортавераман, тортавераман. Ҳар куни 
тортаверганим учун бир қулоғи қийшайиб қолган. 
— Қани? — деди ойим аланглаб. — Қани эчки? 
— Ана! — қўлим билан ўн қадамча нарида, бир тўда одам орасида турган эчкимни кўрсатдим. 
Бояги эски чопонли киши эчкининг арқонидан ушлаб турар, телпагининг қулоқчинини куя еган 
даллол эса шляпали семиз одамга қўлини пахса қилиб бир нимани тушунтирар эди. Фақат янги 
дўппили бола кўринмасди... 
— Бу зотли мол, акам айланай! Онаси ҳар йили иккитадан туғади, — деди даллол шанғиллаб. 
— Кунига бир чирпитдан сут беради. Сути сигирникидан ҳам ёғли. Пулингиз ёнингизда кетади, 
акам айланай. 
— Жудаям осмондан келаверманг-да, сиз ҳам. — Шляпали одам норозилик билан бош чайқади. 
— Ҳеч бўлмаса олти юз денг. 
— Ўзингиз ҳам жуда жаназ1 одам экансиз-да. Қаранг, бунинг қорнида боласи бор! — Чопонли 
киши эчкининг иккала биқинига шапиллатиб қўйди. — Худо хоҳласа, айни қиш чилласида 
болаларнинг оғзи оқариб қолади, биродар! 
Аллақаёқдан бояги янги дўппили, рангсиз бола пайдо бўлди. 
— Дада, — деди чопонли кишига қўлидаги обакини кўз-кўз қилиб. — Мана, обкелдим! 
— Бизниям бошимизда ўзимизга яраша ташвиш бор, — чопонли киши болага имо қилди. — 
Ўғлим ўз қўли билан бир йил боқди эчкини. Энди шунинг қўлини ҳалоллаб қўймоқчиман, 
биродар. Тўй қилиш осонми шу замонда. 
Ойимга қарадим. Унинг оғзи ланг очилиб қолган, қалин лаблари пирпирар, кўзида ёш бор эди. 
— Вой, — деди у анчадан кейин зўрға тили калимага келиб. Қизиқ, назаримда у кулгандек 
бўлди. Йўқ, унинг йиғлаётганини кейин пайқадим. — Вой имонсизлар! Иккаласи битта одам 
экан-ку. 
— Мен холис одамман! — Даллол яна шанғиллади.— Савоб ҳам керак-да одамга. Дунёга келиб 
нима каромат кўрсатдик. Кўприк солдикми, мачит қурдикми?.. 
Ойим мадори қуригандек қўлимни қўйиб юборди. 
— Юр, ўғлим, — деди кўз ёшини енгининг учига артиб. — Есин-ичсин тўймасин, илоё 
буюрмасин! 
— Арқон-чи? — дедим секингина. 
— Керакмас. Юр, болам, — ойим қўлимдан секин тутди-да, одамлар орасидан туртиниб-
суртиниб мени етаклаб кетди.