Microsoft Word kr dunyoning ishlari ziyouz com doc

www.ziyouz.com кутубхонаси 
57
Ойим бош чайқади. 
— Унисини айтолмайман. Ёлғон гапириб нима қилдим. Аммо онаси зотли. Ҳар йили иккитадан 
туғади, серсут... 
Телпагини куя еган киши бир зум ўйланиб қолди. 
— Энди, янга, гап бундоқ, — деди тағин шанғиллаб. — Мен холис одамман, кўриб турибман, 
боядан бери туравериб, сарғайиб кетдингиз. Хўп десангиз, молингизни сотиб бераман. Аммо 
чўтални олдиндан келишиб оламиз: йигирма беш сўм! 
— Майли, бир гап бўлар, — деди ойим секин. — Барака топинг, инсофли одамга ўхшайсиз... 
Аммо ўзи зотли мол... 
— Қанча сўраяпсиз ўзи? — даллол онамнинг гапини бўлди. 
— Беш юз. 
— Нима? — даллол даҳшатли гап эшитгандек кўзини ола-кула қилди. — Беш юз сўмга говмиш 
сигир беради-ку! Ҳозир бозор арзон. Қиш келяпти, янга! Қиш келяпти! Ем ташвиши бор, пичан 
ташвиши бор... 
Онам норози қиёфада елкасини қисди. 
— Мана шу боламга пуфайка олиб бермоқчиман. Адаси беш юздан камига кўнма деганлар. 
— Гапга пасматри! — даллол худди онам гуноҳ иш қилиб қўйгандай қўлини силкитди. — 
Одамлардаям диёнат қолмапти ўзи! 
У энди бурилиб кетаётган эди, ойим ялинди: 
— Худо хайрингизни берсин, битта-яримта инсофлироқ харидор топинг. Майли, ҳақингизни 
бераман. 
Даллол қайтиб келди. Қорақулоқнинг қорнини пайпаслаб кўрди. 
— Майли, — деди тўнғиллаб. — Шошмай туринг-чи. 
Чорак соатчадан кейин у эскироқ чопон кийган киши билан мендан каттароқ болани бошлаб 
келди. Боланинг бошида яп-янги дўпписи бор эди. Дўппи унинг узунчоқ бошида ғалати 
қийшайиб турарди. Пуфайкадан ортган пулга ойим менгаям янги дўппи оберади, деган фикр 
лип этиб хаёлимдан ўтди. 
— Мана! — деди даллол шанғиллаб. — Шундан яхши харидор тополмайсиз. 
— Қанча сўрайсиз? — эски чопонли киши негадир онамга эмас, даллолга қаради. — 
Бўладиганини айтинг. 
— Бўладигани икки юз эллик сўм! — Ойимнинг ўрнига даллол жавоб берди. 
— Йўғ-е, — деди ойим чўчиб. — Ҳозир уч юзга бермадим-ку. 
— Ўзимга эмас, мана бу болага оляпман! — эски чопонли киши уф тортди. — Рангини қаранг, 
бола бечорани! Касалдан янги турган: сил! 
Ойим ҳам, мен ҳам болага тикилиб қолдик. Ҳали дўпписига қарапману ўзига қарамаган 
эканман. Бола чиндан ҳам рангсиз, катта-катта кўзлари одамга маъюс термилиб боқар эди. 
— Ёнғоқ! — деди у қўлимдаги ёнғоқларни кўриб. Овози қизларникига ўхшаган ингичка, 
илтижоли эди. 
— Бер, бер! — деди ойим шошилиб. — Ҳаммасини бер. 
Қўлимдаги ёнғоқларни ҳам, чўнтагимдагиларниям болага бердим. Нима қипти, ҳали териб 
олавераман. Кўчамизда ёнғоқдан кўпи борми? 
— Юз сўм! — эски чопонли киши даллолнинг қўлидан тутди. — Бор барака! 
— Вой, нима деяпсиз, амаки? — Ойим худди биров тортиб олаётгандек эчкининг арқонидан 
маҳкам ушлаб ўзига тортди. — Бу зотли мол. Онаси ҳар йили иккитадан туғади. Сутни кўп 
беради. Сутиям ёғли. 
— Сизам инсоф қилинг-да, биродар! — даллол энди харидорга қараб қўлини пахса қилди. — 
Янгам рост айтяптилар. Зотли мол, эрта-индин қочиб қолса, баҳорда маза қилиб сутини ичасиз. 
Ойимга жон кирди. 
— Шуни айтаман-да! Зотли мол! Онаси ҳар йили иккитадан туғади. Кўп сут беради. Сути ёғли, 

---

Дунёнинг ишлари (қисса). Ўткир Ҳошимов