Неъматжон Тўхтаев

Неъматжон Тўхтаев
Неъматжон Тўхтаев 1942 йилда (ҳужжатда 1943 йил) Тоштепа ҚФЙ ҳудудидаги Шайдо қишлоғида деҳқон оиласида туғилган. Ота-онаси диний билимларни эгаллаган солиҳ инсонлар бўлган.
Неъматжон Тўхтаев 1960 йили тумандаги 17-ўрта мактабни тугаллаб, собиқ “Дўстлик” жамоа хўжалигида бригада ҳисобчиси бўлиб ишлаган. 1965-1970 йилларда Тошкент политехника институти фуқаролик қурилиши факультетида таҳсил олган.
Неъматжон Тўхтаев 1970 йилдан нафақага чиққунга қадар Шаҳрихон қурилиш-монтаж бошқармасида қурилиш устаси, участка бошлиғи, бош муҳандис вазифаларида фаолият кўрсатган.
Унинг бевосита раҳбарлигида туман сув ва қишлоқ хўжалик бошқармасининг, Усмон Юсупов номли катта Фарғона каналининг Шаҳрихонда жойлашган 2-бўлими маъмурий бинолари, Намозгоҳдаги Агробанк, Бўз шаҳарчасидаги туман газлаштириш идораси қад кўтарди. Бунёдкор ва изланувчан муҳандис-қурувчи Бўз, Балиқчи, Улуғнор туманларида ирригация шохлобчаларини бунёд этишда фаол қатнашди. Ерларнинг мелиоратив ҳолатини яхшилаш, сув йўлларининг бетонлаштириб, исрофгарчиликларнинг олдини олишда қурувчиларга бош бўлди. Кечани-кеча, кундузни кундуз демай ишлади. Кўплаб ёш мутахассисларга билим ва тажрибаларини ўргатди.
Неъматжон ҳозир нафақада бўлсада жамоат ишларидан четда қолгани йўқ. Маҳалла-кўй издаҳомларида, кўплаб тадбирларда қатнашиб эл-юрт корига ярамоқда.
Н.Тўхтаев мактабда ўқиб юрган кезлардаёқ Шаҳрихон тарихини қизиқиш билан ўрганган. Унинг китоб ўқишга, тарихий адабиётларни мутолаа қилишга иштиёқи баланд.