Oʻzbek onasi Mushtipar ham oʻzing, buyuk ham oʻzing

Oʻzbek onasi

Mushtipar ham oʻzing, buyuk ham oʻzing,

Kuyinchak ham oʻzing, kuyuk ham oʻzing.
Olamga tatirlik suyuk ham oʻzing,
Payt keldi aytmoqqa, gapning xonasi,
Ey, Oʻzbek onasi, Oʻzbek onasi.

Seni Toʻmaris deb, maqtaganim bor,

Sen Temur beshigin tebratgan bedor,
Sensan Bibixonim, Nodirai zor,
Payti keldi aytmoqqa, gapning xonasi,
Ey, Oʻzbek onasi, Oʻzbek onasi.

Vatanni Ona deb bekor aytilmas,

Ona buyurganda yoʻldan qaytilmas,
Sen oʻzing Kaʼbamsan, Baytul muqaddas,
Payt keldi aytmoqqa, gapning xonasi,
Ey, Oʻzbek onasi, Oʻzbek onasi.

Boshingdan nimalar oʻtmadi axir,

Vatandek taqdiring boʻldi goh taxir,
Bobur shoh boʻlsada, qoshingda faqir,
Payt keldi aytmoqqa, gapning xonasi,
Ey, Oʻzbek onasi, Oʻzbek onasi.

Gohida balqiding Barchindek toʻlib,

Gʻoʻzadek quriding Tursunoy boʻlib,
Timsoling yalovda yulduzdek kulib,
Payt keldi aytmoqqa, gapning xonasi,
Ey, Oʻzbek onasi, Oʻzbek onasi.

Farzanding quvonsa – sen ham quvonding,

Faqat bolam deding, yashading, yonding,
Nokas uchrasa, oʻrtanding, tonding,
Payt keldi aytmoqqa, gapning xonasi,
Ey, Oʻzbek onasi, Oʻzbek onasi.

Kelajak toychogʻu toyingizdadir,

Jannat ham, albatta, poyingizdadir,
Vatan-ku Siz turgan joyingizdadir,
Payt keldi aytmoqqa, gapning xonasi,
Ey, Oʻzbek onasi, Oʻzbek onasi.

Sizga taʼzim qilib turibman bu payt,

Sizga baxshidadir eng shohona bayt,
Aziz Yurtboshimizga duolaring ayt,
Payt keldi aytmoqqa, gapning xonasi,
Ey, Oʻzbek onasi, Oʻzbek onasi.
Abdulla Oripov