O'zbekistonning Evrosiyo Iqtisodiy Ittifoqiga kirishining afzalliklari va kamchiliklari

Notarif to‘siqlar kamayishi. Xalqaro savdo munosabatlarida tarif (bojlar bilan) savdo aloqalari to‘silishiga qanchalik muammo deb qaralsa, notarif to‘siqlarga ham shunday qaraladi. Jahon savdo tashkilotining «ajdodi» bo‘lmish GATT paytidayoq bunday muammo yuzaga kelgan — notarif to‘siqlar — turli xil sertifikatlar, standartlar, qaror va farmonlar orqali o‘zaro savdoga xalaqit beruvchi, raqobatni buzuvchi narx belgilashga oid to‘siqlar yuzaga kelgan. Hozirgi YeOII hududidagi jami eksport qiymati ichida notarif to‘siqlar yuki 15–30 foiz ekani haqida ilmiy tahlillar mavjud.

Tasavvur qiling, siz bir mahsulotni 100 rublga Rossiyaga eksport qilyapsiz va uning tannarxi ichidagi 15–30 rubl turli-tuman to‘siqlarni oshib o‘tish uchun sarflanadi. Bu juda katta miqdor. YeOIIning ichida to‘siqlar bu darajada bo‘lsa, uchinchi davlatlar uchun qay darajada bo‘lishini tasavvur etsa bo‘ladi. O‘zbekiston YeOIIga qabul qilinsa unga a'zo 5 davlat bilan standartlarni birlashtirish orqali chegaralardagi ortiqcha tekshiruv va ulardan kelib chiqadigan vaqt isrofining oldini olish mumkin. Eksport qiluvchilarimiz mahsulotlarini YeOII hududiga ancha erkin chiqarishi mumkin bo‘ladi.