Qucholmadim boʻsh beshikni ham, Toabadga kuydi bardoshim
Download 143.06 Kb. Pdf ko'rish
|
she\'rlar lotin tilida
|
*** Qucholmadim boʻsh beshikni ham, Toabadga kuydi bardoshim. Nima qilay? Topolmay malham, Arosatda aylanar boshim. Yuragimga otashni yoqar Tilanardim begimga har zum. U suyukli Kumushga boqar Menga bersin Xudoyo toʻzim. Qachongacha? Nasibam firoq Qachongacha turar edim jim. Yelkadoshim oʻzimdan yiroq Sabr kosam toʻlar betinim. Va yorildim... Oʻt qoʻydim hatto, Bari bitti. Tugab gʻam-u dard. Qoldim baxtsiz, yorsiz va ne hol Qilib ikki dunyo malomat. Alqamang koʻp Kumushbibini, Bilsam, " yarim nonni yemasdim". Agar qismat qoʻlimda boʻlsa, Otabekni begim demasdim! **** Bo'shliq- Ruhiyatga singgan hodisa to'liq. Iznsizlik sarhadi esa Yo'qlik. Xayol- Haqiqatdan olar tarsaki, Hayot- Kamomadi qanday narsaki keltirsa malol. Ko'z yosh Soddaligim belgisi xolos. Ey tosh! Yuragimga aylan iltimos... **** Yo'lingiz oq bo'lsin, "Azizim!" Oqlarga belansin yo'lingiz. Unda gard ko'ringan faqat siz— yakka o'zingiz! Aytilmagan so'zlar alami tutsin, Ochilsin mubhamlik darvozalari. Joningizdan o'tsin! Sira unutsiz— Noraso tuyg'uning janozalari. O'zimcha izladim ko'nglim maslagin Qaysiki, bo'lolmas mavjudi odam... Bir kun nasibingiz bo'lmoq istagin– Yaxshiyam Egamga aytmadim! Balki, maqbulidir ikkimizga ham Muborak bo'lmagan... ehtimol, bo'lmas... Garchi ketmog'ingiz malhamli alam, aslida, foydaki, qolmagay abas. Keling, o'rganaylik insof darsini... Xotirim anchayin topingan to'zim. Kutaman xayrini O'zidan izni. Keting! Yo'lingiz oq bo'lsin, "Azizim". **** Menga qiziqsiz... Havolanib ko'kning yuziga– Dimog'ingiz ko'tarilgan dam, Xohlamayman go'yo o'zidan Yasab olgan majnunlarni ham. Axir qiziq? Siz— Gul ajratmay qo'nar qushmasmi? Mayna bo'lib tikan dastida. Nazarimdan chetlashing rosti O'ralashmang oyoq ostida. Juda qiziq, osonmi shunday? Bir kun u deb, bir kun bu demak. Kulguli-ku, bilsangiz faqat O'zingizni qilyapsiz ermak. Menga sira qiziq emassiz! Takror takror etaymi hali, Eslatish ham shart emas, shaksiz Yuragingiz to'rt kamerali! Ofarin Asta "ertaklanib" ketmoqda olam, Haqchi bulbullardan chiqmayapti sas. Daraxtlar egilib tilangani ham, Qulluq sifatida nazar qilinmas. Nabotot nafasi bo'g'ib havoni, Zulmatdek akslanar gul istarasi. Yo'lchi yulduzlarning chiqib zaboni, Botilga chorlaydi zimdan qarasang. Qoyalar viqori nomiga xolos, O'pirar botindan kibr rutbasi. Qarinchg'a jonini etmoqchun xalos Boshqa jondoshining olar nafasin. Samoning erklari qoldi kishanda Chaqmoqlar qo'rqadi yomg'ir dastidan. Parranda bo'lgandek etxo'r kushanda, Yirtqichlar topmoqda zavol, aftidan. Go'zallik "Ma'budi" qilmoqda riyo Borliq yo'qsillikka ayladi qaram. Vijdoning qiynalmay qo'ydimi, dunyo? Odamdan rang olib boryapsan sen ham! Go'zallik ma'budi— Diana nazarda tutilgan. FAQAT Osmon yiroq emas, menga sira ham, Yerningda ko'ksini tig'lamoq oson, Ming yillik o'latga topilar malham, Bir kun kemtiklarin to'ldirar inson. Yechmoq mushkul emas, topaman toki, Asrlik so'roqqa izlansa javob. Gar, mal'un yoqamdan tutsa hattoki, Yagona javobim— tilimda salot. Qayta yashamoqqa imkon bor go'yo, Tog'lar etagidan siljiydi bir kun. Sahro suvga to'lib, qum bosar daryo, O'lmoqqa tirilmoq yasaydi yakun. Topmoq va yo'qotmoq azal. Qanchaki Yiroq yurish mumkin gunoh- xatodan. Ammo, alam qilar menga shunchaki, Faqat, so'rolmayman sizni Xudodan. (Garchi, farqingiz yo'q Odam Atodan!) O'LIM GUVOHNOMASI Qismat chizgilari chizilmish rangin, Ko'rkli taqdirlarga kiydirilgan tus. Qadim bitiklari ko'rsatar o'ngin, Bir xil falsafasi aylanar hanuz. Nomiga yashamoq. Borsa ham nari— Sukunat sukunin yamlaydi ovoz, Umrlik nisbatni yozsak bo'lari Kelar-ketarimiz bir enlik qog'oz! * Adoqsiz bulutlar ostida, Soyalar oladi xavotir. Chalqancha zaminning etida Ahli mavjudlik uxlayotir... Toʻlgʻonib epkinning izmida Toʻzgʻigan nihollar kokili, Ochganda qahrabo koʻk yuzin Yulduzlar osmonning sepkili. Nigohin tikadi bir dilbar, Hiloldan husnini tilanib. Tojdor qichqiradi shu mahal Samodan malaklar yoʻllanib. Oʻrlagan borliqda sakinat, Dilrabo suv olar yuziga, Nigohin berkitar zulumot Ufqrang oʻzgarar koʻzidan... Oshirib uyquda oʻzgalar Hisobi qazodan qarzini... Borliqqa Rabboniy soʻz toʻlar, Azonni oʻqigach muazzin. Xolis Yuragingga uzring aytolsang. To'kis– Muhabbating hajrida tolsang, ne afsus! Axir Sadolari singgan kenglikka, Bag'ir To'lganida hislarga yakka yo'q oxir. Mavhum? Ayting bunda qay biri mubham Afsun... Aslo! Bir kun yasolmas sitam hech yakun. Asliy Azalimning yozilgan naqli Oliy Toabadga egallar qalbim— Egasi. #oq_shér Biz kimmiz?! Kechmishi tutashgan Atoga... ma'nisiz, zayllar uyqashgan xatoga. Buyruqki! Loyga egmay bo'ynini olov, Fikr-u yod — Vasvasaga elanar darrov. Rostmana, Toleda iblisning kulgusi, astayin ro'yin xush etadi qutqusi. Tavallo aylab odam mal'un izmiga, Qarangki, Xochdan Xoja yasab o'ziga. Kulguli! O'zi o'ylab topib o'zi qul... Qayg'umi? Ochiq ko'zlar topolmasa yo'l. Hayvonga, Yo tog'ut va yoki boshqa? Mo'jiza— qizil tus surtilsa toshga. E'tiqod— Manglayga bitmish qora dog' Va bir kun haykaldan qalanar o'chog'... Loy qotsa Ularning bo'lgani bo'lak, Bor yo'g'i Qanchadir saqlangan kesak! **** Kapalak tentirar savdoyi, O'par dalli, g'uncha yuzidan. Musofir qush qilar sazoyi, (Telbalardan go'yo bezigan). Subh shamolin ilib raqsini, Gul barglari sallona yoziq. Parvonasi bezab tusini— Hozirida bir kunlik oshiq. Telba ruhi kechmasa qani, Qondirsaydi o'zin bodadan. Poyonimga yetsam ham mani- Chiqarma der: Gulim yodingdan! Garchi bilmas... atagani yor- Xiyonatin sezmas, barini. Garchi bilmas... kunlik oshiqlar, Quchishlarin shiralarini... Yangi bir kapalak savdoyi, O'par eski g'uncha yuzidan. (Oshiqlar ko'p, gul-chi havoyi Umri o'tar, shuning kezidan.) Musofir qush qilar sazoyi, Telbalardan harchand bezigan... NAVOIY Qora bulutdan so'ng Xuroson ko'kin, Hirotdan samoga chiqdi bir Hilol. Mitti Alisher lek, saboti shuki, Birgina misradan Lutfiy tili lol. Yazdiy Fotihasi bo'ldi mustajob, Mag'ribdan mashriqqa bir ziyo cho'mdi. Ko'hna zarvaraqqa bitilgan kitob, Turkiy so'z jumlai- jahonni ko'mdi. Moziy charxpalagi kemtik , goh to'la. Fursatda toblanar har bir kosasi. Gardun bitigida ajib silsila, Ash'ori beqiyos Navoiy sasi. Besh ganjning izidan yangi xazina, So'zlar shokilasi tizilgan mujgon. Turon zaminida bo'lmagan sira— Boqiy doston bilan maqtanar jahon. Farhod Shiriniga intildi va lek, Iymon sobitligi asli murodi. Komillik ilinji, maqsadi demak, Majnun ko'nglida ham xolis Haq yodi. Biz kimmiz? Kechmishi Atoga tutash, Biz kimmiz? Ertasi nurga to'lajak, Kimlarga zo'r ibrat bo'lmagan o'tmish, Va yoki sururbaxsh baxtli kelajak. 12.2019- yil Bolajon Malomat qilmaysan, ko'ngli tugunim... Sarflari yo'qolgan kecha bugunning, Murg'akkina jonim, dili yukunim Dardingga darmoning bo'lay bolajon. Mitti jonginangga sarhadsiz hazin, Haqdan haqqing tilar hayoting izin, Sabri-oliyingga loyiqdir tahsin, Dardingga darmoning bo'lay bolajon. Azizam noraso dunyo kami ko'p, Hali g'amlar tugar... Mardim, ishon, xo'p So'nggida tamoman baxtlarga yo'llab Muroding quchadi olam, bolajon. *** Noliding deyishar, dardingni yorsang, Qimmatga tushgan bu taskin tilyapti. Bo'g'ilib ketasan... Biqiq hayotdan— Ketgim kelyapti... G'urbatdan toliqqan mitti farishta, Fayzsiz hovli bilan uzmoqda rishta. Qo'lin ushlab men ham u bilan asta-- Ketgim kelyapti... Mayli-ku , berilsa Firdavs daragin, Kerakmas, Jannatning bo'lmoq malagin, Robbim! O'rnimni qil Arshing poygagin-- Ketgim kelyapti... Ruh vujudga ingan, jon singgan tana, Uzlatdan uzoq-u, qaytardir yana... Qaniydi! Sen qodir aylagan sana-- Sajdada boshim-u Ketgim kelyapti... KUMUSHNING SO'NGGI SO'ZLARI Men o'shaman! Dunyolari sig'dirmagan, Matlubimga payvand edim oshuftahol. " Begoyim" deb begim jondan suygan ekan Bizni ayirdi o'zga bir telba ahvol. Tarozining biri edim naylay manam, Istabmidim? Qolmoq sitam zulmatida. Yuz zafaron, ko'zim giryon, qilar alam— Ikki gulning biriligim dil qatida... Qismat bitgan yozug' ekan ne ham derdik, Osonmidir ko'nikmoqlik aql joylab. Ich-ichimga g'ulu solar, chulg'ar hadik O'z ajalim turgan ekan qatlim poylab. Rozi bo'ling... Kumushingiz rozidir ko'p, O'ylamangki, yuragingiz bo'lib dog'da. Ey siz, begim, menga qarang. Yig'lamang xo'p, Omoningiz omonatin berar chog'da... QALBIM EGASI Bilmadim, Shirinda tug'yon qayerdan, Hech fursat ishq deya ko'ngil tilmadim. Garchi, bong ursa ham butun bir jahon, Muhabbat ko'yiga asir bo'lmadim. "Hali bolaman-ku" ( shuda ovunchim) Mahliyo aylarmish bir go'zal jilo. Zotan, qiynamagan o'tdek sog'inchi, Oshiqlar oshiqqan qandayin ma'vo. Kimdir aytdi: " Senda yo'q ekan yurak" Qanday yashash kerak, charxi baloda? Bir kun bezar sevgi hayotim va lek, Qalbimning Egasi Arshi- A'loda! Ona Boshingdagi og'riqlarga izlar holing mador-malham, Ichikkansan siqtalardan, qochgan rang-u ruxsoring ham. g'ussa to'la ko'z yoshingga bir dastro'mol tutdim, alam... Alam qilar qarab turib, ikki qo'lim bo'shi, ona! She'r yozaman bisotimdan, shu maydalik kelar faqat, Kibor bosmish g'aflat ko'yi, dimog' quchdi osmon-u qat, To'rt tomondan topinganim, tutinganim qay adolat? Senga kelgach boz qotdimi yuragimning toshi, ona? Yillar sayl derdi ekan, sayrona kezdirding meni... Ona, meni bilmas birov, birovga sezdirding meni, Dunyo o'zdan ketganing shu, o'zingdan bezdirding.... tovba! Mo'rt irodam chidamagan, qolganim shu loshim, ona. Ma'ni izlab, puchmohlardan qay mantiqqa inonchim bor, Hayot degan kechadan gap– bugunlarga kelar malol, Yuragida kelbat yo'g'u, faqat tilda bor so'zamol Bolangga ham bersin illo, toqat-u bardoshing, onam! **** Sog'indim, avvalgi qorlarni Yastansa maydonlar ko'ksiga. Chug'urchuq qo'nganda, torlarni Siltasa tushgandek raqsga. Marmarning ustidan toza qor Hovuchlab kaftimga olaman, Yon-berga alanglab necha bor So'ng, tezda og'zimga solaman... Mazzami?! Jim turing! Bilsalar Onamlar qulog'im tortalar Vovaylo, ozgina yo'talsam Tomoqqa zelyonka surtalar. Esimda, tandir-kul o'choqda Kartoshka kuygancha pishgani. Arilar g'ujanak bir chog'da— O'ylamay, devorni teshganim. Ajratgach o'rikning danagin Belardim akamning egnini. " Sen shayton, qurmag'ur, tosh yegin" –Onam der, shimarib yengini. Ostida plastmas tefalni, Yoniq gaz ustiga qo'yganim. To'ysin deb, xamirni oshirib, Yedirsam, essiz, bir qo'y qani?... Bugunlar erinchda negadir O'tmoqda qiynamay deb jonni... Domlarda — sut keldi —deb yurgan Sog'indim avvalgi, chaqqonni, Ha, o'sha, tinchimas gapdonni Sog'indim... Ketmog'im bor. Kutilgan yechim! Subutimni bezaydi toqat. Ikki enlik yozgan maktubim— Kundaligim bezaydi faqat. Anglayolmas uzoqmi-yaqin, Masofani talashmas hislar Nimasini izlaydi tag'in Nimanidir yo'qotgan ko'zlar. Ey, nazdlari shunchalar og'ir?! Topinasiz qaysi maslakdan? Murodingiz yetkazsin oxir... Toleingiz qaysi malakda. Haqki, hikmat yasalgan o'zga Ilinjlarning yo'qdir qurbati! Ketmog'im bor– haddidan o'zgan Tuyg'ularni hovuchlab nari. Siz yaxshisiz... Nasib qadar keng Dargoh bersa, jannatiy holda. Balki, kirib boradirman men— Siz hurlarni kutgan mahalda. Lahzada unutdim ismingni Lahzada ilg'adim o'zimning borligim... Yo'liga solgancha izmimni, Ko'lkalar berkitgan ko'zimning ko'rligin... Dunyoda har manzil ro'yodir, Sezdimki, men uchun bu yerning torligin. Oshiqlar intilgan ayon bir Angladim, faqatki Xudoga Yorligim! UNUTILGAN TUYG'ULAR Oson tutmang sira, umidlanmas deb.. Yaxshiki! Siyratim o'yim yashirar, Sig'indi vujudda g'ussalar hadeb Majolim qarichlab, ko'ksimda urar. Balki, rangi -ro'yim ko'rinar behis, Sezimim unutdim, sezmadilar ham... Men telbaga telba bo'lgandim ‐qo'qqis, Uning "bemorligi" qilmoqda alam. Kerakmas, havoyi so'zlar ortiqcha, Jim turib, aldamay boqqan ko'z aziz. Istab-istamasdan ko'nikdik qancha Eski tarixlardan qolganicha iz... Unut. Tuyg'ulardan qolmagan zarra! Faqat nishona-yu nomi bor xolos. Soxtalik- ishqqa dor tizgandan ko'ra Ey tosh— yuragimga aylan, iltimos!... QACHON O'RGANAMIZ... O'z rizqin kam bilib yurgan odamlar, Nafs uchun bosilgan egri qadamlar, O'z ishin kasridan dilda alamlar... Bosh egib, ko'p bilib ozroq tashvishni Qachon o'rganamiz shukur qilishni?! Oqdan g'ubor izlab yurganlar kammi?! Yolg'onni rost bilib turganlar kammi?! Harom oshdan to'yib turganlar kammi?! Ro'kach qilavermay ro'zg'or turmushni Qachon o'rganamiz shukur qilishni?! Goho Xudo bergan darddan noliymiz, Ba'zi etga ingan garddan noliymiz, Nega "Baxtsizman" deb baxtdan noliymiz? Nasibaga ko'nib qo'ysak nolishni Qachon o'rganamiz shukur qilishni?! UMID Bunda qorachiqlar unutgan holin, Suv bor-u , afsuski, tayammum chora Sirtida urchigan holati so'lg'in, Istar lek, ketolmas, vujudni yora. (qaniydi....) Qaniydi, tik turib qilolsa ruku, (Majoz) tovongacha singganida dard... Xayolan mashriqqa borib- kelsa u O'chirardek go'yo qalbindagi gard. A'molin bezatsa, g'oyibdan Iloh, Kutilmagan joydan kelardek najot. Bo'g'zidan ilkiga ko'chgancha duo Bir umid cho'kkalab o'qiydi bomdod... Yaxshiyamki shoir emassiz Tusamaydi ta'bingiz she'rlar Yaxshiyamki bitmaysiz doston. Ikki telba bir bo'lsa agar "Kelib qolar oxiri zamon". Qadrligim— xushingiz o'zda Emasdirsiz yozmoqqa molik. Yuz takalluf qilmoqlik — so'zga "Shoirlarga tekkan kasallik". Ular tilmoch yuraklariga Lafz topolmay qoladi oxir. O'ylaganin yozolmasa gar "Jin chalgandek yuradi shoir" Siz yaxshisiz! Holingiz solim Nasibingiz shu bo'lsa agar. Sevmoq kerak kelguncha o'lim Ash'orlari bilan barobar. ** Yangi suvrat kiyar eski hodisa, Kechagi tong yasar qaytadan shakl. Soniya ilmoqlab — daqiqa bog'lar. Sig'dirmas aql... Inson o'ylab topgan o'ylariga qul, Miyasini tirnar "nimalarim kam". Odamlar odamdan odimlayman deb— Dunyosiragan. Bo'lar- bo'lmasiga urunib tag'in Bo'ldirmoqlik uchun tinmay qilar sa'y. Bitmagan ishini birov bitkazsa, Xudodek ko'rgay. Faqat men xotiri jam bo'lgan yakkash, Sayrona kuzatar o'ng-u so'lini. Bori-yo'q, yo'qi- bor, baridan go'yo Yuvgan qo'lini.... ** Aylantirib tolmasmi aqlim, Ko'rarimni ko'rib yuribman.... Tegramda iligan qahraton— Men uni sovutib turibman. Daf'atan, latoyif pardalar Yuzimni o'raydi o't sari. Qarshilar—qarshilar. Qanchalar Rizo deb qo'ymadim axiyri... Zax bosgan vujudga qay vaqtda, kirgan— Chiqarib yuborgum ruhimni. Osmon! Yetti otash tikilib turgan, Men esam o'rayman goh uni. Chertib chidamagan taqdirmi? toki- Xayolotim o'yimdan bezor Keldim. Yurayapman odamday balki— Alhazar! odamday ketmasligim bor. Nazdimda yutindim bemajol, behol... Bir ilinj bo'g'zimni alqab turadi. Garchi, do'zoxlari itarsin cho'g'ga So'ng so'zim! Meni Xudo yaxshi ko'radi. Aldama sen o'zingni... shunchaki, aldama! osmonlardan tusharsan bir kun, zo'r gulshan deb, qalbing yo'llama, bilmadim.. Havas baxtga bo'lolmas ustun! Havolanma ko'kning yuziga, soxta ishqqa dahling bo'lmasin. Sen shu bugun tizgan iziga, Erta ilhaq, ko'ngling qolmasin. O'ylama... o'rganma, bexuda balki, sen tuyg'uga yo'ygan shu havas! so'ngsiz deya ataysan toki- Ilnj boqqan nigoh bo'lgach past. sen o'zingni asra ( xatodan) asra shu bugun... Erta qo'lingdan tutguvchi insoning uchun.. MARINA Latoyiflik mengzagan oqshom, Salqinlanar qorishiq havo. Sergey asta so'zlar muloyim Va Marina tinglar. Dilrabo! Jimlik. Yakunlanar kulgular Hadik bosar dilni ilkisdan. Go'yo g'aybdan ogohdek ular, — To'xta, Sergey ketma bir pasga... Xizmat uchun ketdi oq zobit, Ming to'qqiz yuz qirq birinchi yil. Fransiyadan ortiga qaytib, Qaydnomada yozildi qatl. Qismat chizgin chizdi bir talay, Zardob to'ldi ko'ngil qa'riga. Jismu-ruhi muzlab, hoynahoy Ich- ichidan yonar Marina. Telba isyon turolmaydi jim, Og'ir botdi ravosi ochun. Hukmga ters qilmoq-chun hukm— Yakun qildi kelmasdan yakun! Download 143.06 Kb. Do'stlaringiz bilan baham: 
|