Tema. Mu’lk,tovar ha’m pul

Menshiklestiriw – ma`mleket mu’lkine iyelik etiw huqi’qi’ni’n’ ma`mleketten jeke shaxslarg`a o’tiwi. Mu’lkti ma`mleket iyeliginen shi’g`ari’w menshiklestiriwden ti’sqari’, bul mu’lk esabi’nan basqa ma`mleketlik emes menshik formalari’n ju’zege keltiriwdi de na`zerde tutadi’. Ol bir qatar jollar menen a`melge asi’ri’ladi’: ma`mleketlik ka`rxanalardi’ akcionerlik ja`miyetlerge aylandi’ri’w; ma`mleketlik ka`rxanani’ sati’p, oni’ ja`ma`a`tlik menshikke aylandi’ri’w; mu’lkti quni’na qarap shi’g`ari’lg`an chekler boyi’nsha puqaralarg`a biypul beriw; mu’lkti ayi’ri’m Isbilermen ha`m is basqari’wshi’larg`a sati’w; ayri’m ma`mleketlik ka`rxanalardi’ shet el firma ha`m puqaralari’na sati’w yamasa qari’z esabi’na beriw; ma`mleketlik mu’lkti aukcionlarda kim zi’yat sawdasi’ arqali’ sati’w ha`m t.b.

Menshiklestiriwdin’ usi’llari’ da tu’rlishe boli’p, olardi’ 3 toparg`a aji’rati’w mu’mkin: 1) ma`mleket mu’lkin biypul bo’lip beriw arqali’ menshiklestiriw; 2) ma`mleket mu’lkin sati’w arqali’ menshiklestiriw; 3) ma`mleket mu’lkin biypul bo’lip beriw ha`mde sati’wdi’ birlestiriw arqali’ menshiklestiriw.

Ma`mleketimizde a`melge asi’ri’lg`an menshiklestiriw ha`m mu’lkti ma`mleket iyliginen shi’g`ari’w processinin’ o’zine ta`n o’zgesheligi – bul oni’n’ basqi’shpa-basqi’sh ali’p bari’lg`anli’g`i’ esaplanadi’ ( 3.1- si’zi’lma).

Basqi’shlar	A’melge asi’ri’lg`an ilajlar
1-basqi’sh (1992-1993-ji’llar)	Bul basqi’shta uli’wma awqatlani’w, turaq-jay fondi’, sawda, jergilikli sanaat, xi’zmet ko’rsetiw ka`rxanalari’, awi’l xojali’q o’nimlerin qayta islewshi ka`rxanalar menshiklestirildi.
2-basqi’sh (1994-1995-ji’llar)	Ko’plegen orta ha`m iri ka`rxanalar akcionerlik ja`miyetlerge aylandi’ri’ldi’ ha`m olardi’n’ akciyalari’ respublika bahali’ qag`azlar bazari’nda sati’la basladi’.
3-basqi’sh (1996-1998-ji’llar)	Akciyalardi’n’ qadag`alaw paketi ma`mleketlik menshik bolg`an iri ka`rxanalar ha`m tarawlar menshiklestirildi.
4-basqi’sh (1999-2002-ji’llar)	Menshiklestirilgen ka`rxanalarg`a si’rt el investiciyalari’n tarti’w, basqari’w na`tiyjeligin artti’ri’w ha`m menshiktin’ jan’a qatnasi’qlari’ni’n’ toli’g`i’raq ha`reket etiwi ushi’n sharayat jarati’w.
5-basqi’sh (2003-ji’ldan baslani’p	Menshiklestiriw processinin’ na`tiyjeligin artti’ri’w ha`m jedellestiriw, ekonomikada jeke sektordi’n’ qatnasi’wi’n aktivlestiriw ha`m olardi’n’ salmag`i’n artti’ri’w.

3.1- si’zi’lma. O’zbekistanda mu’lkti ma`mleket iyeliginen shi’g`ari’w ha`m menshiklestiriw processinin’ basqi’shlari’