Urganch davlat universitetining tabiiy fanlar fakulteti «ekologiya va hayot faolyati xavfsizligi» kafedrasi

11-modda. Ekologik auditorlik tashkilotining huquq va majburiyatlari
Ekologik auditorlik tashkiloti quyidagi huquqlarga ega:
ekologik audit subyektiga nisbatan ekologik audit o‘tkazish to‘g‘risida qaror qabul qilish uchun uning ta’sis hujjatlari va boshqa hujjatlari bilan oldindan tanishish;
ekologik audit subyektining asbob-uskunalari va boshqa mol-mulkini inventarizatsiyadan o‘tkazish, shuningdek ularning haqiqiy holati va ish samaradorligini o‘rganish;
zarur o‘lchovlar o‘tkazish, namunalar olish va o‘zining akkreditatsiyadan o‘tgan laboratoriyasida yoki boshqa akkreditatsiyadan o‘tgan laboratoriyada laboratoriya sinovlarini o‘tkazish;
ekologik audit o‘tkazish davomida yuzaga kelgan masalalar bo‘yicha tabiatni muhofaza qilishga oid tadbirlarni o‘tkazish uchun mas’ul bo‘lgan shaxslardan tushuntirishlar va ekologik audit o‘tkazish uchun zarur bo‘lgan qo‘shimcha ma’lumotlar olish;
ekologik audit o‘tkazishda ishtirok etishga boshqa mutaxassislarni ekspert sifatida jalb qilish;
ekologik audit bilan bog‘liq huquqiy masalalar yuzasidan maslahatlar berish.
Ekologik auditorlik tashkiloti quyidagi turdosh xizmatlarni ham ko‘rsatishi mumkin:
a) atrof-muhitga salbiy ta’sir ko‘rsatganlik uchun to‘lov hisob-kitobining to‘g‘riligini tekshirish;
b) quyidagi masalalar yuzasidan tahlil qilish va maslahat berish:
tabiiy resurslardan foydalanish va (yoki) atrof-muhitga ta’sir ko‘rsatish bilan bog‘liq faoliyatni amalga oshirish;
atrof-muhitga ta’sir ko‘rsatish to‘g‘risida hisobotlar tuzish;
tabiatni muhofaza qilishga oid faoliyatni va tadbirlarni rejalashtirish, amalga oshirish hamda natijalarini baholash;
ishlab chiqarishga doir ekologik nazoratni tashkil etish va o‘tkazish, uning natijalari to‘g‘risida hisobotlar tuzish;
atrof-muhitga salbiy ta’sirni kamaytirish bo‘yicha ilg‘or texnologiyalar va usullarni joriy etish;
v) atrof-muhitga yetkazilgan zararning miqdorini aniqlash.
Ekologik auditorlik tashkiloti:
ekologik auditorlik faoliyatini amalga oshirish chog‘ida ekologik audit to‘g‘risidagi qonunchilik talablariga rioya etishi;
shtatida asosiy ish joyi ekologik auditorlik tashkiloti bo‘lgan kamida to‘rt nafar ekologik auditor mavjud bo‘lishini ta’minlashi;
ekologik auditorlik tashkilotining fuqarolik javobgarligi sug‘urta polisiga ega bo‘lishi;
ekologik audit xulosasida texnik jihatdan tartibga solish sohasidagi normativ hujjatlar hamda atrof-muhitni muhofaza qilish va tabiiy resurslardan oqilona foydalanish sohasidagi normativ-huquqiy hujjatlar talablarining buzilishi holatini bartaraf etish bo‘yicha tavsiyalarni aks ettirishi;
ekologik auditorlik faoliyatini amalga oshirishga doir tegishli hujjatlarni ekologik audit buyurtmachisining talabiga ko‘ra taqdim etishi;
ekologik auditorlik xizmatlarini ko‘rsatish chog‘ida olingan axborotning maxfiyligini ta’minlashi;
ekologik audit natijalarini ekologik audit standartlariga binoan rasmiylashtirishi va ekologik audit xulosalarining nusxalarini ekologik auditorlik tashkilotida kamida besh yil saqlashi;
ekologik auditorlar ishi sifatining nazoratini ta’minlashi shart.