Y3000 ta buxgalteriya O‘tkazmasi hisobvaraqlar rejasi bo‘yicha bog‘lanishlar* Muqaddima I bob. Buxgalteriya hisobi hisobvaraqlar rejasining umumiy tavsifi

Uzoq muddatli investitsiyalarni hisobga
oluvchi schyotlarning (0600) bog‘lanishi

Boshqa korxonalarning qimmatli qog‘ozlariga, mamlakat hududida va xorijda tuzilgan shu’ba va qaram xo‘jalik jamiyatlari hamda boshqa korxonalarning ustav kapitallariga qilingan uzoq muddatli investitsiyalar (qo‘yilmalar)ning mavjudligi va harakati to‘g‘risidagi axborotlarni umumlashtirish quyidagi schyotlarda amalga oshiriladi:

0610 "Qimmatli qog‘ozlar";
0620 "Shu’ba xo‘jalik jamiyatlariga investitsiyalar";
0630 "Qaram xo‘jalik jamiyatlariga investitsiyalar";
0640 "Chet el kapitali mavjud bo‘lgan korxonalarga investitsiyalar";
0690 "Boshqa uzoq muddatli investitsiyalar".
Ularning xarid qilinishi pul mablag‘larini hisobga oluvchi schyotlar bilan bog‘langan holda uzoq muddatli investitsiyalarni hisobga oluvchi schyotlarning debetida hisobga olinadi, uzoq muddatli investitsiyalarning hisobdan chiqarilishi, tekinga berilishi, ustav kapitaliga ulush sifatida berilishi oqibatida chiqib ketishi esa - ushbu schyotlarning kreditida aks ettiriladi.
Investitsiyalar buxgalteriya hisobini tartibga soluvchi asosiy me’yoriy hujjatlarga quyidagilar kiradi:
- O‘zbekiston Respublikasi Buxgalteriya hisobining milliy standarti (8-son BHMS) "Jamlangan moliyaviy hisobotlar va shu’ba xo‘jalik jamiyatlariga sarmoyalarni hisobga olish" (Moliya vazirligi tomonidan 1998 yil 14 oktyabrdagi 50-son bilan tasdiqlangan va O‘zR AV tomonidan 1998 yil 28 dekabrda 580-son bilan ro‘yxatdan o‘tkazilgan);
- O‘zbekiston Respublikasi Buxgalteriya hisobining milliy standarti (12-son BHMS) "Moliyaviy investitsiyalarni hisobga olish" (Moliya vazirligi tomonidan 1998 yil 23 dekabrdagi 65-son bilan tasdiqlangan va O‘zR AV tomonidan 1999 yil 16 yanvarda 596-son bilan ro‘yxatdan o‘tkazilgan).