Ўзбекистон Республикаси Адлия вазирлигида 2018 йил 29 июнда 3029-сон

1-БОБ. УМУМИЙ ҚОИДАЛАР

1. Мазкур Низомда қуйидаги асосий тушунчалардан фойдаланилади:

автоматлаштирилган банк шохобчаси - халқаро тўлов карталаридаги маблағларни нақд миллий ёки чет эл валютасида ечиб олиш, нақд чет эл валютасини нақд миллий валютага айирбошлаш ва бошқа чакана тўловларни амалга ошириш имконини берувчи ускуна ёки ускуналардан иборат мажмуа;


банк картаси - тижорат банки томонидан эмиссия қилинган, персонализацияланган, тўлов воситаси сифатида ишлатиладиган ва ўз сақловчисига банк ҳисобварағидаги маблағлари доирасида операцияларни, жумладан ҳисобварақ орқали нақд пулсиз ҳисоб-китобларни (тўловларни) амалга ошириш, ундан нақд пул маблағларини ёки банк кредитини олиш имконини берувчи тўлов картаси;


банк ҳисобварақларига масофадан хизмат кўрсатиш дастури - чет эл валютасининг олди-сотди операцияларини амалга оширилиши ва халқаро тўлов карталаридан пул маблағларининг муддатли омонатларга ўтказилишини ва бошқа чакана тўловларни амалга оширишни таъминловчи резидент жисмоний шахсларнинг масофадан туриб бошқариш имконини берувчи махсус дастур (бундан буён матнда махсус дастур деб юритилади);


валюта айирбошлаш шохобчаси - резидент ва норезидент жисмоний шахсларнинг (бундан буён матнда жисмоний шахслар деб юритилади) нақд ёки халқаро тўлов карталаридаги чет эл валютасини нақд миллий валютага айирбошлаш, халқаро тўлов карталардаги маблағларни нақд шаклда ечиб бериш ва норезидент жисмоний шахсларга нақд чет эл валютасини сотиш операцияларини, шунингдек ушбу Низомда белгиланган бошқа банк хизматларини кўрсатувчи турғун шохобча;


кунлик ҳужжатлар - операцион кун давомида расмийлаштирилган валюта айирбошлаш операциялари ҳисобини юритиш ҳужжатлари;


қимматликлар - миллий ва чет эл валюталари;
операцион кун - жисмоний шахсларга хизмат кўрсатиш учун тижорат банки томонидан белгиланган вақт;


халқаро тўлов картаси - халқаро тўлов тизимлари билан келишувга асосан эмиссия қилинган чет эл валютасидаги халқаро тўлов картаси;