Ўзбекистон Республикаси Бандлик ва меҳнат муносабатлари вазирлиги

Ўзбекистон Республикаси Бандлик ва меҳнат
муносабатлари вазирлиги

Енгил саноат ва чарм саноати корхоналарида хотин-қизлар учун қулай ва хавфсиз меҳнат шароитларини яратиш, уларнинг меҳнатига муносиб иш ҳақи тўлаш, меҳнатни муҳофаза қилиш, меҳнат муносабатлари билан боғлиқ масалаларда иш берувчиларнинг масъулиятини оширишга доир ТАВСИЯЛАР

Тошкент 2021 й.

КИРИШ
Инсон фаолиятининг энг қадимий соҳаси бўлган тўқимачилик, тикув-трикотаж йўналиши асосан хотин-қизлар меҳнатига асосланган бўлиб, ишлаб чиқаришнинг ўзига хос хусусиятларига қараб меҳнат шароитларининг ноқўлайлиги (ишлаб чиқариш чанги, намлиги, технологик жараёнда қўлланиладиган турли кимиёвий моддалар ҳамда дастгоҳ ва асбоб ускуналар хавфлилиги, ишнинг монотонлиги ва бошқа) билан боғлиқ.
Бу эса хотин-қизлар меҳнатидан фойдаланишда ишлаб чиқариш жараёнларини технологик ва ташкилий усуллари меҳнат хавфсизлиги масалаларига эътиборни кучайтиришни талаб қилади. Улар меҳнатни муҳофаза қилиш бўйича меъёрий талабларини ўз ичига олган амалдаги қонунчилик ва норматив-ҳуқуқий ҳужжатлар талаблари асосида амалга оширилиши мумкин.
Ўзбекистон Республикасининг “Меҳнатни муҳофаза қилиш қилиш тўғрисида”ги қонунига мувофиқ, иш берувчилар билан меҳнат муносабатларида бўлган ходимлар учун хавфсиз ва соғлом меҳнат шароитларни таъминлаш бўйича иш берувчиларга бир қанча вазифалар юклатилган. Бу эса корхонада меҳнатни муҳофаза қилишни бошқаришнинг замонавий усулларини ишлаб чиқиш ва қўллашни тақозо этади.
Ўзбекистон Республикасида охирги йилларда меҳнат жараёнида инсоннинг хавфсизлиги, ҳаёти ва соғлиғи, иш қобилияти сақланишини таъминлаш борасида кенг кўламли ислоҳатлар амалга оширилмоқда. Хусусан, меҳнатни муҳофаза қилиш соҳасидаги асосий тўртта ваколатларни амалга ошириш, меҳнатни муҳофаза қилиш соҳасидаги хизматлар бозорининг профессионал иштирокчиларига ўтказиб берилиши, меҳнатни муҳофаза қилиш бўйича давлат ва жамоат назорати кучайтилиши борасидаги барча амалга оширилаётган тадбирлар энг аввало корхона ва ташкилотларда, иш ўринларида меҳнат шароитларини яхшилашга, ишлаб чиқаришдаги жароҳатланишни олдини олишга қаратилган.