|
65-modda. Ta’lim sohasiga investisiyalarni jalb etish
Davlat ta’lim sohasini, ta’lim tashkilotlari faoliyatini rivojlantirishga, shuningdek investorlarning, shu jumladan chet ellik investorlarning ushbu sohadagi huquqlari va qonuniy manfaatlarini himoya qilishga qaratilgan investisiyalarni jalb etish uchun qulay ijtimoiy-iqtisodiy, tashkiliy-huquqiy sharoitlar yaratilishini ta’minlaydi.
66-modda. Ta’lim tashkilotlarining mol-mulki
Ta’lim tashkilotlari o’z mulkiga, xo’jalik yurituvidagi yoki operativ boshqaruvidagi mulkka ega bo’lishi kerak.
Davlat ta’lim muassasalarining operativ boshqaruvida yoki xo’jalik yurituvida bo’lgan obyektlarning (binolar, inshootlar, qurilayotgan binolar va inshootlarning, o’quv, ishlab chiqarish va ijtimoiy infratuzilmalarning, ta’lim oluvchilar vaqtincha turar joy binolarining, klinik bazalar va boshqa ko’chmas mulk obyektlarining, shu jumladan ta’lim kampuslariga kiradigan mulk obyektlarining) xususiylashtirilishiga yo’l qo’yilmaydi.
Ta’lim tashkilotlari qayta tashkil etilgan hollarda ularning mol-mulki yangi tashkil etilgan ta’lim tashkilotiga huquqiy vorislik asosida o’tkaziladi.
Ta’lim tashkilotlari tugatilganda ularga tegishli mol-mulk kreditorlarning talablari qanoatlantirilgandan so’ng, agar qonun hujjatlarida boshqacha qoida nazarda tutilmagan bo’lsa, muassislarga (ishtirokchilarga) qaytariladi.
Do'stlaringiz bilan baham: | 
