1 Мавзу: “Технология фанини ўқитиш методикаси” фани ва унинг вазифаси

Ўқув дастури. Ўқув дастури ҳар бир фан бўйича алоҳида-алоҳида тегишли мутахассислар томонидан ишлаб чиқилади, ўзбекистон Республикаси Халқ таълими Вазирлиги таълим Маркази томонидан тасдиқланади. Ўқув дастурларини ишлаб чиқишга ишлаб чиқариш, илмий-тадқиқот муассасалари ва вазирликнинг етакчи ходимлари, умумтаълим мактаблари етакчи ўқитувчилари жалб қилинади. Ўқув дастурлари давлат ҳужжатлари бўлиб, буларни бажариш ҳар бир мактаб, меҳнат таълими ўқитувчи учун мажбурийдир.
Меҳнат таълими ва касбга йўналтириш бўйича ўқув дастури ҳар бир синфда йўналишлар бўйича ўқувчиларни қандай билим ва малакалар билан қуроллантириш керак эканлиги, бу малакалар билан қуроллантириш учун қандай иш обектлари танлаш мумкинлиги, уларни бажаришда ишлатиладиган асбоб-ускуналар, техник-технологик маълумотлар ҳажми ва изчиллиги, уларни қандай бўлимларга ажратиб ўрганиш кераклиги, шунингдек, ҳар бир бўлимни ўрганиш учун ажратилган соатлар миқдори кўрсатилган бўлади.
Меҳнат таълимининг йўналишларидан тегишлиси мактаб атрофидаги корхона, ташкилот ва касб-ҳунар коллежларида кенг тарқалган соҳаларга мувофиқ танлаб олинади. ҳар бир мактабда меҳнат таълимининг қуйидаги йўналишларидан тегишлилари асос қилиб олинади:

• 
  Технология ва дизайн
  
• 
  Сервис хизмати
  
• 
  Қишлоқ хўжалик асослари
  

Ушбу таълим йўналишлари мазмунан халқҳунармандчилиги, ишлаб чиқариш асослари ва касб танлашга йўналтириш билан уйғунлаштирилган ҳолда амалга оширилади.
Меҳнат таълимийўналишлари бўйича машғулотларни ташкил қилиш ва ўтказиш кетма – кетлиги маҳаллий шароит ҳамда имкониятларни ҳисобга олган ҳолда таълим муассасаси томонидан белгиланади. Ҳар бир йўналиш бўйича ишлатиладиган электр, илғор техника ва технологиялар асослари ўргатилади.


Меҳнат таълими фанининг мақсади ўқувчиларни ақлий ва жисмоний меҳнат турлари, жараёнлари ҳамда касблар билан таништириш, уларда дастлабки меҳнат кўникмалари ва малакаларини, меҳнатга қизиқиш ҳамда меҳнатсеварликни шакллантириш, уларни меҳнат ва касбларни қадрлашга, уларнинг аҳамиятини тушунишга ўргатиш, онгли равишда касб танлашга тайёрлаш орқали касбгача тайёргарликларини амалга ошириш ҳамда жамият ва шахс фаровонлиги йўлида меҳнат фаолиятига ўтишларига имкон берувчи шахсий сифат ва тафаккурларини ривожлантиришдан иборат.