3-mavzu. Turistlarga havo transportida xizmat ko‘rsatish

Yo‘lovchining tashishdan voz kechishi majburiy yoki ixtiyoriy xususiyatga ega bo‘lishi mumkin. Majburiy voz kechish quyidagi holatlar bilan belgilanishi mumkin:

• 
  chiptada ko‘rsatilgan reysning bekor qilishini yoki kechiktirilishi;
  
• 
  bronlashtirishda yo‘l qo‘yilgan xato tufayli reysda o‘rin yoki chiptada ko‘rsatilgan xizmat ko‘rsatish klassini taqdim etishning iloji yo‘qligi;
  
• 
  favqulodda holat tufayli chiptada ko‘rsatilgan aeroportda qo‘nishning mumkin emasligi;
  
• 
  ushbu reysni amalga oshirayotgan havo kemasi turining almashtirilishi;
  
• 
  yo‘lovchining yoki u bilan birga havo kemasida ketayotgan oila a’zosining betobligi;
  
• 
  tashuvchining yo‘l hujjatlarini noto‘g‘ri rasmiylashtirishi;
  
• 
  havo kemasi kechikishi yoki yo‘lovchi transfer aeroportiga yetib kelishi lozim bo‘lgan reys bekor qilinishi natijasida transfer aeroportidan chiptada ko‘rsatilgan reysda uchib ketishning mumkin emasligi.
  

Yo‘lovchi tashishdan majburiy voz kechgan taqdirda tashuvchi unga navbatdagi reyslardan birida chiptada ko‘rsatilgan shartlarda tashishni taklif qilishi yoki chipta qiymatini jarima sanksiyalari hisobga olmasdan qaytarib berishi shart. Bu holda, agar tashish yo‘lning biron-bir qismida amalga oshirilmagan bo‘lsa, to‘langan haq to‘liq qaytariladi, tashish qisman amalga oshirilgan bo‘lsa, tashishning bajarilmagan qismi uchun haq yo‘lovchiga qaytarib beriladi.
Ixtiyoriy voz kechish — yo‘lovchining shaxsiy sabablari bilan belgilangan voz kechish. Bunda tashuvchi qaytariladigan pul mablag‘laridan o‘ziga tegishli barcha pullarni chegirib qolishga haqli. Xususan, yo‘lovchi uchishdan voz kechishi haqida tashuvchiga uchishdan ko‘pi bilan 24 soat, kamida – 3 soat oldin xabar bergan bo‘lsa, tashuvchi undan chiptaning 10% miqdorida yig‘im chegirib qolishi mumkin; agar voz kechish uchishdan 3 soatdan kamroq vaqt oldin yuz bergan bo‘lsa, yig‘im miqdori 25% ni tashkil etadi. Gruppaviy tashuvlarda 24 soatdan kamroq vaqt oldin uchishdan voz kechish 25% miqdorida yig‘im ushlab qolinishiga olib keladi.
Maxsus tariflar bo‘yicha sotilgan chiptalar pulini qaytarish mazkur tariflarning qo‘llanilishi qoidalariga muvofiq amalga oshiriladi.
Pullar tashuvchi yoki uning agenti tomonidan chiptalar harid qilingan joyda uchish ko’ponlari taqdim etilganidan keyin tashish rasmiylashtirilgan valyutada va haq to‘lash shaklida chiptada ismi ko‘rsatilgan shaxsga yoki chiptaga haq to‘lagan va buning dalillarini taqdim etgan shaxsga qaytarib beriladi.