7-Laboratoriyalıq jumıs. Jer bawırlawshılardıń sırtqı hám ishki dúzilisi

Kesirtkeni jarıw. Kesirtkeni ishine mum quyılǵan vannaǵa qarnın joqarıǵa kóterip jatqarǵannan soń ayaqların iyne menen vannanıń túbine qadaymız.

1. 
   Kloaka tesiginen alqımǵa shekem terisin qayshı menen boyına shekem kesip shıǵıń.
   
2. 
   Aldıńǵı hám arqa ayaqlarına jaqın jerde, terini kóldeneń kesip, payda bolǵan teri bólekshelerin vannanıń túbine qadaymız.
   
3. 
   Teri qanday tártipte kesilgen bolsa, qarınnıń bulshıq et diywalın hám sol boyınsha tigine hám kesesine kesiń (kesiw waqtında ishki organlar zıyanlanbawı kerek).
   
4. 
   Qarınnıń bulshıq et diywalın tigine kesiw waqtında jambas hám jelke beldemesine shekem kesip ekige ajıratıń.
   
5. 
   Kesilgen bulshıq et bólekshelerin vanna túbine qadań.
   
6. 
   Kesirtkeniń ishki organlarınıń ulıwma dúzilisi menen tanısıń hám sol waqıtta onıń ishki boslıq diywalın qaplap jatqan qara, pigmentlesken qarın perdesine itibar beriń.
   
7. 
   Ishek astındaǵı organlardı kóriw ushın ishekti áste aqırın qaptal tárepke súrip qoyıń (bul jumıstı atqarıwda ishekti qaptal tárepke jiberiwge hám ishekti uslap turǵan ishek tutqıshtıń úzilip ketpewine háreket etiń).
   
8. 
   Júrek aldı qaltasınan júrekti ajıratıw ushın qaltasha diywalın pincet penen uslap qayshı menen kesiń.
   

Endi belgili bir tártipte hár bir ishki organnıń dúzilisi menen tanısıp shıǵıń.


Kesirtkeniń ishki organlarınıń jaylasıwı.
Dem alıw organı – kesirtkelerdiń dem alıw jolı sırtqı murın tesiginen baslanadı. Soń hawa ishki murın tesigi xoana arqalı awız boslıǵına kiredi. Awız boslıgınan soń 3 shemirshekten payda bolǵan kómekey jaylasqan. Ol arnawlı bulshıq et arqalı til astı apparatı menen baylanıslı. Awız boslıǵındaǵı hawa kómekey arqalı traxeyaǵa ótedi. Traxeya aldın tamaq soń kókirek boslıǵınan ótip, júrek átirapında eki qısqa bronxqa bólinedi. Bul bronxlardıń hár qaysısı ózine tiyisli ókpede tarmaqlanadı.
Ókpe yamasa dem alıw jollarınıń bir qansha kúshli differenciyallanǵanlıǵı menen kesirtkelerdiń bul organı jer suw haywanlarınıń dem alıw organlarınan parıqlanadı. Ókpe qaltasha formasında bolıp, onıń ishki diywalı hárreler uyasına uqsas mayda-mayda quramalı tosıqlar menen qaplanǵan.
D em alıw akti basqa barlıq amniotlardaǵıday kókirek quwıslıǵınıń keńeyiw hám tarayıwı menen iske asadı.