B. S. Jamilova f. S. Safarov ona tili va bolalar adabiyoti fanidan ilmiy termin va tushunchalar

BOSH SOʻZ Lugʻatlarda (lugʻat maqolalarida) izohlanadigan, tarjima etiladigan soʻz. Lugʻat maqolasi bosh soʻzga tuziladi.
BOSHQARILUVCHI SOʻZ Sintaktik aloqada hokim soʻzning talabi bilan ma’lum bir grammatik shaklda qoʻllanuvchi soʻz. Masalan, maktabga bormoq, ishdan qaytmoq birikmalarida maktabga, ishdan soʻzlari boshqariluvchi soʻzlardir.
BOSHQARUV ALOQASI Sintaktik aloqaning bir turi boʻlib, bunda tobe soʻz hokim soʻzning talabi bilan ma’lum bir grammatik shaklga kiradi, shu shakl orqali tobelanadi: kinoga bormoq, uydan kelmoq, ketmon bilan oʻymoq kabi.
Boshqaruv aloqasida tobe soʻz hokim soʻzga kelishik shakli yoki koʻmakchi yordamida bogʻlanadi (boshqariladi). Shunga koʻra ular kelishikli boshqaruv (q.) va koʻmakchili boshqaruv (q.) deb yuritiladi.
BOSHQARUVCHI SOʻZ Sintaktik aloqada tobe soʻzning ma’lum bir gram­matik shaklda boʻlishini talab qiluvchi soʻz. Masalan, vazifani tekshirmoq, havoda uchmoq birikmalarida tekshirmoq, uchmoq soʻzlari boshqaruvchi soʻzlardir. Q. Hokim soʻz.
BO‘LISHSIZLIK OLMOSHLARI Shaxs, predmet, belgi kabilarga inkor etish bilan ishora qiluvchi olmoshlar: hech kim, hech narsa, hech qanday, hech bir kabilar.
BURUN UNDOSHLARI Havo oqimining asosiy qismi burun boʻshligʻidan oʻtishi bilan hosil boʻladigan undoshlar. Masalan, m, n, ng undoshlari.
BO‘YOQ Soʻzning lug‘aviy ma’nosiga qoʻshimcha tarzdagi emotsional-ekspressiv va uslubiy ma’nolar. Q. Ekspressiv-emotsional boʻyoq. Uslubiy belgi. Konnotativ ma’no.
BO‘YOQDORLIK Emotsional, ekspressiv va sh. k. boʻyoqqa, konnotativ ifo­daga egalik.