Битирув малакавий ишни ёзиш бўйича тавсия

Битирув малакавий ишни ёзиш бўйича тавсия

Битирув малакавий иш НамДУ ректорининг буйруғи билан тасдиқланган мавзу асосида талаба томонидан қўлёзма ҳолида ёзилади.

Малакавий ишнинг таркибий тузилиши режа (мундарижа), кириш, мавзу моҳияти ва мазмунидан келиб чиққан ҳолда 2 та ёки 3 та боб, хулоса ва фойдаланилган адабиётлар рўйхати ( мавжуд бўлса иловалар) дан иборат бўлади.
Ишнинг кириш қисмида битирув малакавий иш мавзусининг долзарблиги ва аҳамияти, мавзунинг олдига қўйган мақсади ва ундан келиб чиқадиган вазифалар, ишнинг обекти ва предмети, ишнинг таркибий тузилиши берилади.
Боблар рим рақамида рақамланади (I-боб, II-боб) ва мавзуси хатосиз ва аниқ ёзилади. Биринчи боб тугалангандан кейин навбатдаги боб янги бетдан ёзилади. Боблар тегишлича бўлим (парагриф)ларга бўлинади. Боб мавзуси билан бўлим сарлавҳаси оралиғи 2 интервал бўлиши мақсадга мувофиқ.
Бўлимлар – 1.1, 1.2, 2.1, 2.2, ... шаклида рақамланиб, саҳифа сарлавҳаси ёзилади.
Бўлимларнинг ҳар бир саҳифаси 28-29 қатордан, ҳар бир қатор 6-7 сўздан, асосий матннинг умумий хажми 10-15 сўздан иборат бўлиши лозим.
Саҳифаларга қўйиладиган жадваллар аниқ ва равшан қилиб рақамланади (1-жадвал, 2-жавдал), сўнгра жадвал номи ёзилади. Жадвал остига, ундаги маълумотлар олинган манба ёки ташкилот номи ёзилиши керак.
Расмлар, чизмалар, график ёки диаграммалар жойлаштирилгандан кейин, улар остига тартиб рақами (масалан, 1-расм ёки 1-чизма ёки 2-диаграмма ва ҳ.к) ва номи ёзилади.
Битирув малакавий ишнинг ҳар бир саҳифаси А4 (210х297) форматли оқ варақнинг бир томонига, чап томондан - 3 см, ўнг томондан - 1 см, юқоридан - 2 см, пастдан -2,5см. оралиқ ўлчам ташланган ҳолда ёзилиши лозим.
Адабиётлар ва манбалар рўйхатини тузишда қуйидаги тартибга риоя қилиш зарур:
биринчи меъёрий ҳужжатлар йиллар бўйича кетма-кетликда берилади ва унда олдин ЎзР Қонунлари, кейин ЎзР Президентининг Фармон ва қарорлари, ундан кейин ЎзР. Вазирлар Маҳкамасининг Қарор ва фармойишлари, охирида ЎзР Вазирликлари ва Қўмиталарининг Қарорлари ва низомлари келтирилади;
Ўзбекистон Республикаси Президентининг асарлари ва маърузалари келтирилади;
мавзуга тегишли илмий-услубий ва назарий манбалар келтирилади;
мавзуга тегишли диссертация ва авторефератлар келтирилади;
журналлардаги илмий мақолалар келтирилади;
илмий ишлар тўпламлари ва конференция материаллари тезислар келтирилади;
ЎзР расмий идоралари томонидан чоп қилинган статистик тўпламлар ва таҳлилий материаллар келтирилади;
халқаро ташкилотлар ва хорижий мамлакатларнинг расмий идоралари томонидан чоп қилинган статистик тўпламлар ва таҳлилий материаллар келтирилади;
битирув малакавий ишда хорижий тиллардаги илмий манбалардан фойдаланилса, уларни чет тиллардаги адабиётлар банди сифатида ажратиб, давлат тилида келтирилган адабиётлардан кейин тиллар бўйича келтириш мумкин. Масалан: а) рус тилидаги манбалар:б) инглиз тилидаги манбалар ва ҳоказо шаклида.
китоблар, яъни илмий-услубий ва пазарий манбалар хамда статистик ва таҳлилий материаллар келтирилганда куйидаги тартибга амал қилиш зарур: муаллифнинг фамилияси (тўлиқ). исми-шарифи (бош харфлари), нуқта белгиси, китобнинг номи, нукта, тире, чоп қилинган шаҳар, икки нуқта, нашриёт номи, вергул, нашр қилинган йил, нуқта, тире, китобнинг “Ихтибос ёки ҳавола” келтирилган бети. Масалан, Мирзиёев Ш.М. Танқидий тахлил. - Тошкент: Ўзбекситон. 2017. -Б.30-31.
журнал ва тўпламлар адабиётлар манбаси сифатида келтирилганда куйидаги тартибга амал қилиш зарур: мақола муаллифининг фамилияси (тўлиқ), исми-шарифи (бош харфлари), нуқта белгиси, мақоланинг тўлиқ номи, параллел ишораси, журнал, тўплам номи қўштирноқсиз ҳолда, нуқта, чоп қилинган шаҳар, икки нуқта, нашриёт ёки ташкилот номи, нуқта, нашр қилинган йил, нуқта, тире, жилд сони, нуқта, тире, мақола ёки тезис босилган бетлар;
битирув малакавий иш ёзиш жараёнида фойдаланилган адабиётнинг муаллифи уч ва ундан ортиқ бўлса, бошдаги иккита муаллиф юқорида келтирилган талаб бўйича расмийлаштирилиб, қолганлари учун “ва бошқалар” деб ёзилади:
БМИ да фойдаланилган адабиётларнинг номи таржима қилинмайди ва ёзув имлоси ўзгартирилмайди, яъни лотин имлосидаги манбалар лотин имлосида берилиши зарур.