Bohodir eshov o’zbekiston davlatchiligi va boshqaruvi tarixi

Xonlikdagi diniy hamda qozixona unvonlari. Xivada davlatni boshqarish bo’yicha islom dini mafkuraviy asosni tashkil etgan. Qonunlar shariat tartib va yo’riqlari asosida amal qilgan. SHayx ul-islom – xonlikdagi eng yuqori martabali kishi edi. U diniy marosimlarning aniq bajarilishi ustidan nazorat qilgan. Marosimlar paytida shayx ul-islom xonning o’ng tomonida o’tirish huquqiga ega bo’lgan.

Qozi ul-quzot (qozi kalon) – musulmon huquqi va qonunlar bajarilishini shariat asosida nazorat qilgan. Qozi kalon poytaxtda o’z devoni va mahkamasiga ega bo’lgan. Viloyat markazlarida ham viloyat qozisi bo’lgan. Ular mahkamalarining nomi Dor ul-qazo deb atalgan. Lashkarlardagi qonun-qoidalar ketidan qozii askar (askar qozisi) nazorat qilib, shahriy masalalarni hal etib turgan.

Mufti – qozilarning huquqshunoslari hisoblangan. Ular biror ish ko’rilayotgan paytda ishtirok etishlari, hukmona tuzishlari va hukmlarning to’g’riligini tasdiqlash uchun hujjatlarga muhrlarini bosishlari lozim edi. Xivada bosh mufti yettita bo’lib, barcha muftilarning xon yonida o’rni bor edi. Lashkarda o’zining mufti lashkari xizmat qilgan.

Ahlam – muftilarning boshlig’i hisiblangan. Uning vazifasi fatvolarda keltiriladigan shariat rivoyatlarini tekshirishdan iborat bo’lib, ayrim rivoyatlarning asl nusxasiga mosligini aniqlagach, ahlam unga o’z muhrini bosgan.

Raislar – shariat tartib-qoidalari, diniy marosimlar – ro’za, besh vaqt namoz, tahorat, xayri-ehson ishlarining aniq bajarilishi ustidan nazorat qilgan. Ota-analar bolalarini o’z vaqtida maktabga yuborishi, bozorlarda sotuvchilar xaridorlarni aldamasligi tarozilarni tekshirib turish ham raisning vazifasi bo’lgan. Har bir shahar va katta qishloqning o’z raisi bo’lib, qozi kalon taqdimiga muvofiq xon tomonidan tayinlangan.

Mutavalli – diniy muassasalarda xayr-ehson mablag’lari va xo’jalik ishlari bilan shug’ullanuvchi xo’jalik noziri. Mutavallining vazifasi vaqf mulki, undan foydalanish va keladigan daromadni nazorat qilish, uni taqsimlash, ijaraga berish, oxun va mudarrislarga maosh to’lash kabilardan iborat edi.