Бош илмий-методик марказ ўзбекистон республикаси

POLY – Polymer Technology (Полимерлар технологияси) – 6 кредит
Пререквизитлар: INCH1,2; ORCH3
Мономерлар ва уларнинг оралиқ маҳсулотларини ишлаб чиқариш технологик жараёнлари, турли синфдаги полимерларни олишнинг технологик жараёнларини татбиқ этиш, полимер ишлаб чиқариш ва уларни қўллаш соҳалари, полимерларни қайта ишлаш технологиялари ҳақида таянч билимлар беради. Дастур қуйидагиларни қамраб олади: полимерлар фанининг асосий тушунчалари ва номенклатураси, молекула массасини аниқлаш методлари; занжирли, радикал ва ион полимерланиш; сополимерланиш, полимерланишнинг техник усуллари; поликонденсатланиш, полибоғланиш; макромолекула реакциялари; полимерларнинг физик ҳолатлари, шишаланиш ва парчаланиш температураси; полиэтилен ва полипропилен ишлаб чиқариш технологияси; полимер пленка ва қувурлар ишлаб чиқариш технологияси; стиролнинг полимерлари ва сополимерлари; галоген сақловчи тўйинмаган углеводородлар асосидаги полимерлар; поливинилацетат, поливинил спирти, полиацеталлар, полиамидлар; акрилатлар, бўёқ, елим ва тола ишлаб чиқаришнинг техник усуллари; табиий ва синтетик каучуклар; резина-техника буюмлари технологияси.
Фаннинг ўқув-услубий мажмуаси. Кредит таълим тизими ўқитувчиларнинг ишини сезиларли даражада ўзгартириб юборади, улар ўз олдига доим ўзини ўзи такомиллаштириш ва ўз билимини ошириш, ўқув жараёнининг янги ўқув-услубий таъминотини яратиш заруриятини қўйишади. Бунда энг аввало аудиторияда фойдаланиладиган материаллар мазмунига жиддий эътиборни қаратган ҳолда талабаларнинг мустақил иши янада сифатли ва аҳамиятли бўлиши таъминланади. Талабаларнинг билиш фаолиятини, айниқса аудитория машғулотларини ташкил қилиш ва уларни бошқариш комплекс услубий ва дидактик ишланмалар бўлишини назарда тутади.
Кредит таълим тизимида талабаларнинг қизиқишларини тўлиқ ҳисобга олиш, уларнинг таълимга бўлган қизиқишини таъминлаш, ўқитувчилар ўртасида рақобат муҳитини яратиш, турли таълим усулларини такомиллаштириш ва қўллашни, шу жумладан ўқув-услубий таъминот сифатини яхшилашни ҳам назарда тутади. Кредит таълим тизими ҳар бир фан бўйича янги авлод дарсликлари ва ўқув-услубий мажмуаларни яратиш ва жорий қилишни назарда тутади.
Фаннинг ўқув-услубий мажмуаси (ЎУМ) мавжуд анъанага кўра ўқув-ижодий жараёнларнинг ташкилий-услубий таъминотининг асоси ҳисобланади. Шунга мувофиқ, фанларнинг ЎУМ ни яратиш, синовдан ўтказиш, такомиллаштириш масалаларига педагогик изланишларда муҳим эътибор қаратилади. Фанларнинг ЎУМ узлуксиз таълимнинг барча бўғин ва тармоқларида ахборот муҳитини мустаҳкамлаш ва ривожлантириш ва ресурс билан таъминлашнинг муҳим омили саналади.
Фанларнинг ЎУМ олий таълим ДТС ва МТ, йўналиш ва мутахассисликларнинг намунавий ва ишчи ўқув режалари мазмунига мувофиқ ишлаб чиқилади ва фанларнинг асосий мазмунини ўзида акс эттиради. Буларнинг ҳаммаси талабаларнинг фанларни ва ўз ўқув траекториясини танлашини енгиллаштиришга қаратилган.
Фанларнинг ўқув-услубий мажмуаси қуйидаги вазифаларни ҳал қилишга йўналтирилган:
• аниқ мутахассисликнинг таълим дастурида ўқув фанининг ўрни ва ролини кўрсатиш;
• таълим дастурида фанлараро мантиқий боғлиқликларни амалга ошириш;
• ўқув вақтини мавзулар ва ўқув машғулотлари турлари бўйича тақсимлаш;
• талабаларнинг аудиториядаги ва аудиториядан ташқаридаги мустақил ишини ташкил қилиш;
• талабаларнинг билим олиш ва ижодий фаолиятини фаоллаштириш;
• ўқув ва изланиш жараёнларининг ўзаро боғлиқлигини таъминлаш.
Одатда, фаннинг ЎУМ намунавий дастур, ишчи ўқув дастури, глоссарий, қисқа маъруза матнлари, услубий материаллар, талабаларнинг мустақил ишлаши учун ўқув-амалий материаллар, назорат-ўлчов материаллари ва зарур адабиётлар рўйхатидан иборат бўлади.
Фаннинг ЎУМ кафедра мажлисида ва ўқув-услубий комиссия томонидан муҳокама қилинади.
Қуйида фаннинг ЎУМ нинг намунавий тузилмаси келтирилган.
1-бўлим. Наманавий дастур.
2-бўлим. Ишчи ўқув дастури (Syllabus).
3-бўлим. Глоссарий.
4-бўлим. Маъруза матни (мавзу номи, мақсади, калит сўзлар, асосий масалалар (режа) ва уларнинг қисқа мазмуни, мазмунни ифодаловчи схемалар, формулалар, жадваллар, диаграммалар ва ҳ.к., назорат саволлари, тавсия қилинадиган адабиётлар).
5-бўлим. Амалий ва лаборатория машғулотлари учун услубий кўрсатмалар:
- амалий машғулотлар бўйича: амалий машғулот мавзуси, мақсади, асосий масалалар, услубий тавсиялар, амалий топшириқлар, адабиётлар, иловалар (тарқатма материаллар).
- лаборатория машғулоти бўйича: лаборатория иши мавзуси, мақсади, қўлланиладиган жиҳозлар ва материаллар рўйхати, назарий материал (зарур назарий тушунчалар ва қурилманинг конструкцияси), хавфсизлик қоидалари, ишни бажариш тартиби, ҳисобот шакллари, назорат саволлари, адабиётлар).
6-бўлим. ТМИ бўйича топшириқлар (топшириқ мавзуси, мақсади, йўриқнома (ёки водкаст), кўп сўраладиган саволлар (FAQ), топшириқ андозаси, тарқатма материаллар).
Кредит таълим тизими ТМИ ни янада юқори сифатда ташкил қилишни ва назорат қилишни талаб қилади. ТМИ реферат, кейс, кроссворд, масала ишлаш, машқ қилиш каби уй топшириқларини бажаришни ўз ичига олади. ТМИ нинг самарадорлиги унинг услубий таъминланганлигига, интернет ресурсларига ва ҳ.к. ларга кўпроқ боғлиқ.
7-бўлим. Ўқитувчи раҳбарлигидаги талабанинг мустақил ишлари (ЎРТМИ - Office hours). Бу аудиторияда ўтказиладиган кредит таълим тизимидаги ўқув ишлари шаклларидан бири саналади. ЎРТМИ иккита –маслаҳат ва назорат вазифаларини бажаради. ЎРТМИ бу талаба ва ўқитувчининг биргаликдаги иши ҳисобланади, чунки бу машғулотлар диалог режимида, масалан, тренинг, баҳс-мунозара, иш ва дидактик ўйинлари, тақдимот, кейс тузиш, шахсий ёки гуруҳ лойиҳаларини ишлаб чиқиш ва шу каби шаклларда олиб борилади.
Ҳар бир ЎРТМИ учун муайян масалаларни аниқлаштиришга, уларни кенгайтиришга, у ёки бу вазиятларни таҳлил қилиш кўникмаларини ҳосил қилишга, масала ишлашга ёрдам берадиган материаллар тайёрлаб қўйилиши зарур (кейслар, ролли ўйинлар, тестлар, кроссвордлар ва ҳ.к.).
ЎРТМИ нинг анъанавий турлари – ҳисоб-чизма ишлари, курс иши, курс лойиҳаси, ўқув кейсларидир. Бу ишлар мукаммал услубий таъминотга эга бўлиши ва касбий фаолият ҳамда ҳаётий вазиятлар билан боғланган бўлиши зарур.
ЎРТМИ қуйидаги вазифаларни бажаради:
Маслаҳат вазифаси:
• ҳар бир фан бўйича талабаларнинг мустақил ишларига ёрдам бериш;
• талабага дастурий материални ўзлаштириб олиши учун иш усулларини танлашга ёрдам бериш;
• талаба учун мураккаб бўлган мавзунинг баёнини қайта эшитиш, ўқув материалини мустаҳкамлаш учун амалий топшириқларни бажариш имкониятини яратиш;
• ўқув материалини чуқур ўзлаштиришга ёрдам бериш;
• илмий соҳада талабанинг мустақил ишига ёрдам бериш.
ЎРТМИ нинг назорат вазифаси оралиқ ва якуний назорат мобайнида талабаларни ўқишга қизиқтириш мақсадида амалга оширилади. ЎРТМИ ни бажариш давомида талаба назорат ишларини бажариш учун топшириқлар олади, тьютор билан маслаҳатлашади ва баҳо олади (жорий назоратда).
Таълим жараёнини ташкил қилишнинг муҳим масалаларидан бири талабаларнинг ўзлаштиришини доим мониторинг қилишдир.
ЎРТМИ режаси қуйидаги тузилишга эга бўлади:
• топшириқ мавзуси;
• мақсади;
• ўтказилиш тартиби;
• топшириқ ва саволлар;
• услубий тавсиялар, тарқатма материаллар;
• адабиётлар.
8-бўлим. Назорат-ўлчов воситалари. Буларга мавзулар бўйича назорат саволлари, тестлар, ўргатувчи тестлар, синов ва имтиҳон саволлари, кириш саволлари, комплекс имтиҳон саволлари киради.
Ишчи ўқув дастури (Syllabus) – ўқув дастурининг баёни тақдим қилинган асосий ўқув-услубий ҳужжатдир. Фаннинг силлабуси талабага ҳар семестр бошида берилади. Силлабус фаннинг батафсил ишланмаси ҳисобланиб фан ўқитувчиси томонидан ишлаб чиқилади. Силлабус аниқ тузилишга эга бўлади, унда қуйидаги маълумотлар кўрсатилади:
Умумий маълумотлар:
• олий ўқув юрти номи;
• кафедра номи;
• тасдиқлаш белгиси;
• дастур номи;
• фан коди ва номи;
• кредит миқдори;
• семестр;
• вақти;
• ўқитувчи(лар) ҳақида маълумотлар;
• мулоқот манзили;
• интизомий талаблар – аудиторияда ўзини тутиш, ишни муддатида топшириши, имтиҳонга келмаслик, дарс қолдириш.
Дастур:
1) Кириш:
• фаннинг аҳамияти;
• фаннинг мақсади ва вазифалари;
• таълим натижалари;
• пререквизитлар;
• постреквизитлар;
2) Фан модуллари (машғулотлар, тақдимотлар, тарқатма материаллар ва шу кабиларни ўзида акс эттиради) – ақлий фаолиятни рағбатлантириш, баҳс-мунозара, кичик гуруҳларда ишлаш, кейс-стади, презентация, иш ўйини, машқлар (мантиқий масалалар), вазиятли масалалар, анжуман, қисқа маъруза, ҳамкорликдаги интервью, хатоларни топиш каби интерфаол усулларга алоҳида эътибор берилиши керак;
• тақвимий-мавзули режалар;
• график органайзерлар;
• интерфаол ўқитиш усуллари;
• мустақил таълим шакллари;
• баҳолар тўғрисида ахборот (grades), ҳар бир баҳо учун талаб этиладиган ишлар баёни, баҳоларни аниқлаш сиёсати (билимларни баҳолаш шкалалари, талабаларнинг билимларини баҳолаш мезонлари, иш турлари рўйхати, уларни бажариш бўйича талаблар, имтиҳон баҳоларини қўйиш мезонлари, апелляция қоидалари).
• асосий адабиётлар;
• қўшимча адабиётлар (қўшимча ўқув адабиётлари рўйхати, меъёрий-ҳуқуқий база, даврий нашрлар, интернет манбалари);
• маъруза ва семинар жадваллари (куни, соати, ҳар бир машғулотнинг мавзулари, тақвимий-мавзули режа, маъруза ва семинар машғулотлари режаси ва мустақил ўрганиш учун назорат саволлари, асосий адабиётлар).