Finans hám finanslıq munasábetlerdiń xarakterli belgileri

101. Mámleket byudjetiniń orınlanıwı haqqındaǵı esabattıń kórip shıǵilıwı hám tastıyıqlanıwı.
Mámleketlik byudjettiń orınlanıwı haqqındaģı esabat byudjet orınlanıwınıń juwmaģın ózinde sáwlelendiredi. Sol menen birge Respublika byudjetinen ajıratılatuģın byudjet qarjıların alıwshılar byudjetten ajıratılatuģın qarjılardan esabat dáwirinde paydalanģanlıq xaqqındaģı esabatlardı Ózbekistan Respublikası Finans ministrligine, sol ministrlik belgilegen múddetlerde usınıs etiwi kerek. Sonday-aq, Qaraqalpaqstan Respublikası byudjetinen hámde jergilikli byudjetlerden finanslastırılatuģın byudjet qarjıların alıwshılar byudjetten ajıratılatuģın qarjılardan esabat dáwirinde paydalanģanlıq haqqındaģı esabatlardı tiyisli finans organlarına Ózbekistan Respublikası Finans ministrligi tárepinen belgilengen múddetlerde usınıs etiwi lazım.Rayonlardıń, sonday-aq respublika (Qaraqalpaqstan), wálayat boysınıwındaģı qalalardıń finans organları qala, rayon byudjetiniń esabat dáwirindegi orınlanıwı haqqındaģı esabatlardı tiyisli xákimliklerge hámde joqarı finans organlarına, Ózbekistan Respublikası Finans ministrligi belgilegen múddetlerde usınıs etiwi kerek.
Qaraqalpaqstan Respublikası Finans ministrligi, wálayatlar hám Toshkent qalası finans organları tiyisli byudjetlerdiń esabat dáwirindegi orınlanıwı haqqındaģı esabatlardı tiyisli ráwishte Qaraqalpaqstan Respublikası Ministrler Keńesine hám tiyisli hákimliklerge, sonday-aq, Ózbekistan Respublikası Finans ministrligine, sol minicrlik belgilegen múddetlerde usınıs etiwi lazım.
Qaraqalpaqstan Respublikası Ministrler Keńesi, wálayatlar, Toshkent qalası, rayonlar hám qalalar hákimleri byudjetlerdiń orınlanıwı haqqındaģı esabatlardı kórip shıģıp, maqullanģannan keyin bul esabatlardı tiyisli ráwishte Qaraqalpaqstan Respublikası Joqarģı Keńesi hám tiyisli jergilikli hákimiyat wákillik organlarına nızam hújjetlerinde belgilengen múddetlerde usınıs etedi.
Ózbekistan Respublikası Mámleket salıq komiteti, Mámleket bajıxana komiteti salıqlar, jıyımlar, bajılar hám basqa májbúriy tólemlerdiń Mámleketlik byudjetke esabat dáwirindegi túsimleri haqqındaģı esabattı hár ayda Ózbekistan Respublikası Finans ministrligine, nızam xújjetlerinde belgilengen múddetlerde usınıs etiwi shárt.
Mámleketlik salıq xızmetiniń orınlardaģı salıq organları salıqlar, jıyınlar, bajılar hám basqa májbúriy tólemlerdiń mámleket byudjetine esabat dáwirindegi túsimleri haqqındaģı esabattı hár ayda tiyisli finans organlarına, nızam hújjetlerinde belgilengen múddetlerde usınıs etip turıwı kerek. Mámleketlik maqsetli jamģarmalardı bólistiriwshi organlar esabat dáwirinde mámleketlik maqsetli jamģarmalarına qarjılar túsimi hám olardan paydalanıw haqqındaģı esabatlardı Ózbekistan Respublikası Finans ministrligine, sol ministrlik belgilegen múddetlerde usınıs etiwi lazım. Ózbekistan Respublikası Finans ministrligi Mámleketlik byudjettiń ornılanıwı haqqındaģı esabattı Ózbekistan Respublikası Ministrler Kabinetine esabat jılınan keyingi jıldıń 1 may ayınan keshiktirmey usınıs etiwi kerek. Óz náwbetinde Ózbekistan Respublikası Ministrler Kabineti Mámleketlik byudjettiń ornılanıwı xaqqındaģı esabattı Ózbekistan Respublikası Oliy Majlisine esabat jılınan keyingi jıldıń 15 may ayınan keshiktirmey usınıs etiwi kerek.
Mámleketlik byudjettiń ornılanıwı haqqındaģı esabat Ózbekistan Respublikası Oliy Majlisi tárepinen kórip shıģıladı hám tastıyıqlanadı. Sonday-aq, Qaraqalpaqstan Respublikası byudjeti hám jergilikli byudjetler orınlanıwı haqkındaģı esabatlar Qaraqalpaqstan Joqarģı Keńesi hám tiyisli jergilikli hákimiyat wákillik organları tárepinen kórip shıģıladı hám tastıyıqlanadı.