Foydali hasharotlar

Xonqizilar oilasi. Bu oila vakillarining yer yuzida 4200 turi, O‘zbekistonda 106 turi tarqalgan. Shundan 80 ga yaqini foydali hasharotlar hisoblanadi. Qo‘ng‘izlarining tanasi yarim shar shaklida bo‘ladi. Tuxumlari sariq rangda, uzunchoq shaklli. Xonqizining urg‘ochisi tuxumlarini o‘simlik bitlari to‘dasiga qo‘yadi. Tuxumdan chiqqan lichinkalar o‘simlik bitlari bilan yirtqichlik qilib oziqlanadi. Lichinkasi oziqlanib bo‘lgandan so‘ng, tanasini keyingi qismi bilan o‘simlik sirtiga yopishib g‘umbakka aylanadi. G‘umbakdan voyaga yetgan qo‘ng‘izilar chiqadi va 10-12 kun o‘simlik bitlari bilan qo‘shimcha oziqlanadi. Keyin juftlashib tuxum qo‘ya boshlaydi. Bitta urg‘ochisi 250 tadan 2900 tagacha tuxum qo‘yishi mumkin. Xonqizilar tog‘da voyaga yetgan hasharot (qo‘ng‘iz) bosqichida qishlaydi. Xonqizilarning yetti nuqtali xonqizi, nuqtali stetorus va o‘zgaruvchan xonqizi kabi turlari nihoyatda foydali hisoblanadi.