Gazlerdi tazalaw

Gazlerdi gewekli tosıqlarda tazalaw

Filtrlewshi tosıq túrine qaray iyiliwsheń, yarım qattı, qattı gewek tosıqlı hám danesheli qatlamlı filtrler boladı.

Jumsaq filtrlewshi tosıqlı filtrlerge jeńli yamasa qaplı filtrler kiredi hám olar gazlerdi tazalaw ushın keń kólemde qollanıladı. Filtrlewshi tosıq sıpatında tábiyǵıy sintetikalıq hám mineral, talshıqlar (toqıma materiallar), gewek listlı materiallar (gewekli rezina, penopoliuretan) hám metal toqıma talshıqlar qollanıladı.
Batareyalı jeńl filtr. Bul túrdegi qurılmalardıń filtrlewsh elementi toqıma materialdan tayarlanadı (3.32-súwret). Filtrlewshi jeń 4 hám qaplar tórtmúyeshli formadaǵı qabıq 3 tiń ulıwma romı 1 ge ildirip qoyıladı. Tómennen joqarıǵa qarap háreket etip atırǵan shańlı gaz filtrlewshi jeńlerdiń ushındaǵı ashıq tesiktiń ishine kiredi. Soń cilindr jeńleriniń qaptal tárepi júzesinen ótip atırǵanda gaz tazalanıp shıǵıp ketedi, qattı bóleksheler bolsa jeńniń ishki diywalına uslanıp qaladı.
Paydalanıw processinde shań qatlamı kóbeyip baradı hám filtrdıń qarsılıǵı úlkeyedi. Filtr jeńlerin qayta tiklew ushın waqtı – waqtı menen mexanizm 2 járdeminde silkip turıw kerek. Sonda, jeńler júzesinde otırıp qalǵan shańlar tógiledi hám shnek 5 járdeminde sırtqa shıǵarıladı. Bazı bir jaǵdaylarda jeńlerdi qayta tiklew ushın filtr elemementler qısılǵan hawa yamasa gaz járdeminde qarama –qarsı baǵıtta úplep tazalanadı. Bazı jaǵdaylarda sekciyalı filtrler de qollanıladı. Onda hár sekciya óziniń silkiwshı mexanizmine iye boladı. Bul bolsa, filtr sekciyalardı izbe – iz tazalaw imkániyatın beredi, yaǵnıy filtr qurılmanı toqtamastan filtr elementlerin qayta tiklew processin ámelge asırıwǵa boladı.
Úzliksiz isleytuǵın jeńli filtrlerdiń filtrlew tezligi 0,007...0,017m³/(m^2.s) qa teń. Biraq, filtrlewshi toqımalar úzliksiz ráwishte qayta tikleniwi arqalı filtrlew tezligi 0,05...0,08 m³/(m^2.s) ge shekem artadı.
Eń keń tarqalǵan jeńil filtrlerdiń gidravlikalıq qarsılıǵı 1,5...2,5 kN/m² (150...250 mm. suw.baǵ.).
Eger jeńli filtrlerden tuwrı paydalanılsa, gazlerdi jumsaq, dispers shańlardan tazalaw dárejesi 98....99% ti payda etedi.
Jeńler tábiyǵıy, sintetikalıq hám mineral materiallardan tayarlanadı. Máselen, 80°C dan pás temperaturalarda paxta, bózden, 110°С dan tómen temperaturalarda júnnen, 130... 140°С da poliamid, polietilen, poliakrilnitril talshıqlarınan, 275°С ǵa shekem politetraftoretilen hám ftoroplasttan, 400°С ǵa shekem shiyshe talshıqlar ınan tayarlanǵan filtrlewshi jeńler qollanıladı.
Kemshilikleri: jeńler tez isten shıǵadı hám kanalları tolıp qaladı; joqarı temperaturalı hám ızǵar gazlerdi tazalaw múmkin emes.