Гоҳо раҳм-шафқатни ҳам меъёридан ошириб юборамиз

Турсуной Содиқованинг “МУРАББИЙ КИМ?..”
(эсселар) Тошкент-2006 й. 28 бет
Бир куни ўзини ўта “зийрак” билувчи бир муаллим Америка очгандай илжайди-да:

• 
  Фалончи қизга бир йигитдан ғалати хат келибди, ўқиб берайми? – деди.
  

Бошқа бир ўқитувчи эса:
- Нима учун зўрға “уч”га тортади десам, ишлар ошиқ-маъшуқлик экан-да! Ярамаснинг ота-онасини чақиртиринг, хатни кўрсатинг. Бугун хат ёзса, эртага етаклашиб кетади, - дея ҳукм ўқиди!
Юрагим зирқираб кетди. Ўқитувчиларми булар ё қотилларми?! Агар айтган ишларини қилсалар, боланинг юраги нима бўлади? Уларнинг қўлидаги мушук эмас, одам боласи-ку! Мушукни ҳам ирғитиб ўйнамайдилар ахир!
Бола – бугун бола. Эртага улғаяди. Ҳалиги муаллимлар шуларнинг орасида яшайди. Айтинг-чи, энди унинг қандай обрўси бўлсин? Бу қисматни-ку ўзи сотиб олди, аммо ундан болаларга етган зиённи қандай қоплаб бўлади!

Турсуной Содиқованинг “МУРАББИЙ КИМ?..”
(эсселар) Тошкент-2006 й. 29 бет

“Алдагани бола яхши” нақлини дастур билиб, ўқув масканларининг баданига ёпишиб олган ўз каналари, зараркунандалари бўлади. Улар ҳам икки қадамнинг бирида учрайди. Аксарияти илигида иллати бор одамлар. Очиқ муттаҳамлик ўтмайдиган жойда ёзишга тушадилар. Бундайлар бор жойда раҳбар бўлиш ҳам, ёнма-ён ишлаш ҳам осон эмас. Қани, бу “ёзғувчи”нинг ишидан айб топиб кўрсинлар-чи, дарс соатини озроқ ажратсинлар-чи! Унинг хатлари сабаб, мактабни неча бор бемаҳал текширувчилар босгани босган. Бир куни шундайлардан бири директорга шанғиллаб кетди:

- Ҳали мен дарсимни эвлолмай қолдимми?! Бева хотиннинг ойлигини камайтиришни кўрсатиб қўяман сенга! Шундай қиламанки, қочгани тешик тополмай қоласан!
Ўзи уддалаб дарс ўтолмайди. Ўқитувчиларнинг дами ичида, хатосини айтсангиз, кўча демайди, ўқувчиларнинг ораси демайди, жами хунук атамаларни бўйнингизга илиб ташлайди, шапи қолмаса, беҳуш бўлиб ётволади!... Аммо у ҳаммадан кўра хотиржам яшайди. Чунки мактабнинг “норасмий хўжайини”! Ҳеч ким мушугини “пишт” дея олмайди. Қуроли – андишасизлик! Ахир кўра-била туриб, болаларни унинг қўлига топшириш шайтонни имом сайлашдай гап-ку!