Guliston davlat universiteti tarix kafedrasi eng yangi tarix

2-asosiy savolning bayoni:
1922-1929 yillarda AQShda vaqtincha, qisman stabillashuv yillari bo’ldi. AQShdagi stabillashuv Evropa mamlakatlaridagi stabillashuvdan ilgariroq (1922 yil oxirida) boshlandi, hamda Angliya, Frantsiya, Germaniya, Italiya va Yaponiyadan oldinda bordi. 1923-1929 yillarda AQShdagi sanoat mahsulotining umumiy hajmi 20% oshdi, yollanma ishchilar soni esa 7,6% kamaydi. 1926-1929 yillarda AQSh sanoat mahsuloti yuqoridagi 5 ta mamlakat mahsulotidan 9% ortiq bo’ldi. 1928-1929 yillarda AQSh iqtisodiyotining juda yuksalgan yillari bo’ldi. Stabillashuv yillarida kapital tez kontsentratsiyalashdi va markazlashdi. Juda ko’p sanoat korxonalari birlashtirildi minglab kichik va o’rta korxonalar tugatildi. Qishloq xo’jaligida ham yirik fermer-kapitalistlar xo’jaligi mayda fermerlarning xonavayron bo’lishi hisobiga kengaydi. O’sish yangi texnikaviy asosda, eng yangi texnika uskunalari, konveyer tizimi, standartlashtirish, modernlashtirish usullarini keng tadbiq etish yo’li bilan amalga oshirildi. Ishlab chiqarishda yangi fan va texnika kashfiyotlari, seriyali ishlab chiqarish usuli keng qo’llanila boshlandi. Ishlab chiqarishda aql bovar qilmas o’sish ro’y berdi. 1927 yilga kelib AQShda yiliga 7 mln. avtomobil ishlab chiqarilardi. Avtomobilsozlikning o’sishi keng shosse yo’llarining barpo etilishiga turtki bo’ldi, shahar va qishloq qurilishining rivojlanishiga ta’sir ko’rsatdi. Ishlab chiqarishning o’sishi Amerika monopoliyalariga ulkan daromadlar keltirib, ularning raqobatbardoshligini oshirdi.
Iqtisodiyotdagi jadal o’sish o’z qo’llarida katta iqtisodiy va siyosiy hokimiyatni jamlagan ulkan ishlab chiqarish va moliya birlashmalarining tashkil topishiga olib keldi. Avtomobilsozlikda uch yirik kompaniya - «Ford», «Jeneral Motors» va «Kraysler» butun avtomobil sanoatini o’ziga buysundirdi. Kimyo sanoatida «Dyupon» firmasi, po’lat qo’yish sanoatida «Po’lat tresti» hukmronlik qildi. Banklarning hukmronligi ayniqsa beqiyos bo’ldi. Morgan va Rokfeller nazorati ostidagi olti yirik bank mamlakatdagi jami sarmoyaning yarmidan ortig’ini nazorat qildi. Amerikaning barcha yirik moliya va sanoat kompaniyalari birgalikda mamlakat ichki va tashqi siyosatini, Amerikadagi butun siyosiy tizimni nazorat qildilar. Ular Amerika davlat siyosatining shakllanishiga hal qiluvchi ta’sir ko’rsatdilar.
20-yillarda mamlakat siyosiy hayotida yangi sharoitga moslashishga erishgan Respublikachilar partiyasi muhim rol o’ynadi. 1920 yildagi prezidentlikka saylovlarda Demokratlar partiyasi mag’lubiyatga uchradi va Oq uyni respublikachilar egalladilar. Ular Oq uy va Kongressda 1932 yilgacha hukmronlik qildilar. Bu davrda prezidentlik kursida U.Garding (1921-1923), K.Kulij (1923-1924 va 1925-1929) va G.Guver (1929-1932) o’tirdi. Bu davr Amerika iqtisodiyotining gullab-yashnash (prosperiti) davri bo’ldi. Unga U.Garding asos soldi. 1922 yilda u qo’shimcha foyda solig’ini, narx-navo ustidan nazoratni bekor qildi va kompaniyalarga ishchilar bilan munosabatlarda to’liq erkinlik berdi.
U.Garding ishini davom ettirgan K.Kulij 1925 yilda: «Amerikaning ishi – tijorat», deb e’lon qildi. Bu jumla Amerika hukmron doiralarining bosh tamoyiliga aylandi. Amerika iqtisodtchilari AQShning stabillashuvini, mamlakatning gullab yashnashi deb atadilar, Amerika kapitalizmini «alohida kapitalizm» deb maqtadilar, endi inqirozlar bo’lmaydi deb jar soldilar. 1925 yili Deyton shahrida yosh biologiya o’qituvchisi Jon Skops maktabda darvin evolyutsiya ta’limotini o’qitganligi uchun qamoqqa olinib sud qilindi. bu sud «maymun sudi» degan hajviy nomni oldi Xukumat ishchilar harakatini bo’g’ish uchun hamma choralarni ko’rdi. Fabrika kassirini o’ldirishdi nohaq ayblangan Italiyalik inqilobchi ishchilardan Sakko va Vantsetti turmada 7 yillik qamoqdan keyin, 1927 yili sud qilindi. Tuxmatlarni ochib tashlagan 100 dan ortiq guvohlarning so’zlarini azar e’tiborga olishmadi. Sudning adolatsiz hukmiga binoan, 1927 yil 23 avgustda Sakko va Vantsetti elektr toki o’tkazilgan stolda azoblab o’ldirildi. Kulij hukumati jahon miqyosida agressiv siyosatini kuchaytirib yubordi. Amerika burjuaziyasi jahonda hukmronlik qilish uchun kurashning niqoblangan izolyatsionistik metodidan foydalanishini davom ettirdi. 1924 yilda Amerikalik bankir Charliz Daues tashabbusi bilan Germaniyadan olinadigan reparatsiya bahonasi bilan «Daues rejasi» degan maxsus reja tuzildi. Bundan maqsad Germaniya iqtisodiyotida AQShning moliyaviy pozitsiyasini kuchaytirish, katta foyda olish, Germaniya og’ir sanoatini rivojlantirish edi. 1924-1929 yillarda AQSh, Angliya va boshqa mamlakatlarning Germaniyaga bergan qarzlari 23 mlrd. marka miqdorida bo’lsa, shundan 70% AQSh bergan qarz edi. Shimoliy Amerika zo’ravonlari «katta tayoq» siyosatiga amal qilib, butun Amerika qit’asida hukmron bo’lib olish uchun kurashdilar. Markaziy Amerika mamlakatlariga (masalan, Gaiti, Gonduras, Kuba va boshqalarga) qarshi qurolli intrventsiya uyushtirildi. Panamadagi askarlar soni oshirildi, Panama AQShning harbiy strategik platsdormiga aylantirildi. Meksika neft boyligining 73% AQSh monopolistlari qo’liga o’tdi. 1928 yilga kelib Lotin Amerikasidagi 20 ta mamlakatdan 14 tasi AQShga qaram bo’lib qoldi. AQSh 1929 yilda Filippindagi milliy ozodlik harakatini qurol kuchi bilan yovuzlarcha bostirdi.
Amerika Qo’shma Shtatlari G’arbiy Evropadagi moliya tizimlarida ham etakchi marralarni qo’lga kiritib, bundan qit’a ustidan o’z siyosiy hukmronligini o’rnatish yo’lida foydalandi. Daues rejasi (1924) ko’magida moliya sarmoyasi G’arbiy Evropaga kiritildi va Germaniya harbiy-ishlab chiqarish qudrati hamda Germaniya militarizmining tiklanishiga ko’maklashdi. Amerika kompaniyalarida, ayniqsa Polsha katta qiziqish uyg’otdi, Amerika sarmoyasi bu erda Polsha qazilma va metallurgiya sanoatining 50%i ustidan nazorat o’rnatishga erishdi. 1928 yilgi prezident saylovlarida respublikachilar partiyasi prezidentlikka Gerbert Guver nomzodini ko’rsatdi. Guver demokratlar partiyasining nomzodi Smitga nisbatan ko’proq ovoz oldi va prezidentlikka saylandi.