Хулқи оғишган ўсмирлар учун психокоррекцион дастур тузиш

Ўзини намоён этиш даражаси талқини:
Қанча кўп жавоб вариантлари берилган бўлса, шунча ўзини намоён эта олиш ва рефлексия даражаси баланд бўлади.
Текширилувчи текширув 15 дақиқа ўртасида ё унга етмай ёзишни тўхтатган бўлса, демак унда ўзи ҳақидаги тасаввури тор ёки ўзи ҳақидаги маълумотларнинг маълум чегарасидан нариги томонига назар солгиси келмайди.
Жавоблар 8 тадан кам бўлса синалувчи ўзини очиб бергиси келмаган, ҳатто ўзи учун ҳам очиб бергиси келмаган. Шунингдек, 9 та ва ундан кам бўлган жавоб вариантларига эга инсонлар, ўзини намоён эта олиш ва рефлексия даражаси паст, ўзи ҳақидаги тасаввури кундалик турмушидаги энг муҳим ёки кўп учрайдиган одатий ҳодисаларни ўйлайдиган инсонлардир. Бундай инсонларга, ўзи ҳақидаги тасаввурини бойитиш, қизиқиш, интилиш, ҳарактер хусусиятлари ва қобилиятлари ҳақида кўпроқ ўйлаб кўриш тавсия этилади. Ўзи ҳақида ўйлашга дангасалик қилмасликни маслахат бериш ҳам мумкин, чунки айрим инсонлар ўз шахсини чуқур ўрганишга дангасалик қилган ҳолда, ўзларини ҳаётда намоён этишга, ҳатто гоҳида ўрнини ва йўлини топишга қийналишади.
10 тадан 17 тагача жавоб берган синалувчилар – улар ўртача рефлексия ва ўзини намоён эта олиш даражасига эга. Ўрта даража, ўзи ҳақида сўз кетганда, аниқ айтиши қийин, инсон ўзини қандай эканлигини биладигандек, бироқ унчалик яхши даражада эмас, ёки бўлмаса ўзи ҳақида камроқ ўйлайди. Бундай инсонларга ҳам ўзининг шахси ҳақидаги тасаввурларини ривожлантириш фойдадан ҳоли бўлмайди.
18 та ва ундан кўп берилган жавоб вариантлари эгалари, юқори рефлексия ва ўзини намоён эта олиш даражасига эга. Бу ҳолат инсонни ўзига ҳар томонлама назар солишининг, ўзи ҳақида кўп фикр юритишининг, ўзидан ўзи уялмаслигининг белгисидир. Лекин, бир хил маънога эга, синоним сўз ва гаплар борлигига эътибор бериш керак. Шу тарздаги қайтарилувчи жавоблар синалувчи ҳақида қуйидагилардан дарак бериши мумкин, жумладан синалувчи битта муаммо ёки мавзу юзасидан кўп ўйлайди ёҳуд хавотирланади. Психолог шундай қайтарилувчи муаммо ёки мавзуга эътибор бериши, шундай омилларни қидириб топиши керак, бу синалувчи билан ишлаш, уни ривожлантириш учун фойдадан ҳоли бўлмайди.
22 тадан ортиқ жавоб берган синалувчилар буни мусобақа деб қабул қилган, ғолиб бўлиш учун иложи борича кўпроқ жавоб беришни режа қилган бўлиши ҳам мумкинлигини эътиборга олиш лозим. Бунда инсонлар ҳар қандай вазиятда ютуқ сари интилишини кўрсатади. Ўз навбатида ўзини жуда яхши билиш, рефлексия ва ўзини намоён эта олиш даражасининг юқорилиги белгиси ҳам бўлади.