I bo‘lim. Umumiy qoidalar 1-bob. Asosiy qoidalar

333-modda. Bojxona to‘lovlarini kechiktirib yoki bo‘lib-bo‘lib to‘lash imkoniyati berilganda ularning summalarini to‘lash muddatlari
Bojxona to‘lovlarini kechiktirib yoki bo‘lib-bo‘lib to‘lash imkoniyati berilganda to‘lovchi tomonidan ularning summalarini to‘lash:
kechiktirib to‘lash imkoniyati berilganda — kechiktirib to‘lash muddati tugaydigan kundan kechiktirmay;
bo‘lib-bo‘lib to‘lash imkoniyati berilganda — bojxona organi tomonidan to‘lovchi bilan birgalikda tasdiqlangan jadval bo‘yicha bo‘lib-bo‘lib to‘lanadigan summalarni kiritishning kelishib olingan kunlaridan kechiktirmay amalga oshiriladi.
Kechiktirib yoki bo‘lib-bo‘lib to‘lash imkoniyati berilgan bojxona to‘lovlarining summalari to‘lovchi tomonidan o‘z vaqtida to‘lanmagan taqdirda, bojxona organlari bojxona to‘lovlarini to‘lash bo‘yicha qarzdorlikning butun summasini ushbu Kodeksning 47 va 48-boblarida nazarda tutilgan tartibda depozit, tovarlar garovi, bank kafolati, sug‘urta polisi yoki kafillik bilan ta’minlangan pul mablag‘lari hisobidan undirib olish choralarini ko‘radi.
334-modda. Kelgusi bojxona to‘lovlarini to‘lash uchun pul mablag‘lari
To‘lovchi bojxona deklaratsiyasi qabul qilinguniga qadar kelgusi bojxona to‘lovlarini to‘lash uchun pul mablag‘larini dastlabki tarzda (bundan buyon matnda dastlabki pul mablag‘lari deb yuritiladi) bojxona organining shaxsiy g‘azna hisobvarag‘iga o‘tkazishi mumkin.
To‘lovchining ko‘rsatmasiga ko‘ra dastlabki pul mablag‘laridan:
bojxona to‘lovlarini to‘lash uchun;
penya, foizlar to‘lash majburiyatlarini bajarish hisobiga deb;
bojxona to‘lovlarini to‘lash bo‘yicha qarzdorlikni to‘lash uchun;
bojxona to‘lovlari to‘lanishini ta’minlash uchun foydalanilishi mumkin.
To‘lovchi bojxona organiga mazkur dastlabki pul mablag‘lariga bojxona to‘lovlari sifatida qarash haqida ko‘rsatma bermaguniga qadar ushbu mablag‘larga bojxona to‘lovlari sifatida qaralishi mumkin emas. To‘lovchining bojxona deklaratsiyasini topshirishi yoki dastlabki pul mablag‘laridan penya, foizlar to‘lash majburiyatlarini bajarish hisobiga deb, bojxona to‘lovlari to‘lanishini ta’minlash yoxud bojxona to‘lovlarini to‘lash bo‘yicha qarzdorlikni to‘lash uchun foydalanish haqidagi arizasini berish to‘lovchining ko‘rsatmasi hisoblanadi.