Lekciya №11. Ximiyanı oqıtıwda máselelerden paydalanıw Reje

Ximiyada máseleler sheshiwge qoyılatuǵın metodikalıq talaplar. Oqıwshılardıń másele sheshiw tájriybelerin iyelewlerinde tiykarǵı wazıypa oqıtıwshılarǵa júklenedi. Oqıwshılarda erkin xalda máseleler sheshiw kónikpelerin payda etiw de oqıtıwshınıń wazıypasına kiredi. Máseleler sheshiwge tómendegishe didaktikalıq talaplar qoyıladı:

1. 
   Másele sheshiw ushın qanday túsinik, nızam, teoriya hám faktler másele sheshiw processinde paydalanılǵanlıǵı, onda zattıń qaysı qásiyeti hám qanday ximiyalıq reakciyalardan paydalanılǵanlıǵı kórsetiledi.
   
2. 
   Másele sheshiwde qaysı usıllardan paydalanıw maqsetke muwapıqlılıǵı kórsetiledi.
   
3. 
   Másele sheshiliwde oqıwshılardıń pikirlew processleri rawajlandırılıp barıladı.
   
4. 
   Berilgen máseleler qanday didaktikalıq wazıypanı orınlawı anıqlanadı.
   

Eger oqıtıwshı óz aldına tek teoriya materialların bekkemlew maqsetin qoyǵan bolsa, bunday máseleler oqıwshılarǵa aldınan belgili bolıwı kerek. Eger oqıtıwshı óz aldına taza tiptegi máselelerdi sheshiw wazıypasın qoyǵan bolsa, oqıwshılarǵa másele sheshiw metodikasın túsindiredi. Oqıtıwshı máseleler sheshiw metodikasın túsindiriwde dáslep bir máseleni ózi sheship kórsetiwi kerek. Máseleler sheshiw sabaǵında oqıwshılardıń másele sheshiwge tiyisli bilimlerin aktivlestiriw lazım. Keyin sol másele shárti analizlenedi. Másele shártinde berilgen hám anıqlanıwı zárúr bolǵan úlkenlikler belgilenedi hám másele sheshiw algoritmi dúziledi, esaplawlardıń matematikalıq hám fizikalıq usılları ámelge asırıladı. Taza túrdegi máselelerdi sheshiw usılların úyretiwde dáslep máseleni sheshiw algoritmi anıq etip dúziledi, olardı oqıwshılar jazıp aladı hám ol másele sheshiwdiń qaysı túrine kiriwi túsindiriledi. Oqıtıwshı máseleni sheship kórsetedi, soń doskaǵa jaqsı oqıytuǵın oqıwshılardıń birin shıǵarıp, oǵan sheshilgen máselege uqsas másele sheshiwdi usınıs etedi. Soń klasstaǵı oqıwshılar soǵan uqsas máseleni sheshedi. Quramalı máselelerdi sheshiw bilimdan oqıwshılarǵa beriledi. Quramalı máselelerdi sheshiw klasstan tısqarı shınıǵıwlarda alıp barılıwı maqsetke muwapıq boladı. Cebebi sabaq processinde quramalı máselelerdi sheshiw kóp waqıt talap etedi hám sabaq rejesi orınlanbay qalıwı múmkin.