Masharipova barno erkin qizi

Kerekli úskeneler: Quwırshaq teatrı tamashası ushın shirma, quwırshaqlar, ertek qaharmanları nıqapları, muzıka asabapları, súwret sızıw ushın plakat, reńli qálem hám boyawlar,
Ámeliy shınıǵıwdıń barısı. Studentler kishi toparlarǵa ajıratıldı. Hár bir toparǵa dóretiwshilik tapsırma berildi.
1-topar tapsırması. Kishi toparda (3-4 jas ) saxnalastırıw iskerliginiń tiykarǵı wazıypaların infografika usılında kórsetiw.
2-topar tapsırması. Orta toparda (4-5 jas) teatrlastırılǵan oyınlar arqalı saxnalastırıw iskerliginiń wazıypaların kórsetiw.
3-topar tapsırması. Úlken toparda (5-6 jas) syujetli-rolli oyınlardı shólkemlestiriw.
4-topar tapsırması. Mektepke tayarlaw toparında (6 -7 jas) muzıka ásbapları járdeminde saxna kórinisin kórsetiw.
Studentlerge tayarlıq ushın 15 minut waqıt berildi.
1-topar. Kishi topar saxnalastırıw iskerliginiń tómendegi wazıypaların infografika usılında sızılma hám suwretlerde ańlatıw: saxnalastırılǵan oyınlarǵa balalarda kúshli qızıǵıwshılıq oyatıw; jaqsılıq hám jamanlıq haqqındaǵı túsiniklerdi qáliplestiriw; sóz baylıǵın asırıw; balalarda átirap-álem, zat hám hádiyse haqqındaǵı qıyalların keńeytiw; stol teatrı, barmaq teatrı hám tas teatrı sıyaqlı teatrdıń túrli baǵdarları haqqında túsiniklerdi bekkemlew; dáslepki aktyorlıq sheberligin kórsete alıw kónlikpelerin tárbiyalaw; haywanlar dawısına eliklew; olardı sózli-didaktikalıq hám syujetli oyınlarda atqarıw.
2-topar. Studentler “Ǵazlar hám qasqır” oyının shólkemlestiredi. Oyında qatnasıw waqtında syujet oylap tabıw, túrli oyınshıq hám atributlardı qollawda improvizaciyadan paydalanıw múmkinshiliklerin kórsetti. Balalarda súwret sızıw, atributlar soǵıw, qosıq oqıw, oyınǵa túsiw, quwırshaqlar menen improvizaciyalasqan oyınlarda qatnasıw tileklerin qáliplestiriwge baǵdarlanǵan usınıslar islep shıqtı.
3-topar. Studentler “Maqtanshaq qoyan” ertegin saxnalastırdı. Qoyan obrazın súwretlep, dóretiwshilik jantasqan halda rol atqardı. Monologiyalıq hám diologiyalıq sóylew formalarınan paydalandı. Quwırshaqlar menen tuwrı manipulyaciya qılıw, yaǵnıy tuwrı jóneltiriw qaǵıydaları túsindirip berildi.
4-topar. Studentler unamlı keypiyattı basqalarǵa úlesiw maqsetinde muzıka sesler uyǵınlıǵın túrli dene háreketleri arqalı kórsetip berdi. Quwırshaq teatrı tamashaları processinde balalardıń jalǵız hám jámáát penen muzıka ásbapları járdeminde improvizaciya qılıw háreketlerin qollap-quwatlaw saxnalastırıw iskerliginiń zárúrli wazıypalarınan biri ekenligine anıqlama berdi.
Tapsırmalar kórgizbesinen keyin studentler nátiyjelerdi óz-ara talqıladı. Toparlardıń tabıs hám kemshilikleri boyınsha óz usınısların berip ótti. Bunnan tısqarı studentler rolli oyınlar atqarıw arqalı hám de oqıw ámeliyatlarında da ámeliy kónlikpelerdi iyeledi. Pedagogikalıq iskerlikte olar balalar, ata-analar hám kásiplesleri menen baylanısta boladı, sonıń menen birge social treningler de dúzildi. Social baylanıslar da bolajaq tárbiyashı-pedagoglarda kásiplik motivaciyanıń qáliplesiwinde zárúrli faktorlardan biri bolıp tabıladı. Studentlerge keleshekte pedagogikalıq iskerlik processinde kásiplesleri, tárbiylanıwshılar hám ata-analar menen tolıq social múnásibetke kirisiwleri boyınsha sáwbetler de shólkemlestirildi.
Izertlewimizde studentler menen bilimlendiriwge tiyisli tárbiyalıq processlerdi shólkemlestiriwde olardıń qálew hám qızıǵıwshılıqları inabatqa alındı. Ásirese, ámeliy shınıǵıw hám de oqıw ámeliyatlarında ózleriniń jeke baslamaları menen tayarlanǵan saxnalastırıwǵa tiyisli maǵlıwmatlar kórsetildi. Studentler tárepinen sabaq procesi videokameraǵa alındı. Sabaq juwmaǵında video talqılaw ótkerildi. Yaǵnıy “Kim qanday rol atqarǵan edi?”, “Berilgen tapsırmalardı qanday ámelge asırdı?”, “Improvizaciya elementlerinen qanday paydalandı?” sıyaqlı sorawlar talqılandı. Nátiyjede, studentlerde pedagogikalıq dóretiwshilik uqıbı qáliplesiwine erisildi.
Izertlew dáwirinde keleshektegi tárbiyashı-pedagoglar kásiplik motivaciyasın qáliplestiriwdi tórt basqıshta ámelge asırdı. Bular tómendegiler bolıp tabıladı:
1-basqısh. Jeke tájiriybe hám mútajlikleri qáliplestirildi. Bunda studentlerde ámeldegi tájiriybe analiz etildi hám mútajlikleri anıqlandı. Studentlerde tárbiyashınıń jeke sapaları qanday bolıwı kerekligi tuwrısında maǵlıwmatlar berildi. Bolajaq tárbiyashı-pedagog retindegi imidjları (mektepke shekemgi bilimlendiriw tarawın jaqsı biliwi, shet el tájiriybelerdi ózlestiriwi, multimedia qurallarından paydalana alıwı hám t.b) islep shıǵıldı. Pedagogikalıq jumıs alıp barıwǵa bolǵan mútajlikleri anıqlandı hám sol boyınsha usınıslar berildi.