Mavzu: Odam va hayvonlarda parazitlik qiluvchi soda hayvonlar. Reja

KOKSIDIYALAR (COCCIDIIDA) turkumiga 1000 ga yaqin tur kiradi. Umurtqasiz va umurtqali hayvonlar organlarining epiteliy to’qima hujayralarida, ya’ni ichak va jigarda parazitlik qiladi. Deyarli har bir koksidiya turi faqat ma’lum bir tur hayvonda yashaydi. Voyaga etgan koksidiyalar harakatsiz bo’ladi.
Cho’zinchoq yosh shakllari, ya’ni sporozoit va merozoitlari faol harakat qiladi. Koksidiyalarning ko’payishida jinsiy va jinssiz bo’g’inlarning to’g’ri gallanishi xarakterlidir.
Qoramollar, qo’y va echkilar, quyonlar va parrandalarda asosan Eimeria avlodining turlari parazitlik qiladi. Koksidiyalarning rivojlanishi barcha hayvonlarda bir xil bo’lib, uchta rivojlanish davrlarini (shizogoniya, gametogoniya va sporogoniya davrlarini) o’taydi. Bunda shizogoniya va gametogoniya davrlarining taraqqiyoti xo’jayinlar ichki organlarida (endogen davri), sporogoniya davrining taraqqiyoti esa tashqi muhitda (ekzogen davri) o’tadi.
SHizogoniya (jinssiz ko’payish davri). Maxsuldor hayvonlar, jumladan quyonlar oziq-ovqat yoki suv bilan birga koksidiya oosistalarini yutib yuboradi. Oosista ichida 4 ta spora va har bir spora ichda 2 tadan sporozoitlar bo’ladi. quyon ichida oosistaning qobig’i erib ketib, sporalarning po’sti yoriladi va ulardan duksimon ko’rinishdagi harakatchan sporozoitlar chiqadi. Sporozoitlar tezlikda epitelial hujayralarga kirib oladi va yumaloqlanib, o’sib xajmi kattalashadi hamda yadrosi bir nechtaga (8-60 ta) bo’linadi. Yadrolar soniga qarab sitoplazma ham o’shanchaga bo’linadi va yangi avlod, ya’ni merozoitlar shakllanadi.
Merozoitlar epiteliy hujayralaridan ichak bo’shlig’iga chiqib qaytadan sog’lom epitelial hujayralarga kirib oladi va yana jinssiz yo’l bilan ikkinchi generasiyani xosil qiladi. SHunday usulda jinssiz ko’payish 4-5 marta takrorlangandan keyin merozoitlardan jinsiy hujayralar (gametalar) xosil bo’la boshlaydi.
Gametogoniya (jinsiy yo’l bilan ko’payish davri). Epitelial hujayralarga kirib olgan bir gurux merozoitlardan makro va mikrogametositlar xosil bo’ladi.
Keyinchalik har qaysi makrogametositdan bitta makrogameta va har qaysi mikrogametositdan esa kichkina, uzunchoq shaklli, bir juft xivchinlari bo’lgan bir nechta harakatchan mikrogametalar xosil bo’ladi. Mikrogametalar epiteliya hujayralaridan ichak bo’shlig’iga chiqib, hujayralardagi kam harakatchan makrogametalar bilan qo’shiladi va natijada zigota xosil bo’ladi. Zigota qobiqqa o’ralib oosistaga aylanadi va ichak bo’shlig’iga chiqadi.
Sporogoniya. Koksidiyalarning oosistalari faqat kislorodli muhitda rivojlanadi. SHu sababli oosista xo’jayin tezagi bilan tashqi muhitga chiqadi. Oosistaning ikki qavatli po’sti ximoya vazifasini bajaradi. qulay sharoitda oosista rivojlana boshlaydi. Dastlab yadrolar 4 taga bo’linadi, ma’lum vaqtdan keyin sitoplazma ham yadrolar soniga qarab 4 ga bo’linadi va oosistada sporoblastlar shakllanadi. Keyinchalik sporoblastlardan sporalar, sporalar ichida esa 2 tadan sporozoitlar xosil bo’ladi. SHunday qilib, sporogoniyada har bir oosistada 4 ta spora va 8 ta sporozoit voyaga etadi. Oosista ana shu davrda invaziyali (zararlaydigan) bo’lib qoladi. Bunday invaziyali oosistalar hayvonlarning ichagiga tushganda sporalardan va oosistadan sporozoitlar chiqadi hamda rivojlanish yana qaytadan boshlanadi.
Koksidiyalarning 10 tadan ortiq turi qoramollarda, 10 ga yaqin turi qo’y va echkilarda, 10 ta turi quyonlarda va 8 ta turi parrandalarda uchrashligi aniqlangan. Baliqchilikka esa karp koksidiyasi zarar keltiradi. Odamlarda ham koksidiyalardan Eimeria sardinae va Isospora urug’i turlari parazitlik qiladi.
Koksidiyalar koksidioz kasalligini vujudga keltiradi. Kasallangan hayvonlarning ishtaxasi pasayadi, o’sishi susayadi, ich ketish, kam qonlik kuzatiladi, hayvon ozadi. Hayvonlarni zich joylashtirish, binolarning zax bo’lishi, koksidiyalar uchun qulay sharoit vujudga keltiradi. Hayvon koksidiozi odamga yuqmaydi. Kasallangan hayvonlarni sulfamilamidlar, antibiotiklar, oltingugurt, furasetin va boshqa preparatlar bilan davolash hamda zoogigiena qoidalariga rioya qilish kerak.
Molxonalar muntazam ravishda dezinfeksiya qilinadi. Xo’jaliklarda mol boqish dala almashtirish bilan olib boriladi. Mollar eng to’yimli em-xashaklar bilan boqiladi.
Koksidiyalar turkumiga yana qushlar, sutemizuvchilar, jumladan odamlarning jigari, talog’i, bosh miyasi, qon tomirlarida parazitlik qilib kasalliklar tug’diruvchi toksoplazmalar (Toxoplasma gondii) va qushlar hamda sutemizuvchilarning muskullarida parazitlik qiluvchi sarkosporidiyalar (Sarcosporidia), ya’ni go’sht sporalilari avlodlari ham kiradi.
Tug’ma toksoplazmozda kasallik ona organizmidan xomilaga o’tadi va xomilaning nerv sistemasi, ko’zlari va boshqa a’zolarini zararlaydi, bola barvaqt yoki o’lik yoxud mayib-majrux bo’lib tug’iladi. Toksoplazmada tirik tug’ilgan bola aqlan va jismonan sust rivojlanadi. Yaxshi gapira olmaydi va unda miokardit, pnevmaniya, meningoensefalit, alegofreniya, epilepsiya kabi og’ir kasalliklar kuzatiladi. Orttirilgan o’tkir toksoplazmoz esa terlamaga o’xshash kechib, bemor isitmalaydi, tomog’i og’riydi, jigari va talog’i shishadi yoki ko’pincha nerv sistemasi zararlanib, boshi og’riydi, qayt qiladi, falajlanadi. Xronik toksoplazmada, odatda, bemorning gavda harorati uzoq vaqt yuqori bo’ladi, boshi, tomog’i, mushaklari og’riydi, limfa tugunlari va jigari shishadi. Mexnat faoliyati susayadi. SHuningdek, bemor psixikasining buzilishi, talvasaga tushib falajlanishi, ko’zi, yuragi zararlanishi mumkin. Toksoplazmoz yashirin kechishi ham mumkin. Toksoplazmozning oldini olish uchun uy hayvonlarini sanitariya nazoratida saqlash, xomilador ayollarni tibbiyot ko’rigidan o’tkazish zarur.
Hayvonlardan - qo’y, echki, cho’chqa, it, quyon va har xil kemiruvchilar, parrandalar toksoplazmoz bilan kasallanadi. Kasallik ona hayvonlardan bolasiga sut orqali, bir-biriga yaqin bo’lish hamda turli kemiruvchi va xasharotlar orqali o’tadi. Kasal hayvonda yo’ldosh ushlanishi, bola tashlash, umumiy xolsizlanish, organizm uvishishi va teri zararlanishi kuzatiladi.
Toksoplazmalar (Toxoplasma) urug’iga bitta Toxoplasma gondii turi kiradi. Toksoplazmalar mushuk va boshqa mushuksimonlar oilasi vakillarining ingichka ichagida murakkab rivojlanish davrlarini o’tib, undan 2 ta sporali oosista - sporozoitlar xosil bo’lishi bilan tugaydi.
Parazitni dastlab 1908 yili fransuz olimlari Nikol va Manso kemiruvchilarda aniqlashgan.
Toksoplazmalarning rivojlanishi xo’jayin almashtirish bilan boradi, ya’ni mushuklar parazitning asosiy xo’jayini, boshqa hamma hayvonlar va odamlar esa parazitning oraliq xo’jayinlari xisoblanadi. Umumiy po’st bilan o’ralgan merozoitlar to’plami sista deyiladi. Bunday sistalar zararlangan organlarda yoki hayvonlar so’lagi, suti, axlati, siydigi va boshqa chiqindilarida bo’ladi.
Hayvonlar sistalarni yutganida yoki kasal hayvonlarni eganida parazitni yuqtiradi. Sistalar organizmga terining jaroxatlangan joylaridan ham o’tishi mumkin. Sutemizuvchilarda esa toksoplazmalar yo’ldosh orqali ona organizmidan embrionga o’tadi. Ayrim xollarda toksoplazmalar kanalar orqali ham yuqishi mumkin.
Toksoplazmalarning jinsiy ko’payishi faqat mushuklar organizmida o’tadi. Mushuklar kasal kemiruvchilardan parazitni o’zlariga yuqtiradi. Mushuk organizmida toksoplazmaning hayot sikli, boshqa koksidiyalarda bo’lganidek jinsiy ko’payish va sporosistalar xosil bo’lishi bilan tugallanadi.
Toksoplazmalarning rivojlanishida jinssiz ko’payish ustun turadi.
Toksoplazmalar odam va hayvonlarda toksoplazmoz kasalligini qo’zg’atadi. Toksoplazmalar odamga ovqat maxsulotlari (go’sht, sut, tuxum) va kasal uy hayvonlari (quyon, mushuk, it va boshqalar) orqali o’tib, meda - ichak yo’llariga tushadi. Parazitlar ichak devorlarini teshib limfa va qon tomirlari orqali turli organlar (bosh miya, orqa miya, jigar, taloq, buyrak, mushak va bosh.) hujayralari sitoplazmasida rivojlanib, to’qimalarni yallig’lantiradi.
Toksoplazmalar hayvonlarga har xil ta’sir ko’rsatadi. Ayrim hayvonlar kasallikka berilmaydi, ayrimlari esa juda ta’sirchanligi tufayli xalok bo’lishi mumkin.
Odamlarning toksoplazmoz bilan zararlanishida uy hayvonlari, ayniqsa, mushuklar katta o’rin tutadi. Toksoplazmoz bilan kasallanish limfatik sistema, nerv sistemasi va ko’zning shikastlanishiga sababchi bo’ladi. Odam va boshqa sutemizuvchilar embrioni ona qornida toksoplazmoz bilan zararlanganida tushib ketadi yoki uning ayrim muhim organlari og’ir jaroxatlanadi.
Sarkosporidiyalar (Sarcosporidia), ya’ni go’sht sporalilar urug’ining ham bir qancha turlari bo’lib, ular ayrim uy hayvonlari, ya’ni qoramollar, cho’chqalar va parrandalar hamda yovvoyi hayvonlarning muskullarida parazitlak qiladi. Ular go’shtda uzun xalta shaklida 0,5-5 mm kattalikdagi sistalar xosil qiladi. Sistalar ichida esa yuzlab chuvalchangsimon bir yadroli merozoitlar bo’ladi.
Go’sht sporalilarning rivojlanishi koksidiyalarnikiga o’xshash, lekin rivojlanishi ikkita xo’jayinda ketadi. o’txo’r sutemizuvchilar va parrandalar parazitning oraliq xo’jayinlari, yirtqich sutemizuvchilar (mushuklar, itlar) va odamlar esa asosiy xo’jayinlari xisoblanadi.
Oraliq xo’jayinlar organizmida parazit jinssiz - shizogoniya yo’li bilan va asosiy xo’jayinlari organizmida jinsiy usulda ko’payadi.
Go’sht bilan asosiy xo’jayini organizmiga tushgan sistalardan juda ko’p sistazoidlar chiqadi va ular ichak epiteliysi hujayralariga kirib oladi. Hujayra ichida mikro va makrogamontlar, ulardan esa mikro va makrogametalar etishib chiqadi. Urug’lanishdan keyin xosil bo’lgan zigota po’stga o’ralib oosistaga aylanadi. Har bir oosista ichida 2 tadan spora xosil bo’ladi. Em-xashak bilan oraliq xo’jayinining organizmiga tushgan oosistalardan sporozoitlar chiqadi. Sporozoitlar qon orqali qon tomirlari devoriga, so’ngra muskullarga o’tib, tezda ko’payib xaltaga o’xshash yirik sistalarni xosil qiladi.
Go’sht sporalilari bilan zararlangan hayvonlarda odatda kasallanish alomatlari kam seziladi.