Men kecha bugun va ertaga

11-mavzu: Befarqlik va loqaydlik
Loqaydlik bu – burch va mas'uliyatni his qilmaslik, atrofdagilarning, o'zining taqdiri va kelajagiga dahldor voqeliklarga e'tiborsizlikdir. Barcha davrlarda ziyolilar bunday illatga qarshi kurashganlar, xalqni ogohlantirib kelganlar. 
Hukumatimiz tomonidan olib borilayotgan siyosatning maqsadi kuchli davlatdan kuchli fuqarolik jamiyatiga o'tish kontsepsiyasidir. Bunda fuqarolardan davlat va jamiyatning siyosiy, iqtisodiy, ijtimoiy va madaniy hayotida faol ishtirok etishlari talab etiladi. Buning uchun xalqni bir maqsad yo'lida, ezguliklar sari safarbar etish, insonlardagi loqaydlik va beparvolikka barham berish lozim bo'ladi. Mustaqillikka erishganimizdan so'ng, bunday illatga qarshi kurash alohida ahamiyat kasb eta boshladi. Prezidentimiz ham doimo fuqarolarimizni ogohlikka va e'tiborli bo'lishga chaqiradi. Bu shuning uchun kerakki, loqaydlikning ma'no mazmuni na muqaddas dinimiz mohiyatiga, na boshqa taraqqiyot qonunlariga to'g'ri keladi. Uni yana dangasalik, tanballik, boqimandalik, boqibeg'amlik va beparvolik kabi salbiy illatlar bilan bog'lash mumkin. Bular jamiyatni tubanlashtiradigan omillardandir. 
Hozirgi davrning talabi – aniqlik va yangiliklardan tezkorlik bilan xabardor bo'lish. Loqaydlik esa bunga tamomila ziddir. Prezidentimiz “Yuksak ma'naviyat – yengilmas kuch” asarida shunday deydi: 
“Birovning hayotiga, yon-atrofda sodir bo'layotgan voqea-hodisalarga betaraf va beparvo qarab, shunchaki kuzatuvchi bo'lib yashaydigan odamlardan qo'rqish kerak. Ulardan hech yaxshilik chiqmaydi. Chunki ularda na imon va na iroda bo'ladi. Ular xatto o'z xalqi, vatani taqdiriga ham bamisoli begona odamdek qaraydi”. 
Shuningdek, yurtboshimiz mashhur faylasufning quyidagi fikrlarini keltiradi: “Dushmanlaringdan qo'rqma, nari borsa ular seni o'ldirishi mumkin, do'stlaringdan qo'rqma, nari borsa ular senga xiyonat qilishi mumkin. Befarq odamlardan qo'rq, ular seni o'ldirmaydi ham, sotmaydi ham, faqat ularning jim turishi tufayli yer yuzida xiyonat va qotilliklar sodir bo'laveradi”. Naqadar buyuk fikrlar. Befarq odamlarning kasriga qolgan qancha odamlar bor, necha-necha yovuzliklar sodir bo'ladi. Ular borligining o'zi bilan jamiyatlarga zarar yetkazaveradi.
Biz ham bu illatlarning jamiyat uchun qanchalik zararli ekanini inobatga olib mashhur shaxslarning quyidagi fikrlarini keltirishni muhim deb bildik:
Shayx Sa'diy aytadi: “Magar sen o'zgalarning qayg'usig'a loqaydlik ila qarasang, sen inson degan nomg'a noloyiqsen”. 
Sohibqiron Amir Temur esa o'zining tuzuklarida: “Ishbilarmon, mardlik va shijoat sohibi, azmi qat'iy tadbirkor va xushyor bir kishi minglab tadbirsiz loqayd kishilardan yaxshidir”, - deb ta'kidlaydi.
Nemis yozuvchisi Georg Lixtenberg aytadi: “Qaerdaki loqaydlik – u yerda xato, qaerdaki sovuqqonlik – u yerda jinoyat”. 
Yusuf Xos Hojibning quyidagi misralari ham kishini xushyor bo'lishga chorlaydi: “Har bir ishda ham g'ofillik qilma, hushyor bo'l, g'ofillarning ishlari hech qachon ko'ngildagidek bo'lmaydi”.
Bahouddin Naqshband esa adashayotgan kishilarga to'g'ri yo'lni ko'rsatishga chorlaydi:
Ko'r ketar ekan bilmay istiqbolda choh,
Uni ogoh etmasang sendadir ulug' gunoh.
Hozirgi kunda xalqimiz orasida ham loqaydlik va beparvolik illatlari uchraydi. Ammo hech kim o'z shaxsiy manfaatlari uchun loqayd emas. 
Xulosa shuki, yangi davrda yangi jamiyat qurayotgan ekanmiz, noto'g'ri aqida va g'oyalardan, zararli illatlardan voz kechishimiz biz uchun suv va havodek zarur. Abdulla Avloniy aytganidek, “Ma'rifat sohibi bo'lmak uchun ahvoli olamdan xabardor bo'lmak kerak”. 
G'ofil odam ko'z yumib g'aflat uyqusiga botadi, ey irodali mard, g'ofil bo'lma, hushyor bo'l. (YUSUF XOS HOJIB) 

Tuzuvchi: 11-sinf rahbari______________ Fattoyev H