Microsoft Word kr dunyoning ishlari ziyouz com doc

www.ziyouz.com кутубхонаси 
20
қилгандан кўра овқатингга қарасанг ўласанми!» дейди-я, гўрсўхта! Ҳа, пардоз қилсам, 
ўйнашимга қипманми, қирчинингдан қийилгур! Қирмочми, баломи, заҳрингга еявермайсанми, 
ергина ютгур! Хаҳ, онамни сўккан тилларинг танглайингга ёпишгур! Тағин нима дейди, денг? 
Айбни менга тўнкайди: тилинг бир қарич, дейди. Вой, тилимни гапирган тилларинг жодида 
қийма-қийма бўлсин-а. Елдек келиб, селдек олмаса асло розимасман! 
— Қўйинг, овсинжон, — онам маъюс жилмайди. — Ошсиз уй бор, уришсиз уй йўқ... Қарғаманг 
бечорани. 
— Вой нега қарғамас эканман? Оғзи-бурнингдан лахта-лахта қонинг келгурни, нега қарғамас 
эканман? Кетаман! 
— Олти бола билан қаёққа борасиз, овсинжон? — деди онам кулимсираб. — Жўжабирдек 
жонсиз. Шуларнинг шукурини қилсангиз-чи. 
— Э, олтита боламни ойдинда оёғим билан боқиб оламан. Ойигинамнинг тор қорнига сиққан 
кенг уйига сиғмайманми? Биров мани кўкрагимдан итармас. Мана шу ажалнинг тиғи парронига 
учрагур билан тургандан кўра... — Келинойи бирдан жимиб қолди. Киприкларини оғир-оғир
пирпиратиб онамга узоқ тикил-ди-ю, овози пасайди. — Вой, юзингизга нима қилди? 
— Ўтин тегиб кетди, — деди онам секингина. — Қарасам, ўтин ўлгур қолмабди. Болалар 
ўқишда, адаси ишдалар. Кўзлироқ саржин экан, теша билан урганимни биламан... — Онам 
қовоғини силаб қўйди. — Адаси ишдан келиб жуда хафа бўлдилар. «Бирпас сабр қилмайсанми, 
ўзим ёриб бермайманми», дедилар. 
Мен турган жойимда қотиб қолдим. Онам ёлғон гапирарди. Ёлғон гапирарди-ю, негадир бу 
менга жуда ёқар эди... 
— Ана! — Келинойи тағин шанғиллади. — Сизнинг эрингиз ўтинингизгача ёриб беради. Маники 
бўлса, бир пақир сув олиб келмайди, қўлгинанг синиб, акашак бўлгур. Уйим-жойим деб 
бўйнини эгмайди, бўйнигинанг кесилгур, эшшак! Худоё бўйнигинанг ҳазрати Алининг қиличида 
кесилмаса, у дунё-бу дунё розимасман-а! 
Ортиқ қараб туролмадим. Негадир йиғлагим келди. 
...Ҳозир ҳам эри сал қовоғини солса, «мелиса» билан қўрқитиб, «ўн беш суткани» пеш 
қиладиган баъзи хотинларни кўрсам, онамнинг қаноатини, Келинойининг қарғишларини 
эслайман.