Microsoft Word kr dunyoning ishlari ziyouz com doc

www.ziyouz.com кутубхонаси 
26
Онам дўппимни бошимга кийгазиб, сартарошга пул берди. 
— Ие, қудалардан пул олсак қандоқ бўларкин? — Сартарош пулни шимининг киссасига 
тиқаркан, тайинлади.— Шулардан қолманг, яхши одамлар. 
Уйга қайтишимиз билан бир бурда зоғорани олдиму кўчага югурдим. Майдончада ўйнаб юрган 
Той, Вали, жўрабоши — ҳаммаси пайсалга солмай «устара ҳақи» олишди. Айниқса жўрабоши 
ўрта бармоғи билан чертганда бошим оғриди. Лекин чидаб турдим. Ўзим олиб келган янгилик 
билан ҳаммани қойил қолдирмоқчи эдим. 
— Яқинда бизникида тўй бўлади! — дедим мақтаниб. — Опамнинг тўйида роса ош еймиз! 
Кейин қуда буви менга кўйлак тикиб беради. «Зингер» машинаси бор! 
...Лекин тўй бўлмади. Бир ойдан кейин ҳам, бир йилдан кейин ҳам... Бир-икки марта опам, 
«керакмас», деб йиғлаганини, ойим, «кўнглингдагини айт бўлмаса», деганини эшитиб қолдим. 
Таниш совчилар ҳамон тез-тез келиб туришар эди. Бир куни эрталаб турсам, ойим йўқ. Тушга 
яқин хомушроқ қайтди. Эртасига опам ишга кетганида, нонушта устида дадамга қизиқ гап 
айтди. 
— Пишмайдиган савдога ўхшайди. Уруғида жинни бор экан. Тўлаганхўжанинг катта амакиси 
уч-тўрт марта жиннихонага тушган экан. 
— Бўлмайди! — деди дадам кескин қўл силтаб. — Совчилар яна келса жавобини бериб юбор. 
Бир нарсани ҳеч тушунмасдим. Ўшанда онам совчиларнинг келиб чиқиши қаерданлигию, 
авлодида ёмонотлиқ одамлар бор-йўқлигини, касб-кори нимаю, қариндошларида касаллар бор-
йўқлигини нима учун бунчалик суриштирганига ҳеч ақлим бовар қилмасди. 
Бу савдолар, бу саволлар бора-бора ёдимдан чиқиб кетди. Бироқ кунлардан бирида ғалати 
воқеа бўлди. Редаксияда ишлаб ўтирсам, эгнидаги кийимидан тортиб тақинчоқларигача жуда 
ярашган кўҳлик аёл кириб келди. 
Анчагача гапни нимадан бошлашни билолмай уялиб ўтирди-ўтирди-да, охири дардини очди. 
— Усмон акам иккаламиз бир-биримизни яхши кўрамиз. Аммо ажрашмасак бўлмайди. 
Худо ҳаққи, бунақа масалаларга аралашишни жинимдан ёмон кўраман. 
Кўҳлик жувонга тўғрисини айтдим, ўз ҳаётингизни ўзингиз ҳал қилинг, дедим. 
Аёл бир зум ерга қараб турди-да, илтимос қилди. 
— Усмон акам билан бир гаплашиб кўрсангиз... 
«Усмон акаси» келишини хаёлимга ҳам келтирмаган эдим. Уч кундан кейин эшикдан ҳар 
жиҳатдан мукаммал йигит кириб келиб ўзини таништирганида ҳайрон қолдим. Икковлари бир-
бирига шу қадар муносиб эдики, шундоқ оиланинг ажрашмоқчи эканига ачиниб кетдим. Гапни 
нимадан бошлашни билмай гарангсиб турган эдим, Усмоннинг ўзи муддаога ўтди. 
— Хотиним мени, мен хотинимни севаман. Боламиз йўқлигига хафаман. Аммо чорамиз ҳам йўқ! 
— Ҳозирги замон медитсинаси учун шуям проблема бўптими, — дедим Усмонни юпатиб. — Уч-
рашиб кўринглар ахир. 
Маъюс жилмайди. 
— Ўзим врачман. Врач бўлганим учун хотинимнинг туғишини хоҳламайман. 
Бутунлай эсанкираб қолдим. 
— Нега ахир? Бир-бирларингни севсангиз. Муносиб бўлсангиз... 
— Мен врачман, — деди Усмон яна бўғиқ овозда. — Генетикани яхши биламан. Хотинимнинг 
ўғил туғишидан қўрқаман. — У яна хўрсинди. — Қўрқаман. Умуман, ҳаммасига ўзим айбдорман. 
Назирани севардим. Худбинлик қилдим. Бошида айтишим керак эди. 
У ниманидир, жуда муҳим нарсани айтишга иккиланар эди. 
— Майли, — деди ниҳоят. — Ростки, сизга юрагимни очдимми, бу ёғиниям айтишим керак. 
Менинг бувам — дадамнинг отаси ШЗ бўлган. 
— Нима у ШЗ? — дедим дафъатан тушунолмай. 
— Шезофрения касаллиги. Руҳий хасталикни медитсинада шунақа дейилади. Бу — наслга 
ўтадиган дард. Ота авлодида бўлса ўғилгами, неварагами, хуллас кимгадир ўтади. 

---

Дунёнинг ишлари (қисса). Ўткир Ҳошимов