Microsoft Word kr dunyoning ishlari ziyouz com doc

www.ziyouz.com кутубхонаси 
33
— Шинни ейишгами? — дедим ҳовлиқиб. 
Онам оҳиста бош чайқади. 
— Йўқ. Ҳабиба буви зотилжам бўп қопти. Ўтини йўқмиш. Кўмир обориб берамиз. 
Бултур ўзимизнинг ўтинимиз қолмаганида қанақа аҳволга тушганимиз эсимдан чиққанмас. 
Шунинг учун бўлса керак, бу йил дадам кўмирни яхшилаб ғамлаб қўйган эди. 
— Менам обораман! — дедим ирғишлаб. — Қопда обораман! 
— Бўпти, — ойим бошимни силади. — Сен қоп кўтаролмайсан, челакда оборасан. 
Дадам ишда, акаларим мактабда. Опам эчки сутини сотиш учун шаҳарга кетган. Уйда ойим, 
укам қолган. Укамни амаллаб бешикка тиқдик. Ойим алдаб-сулдаб ухлатди. Ошхонага кириб 
қопга кўмир солдик. Мен оғзини очиб турдим, ойим хокандоз билан солди. Сандалга йирик 
кўмир бўлмайди. Албатта кукунидан солиш керак. Тез чўғ олади, узоқ туради. Онам ҳар гал 
хокандозни бўшатганида қоп-қора чанг кўтарилади. Бир зумда ойимнинг ҳам, менинг ҳам оғиз-
бурнимиз қорайиб кетди. Кейин кичикроқ пақирга мен кўмир тўлдирдим. Иккаламиз йўлга 
тушдик. Онам бурни ерга теккудек бўлиб энкайганча қорда чуқур-чуқур из қолдириб юриб 
кетди. Кетидан мен эргашдим. Кичкинагина челак аввалига енгил туюлган эди. Эллик қадамча 
юрмасимдан жуда оғирлашиб кетди. У қўлимдан бу қўлимга оламан, бу қўлимдан у қўлимга 
оламан, сирғаниб-сирғаниб кетаман. Бу ҳам етмагандек, қўлимга сўзак кириб кетди. Пақирнинг 
банди кафтимга чиппа ёпишиб қолган. Ўнг қўлимдан чап қўлимга олаётганимда теримни 
шилиб олаётгандек бўлади. 
— Ойи, қўлим музлаб қолди, — дейман йиғламсираб. 
Онам менга ачиниб қараб қўяди-ю, тўхтамайди. 
— Юра қол, жон болам, яқин қолди. 
Қопнинг тагини ҳам сичқон тешган экан: қор устида бора борганча қоп-қора из тушиб борди. 
Ниҳоят Эрмон буванинг очиқ эшиги олдига келдик. 
— Сен кирмай қўя қол, — деди онам ҳарсиллаб. — Мен ҳозир. — Шундай деди-ю, икки 
букилганча ҳовлига кириб кетди, зум ўтмай қайтиб чиқиб пақирни ҳам олиб кирди. 
— Алаҳлаб ётибди бечора! — деди қайтиб чиқиб. — Буванг тепасида дуо ўқиб ўтирибди. 
Бу сафар бувининг шиннисига умид боғламадим. Ойим иккаламиз дарров изимизга қайтдик. 
Ойимнинг қўлида пақир, пақир ичида бўшаган қоп... 
Қорда тушган кўмир изини дадам кўрибди шекилли, кечқурун ойимдан сўради: 
— Кимга кўмир бердинг? 
Ойим айбдор қиёфада ерга қараб турди-да, ростини айтди. 
— Ҳабиба буви шамоллаб қопти. Кўмири йўқ экан, обориб бердим. 
Дадам ойимни уришмади. 
— Чатоқ бўпти, — деди секин. — Ачинскага хабар бериш керак. 
Онам бош чайқади. 
— Жудаям зарилмас шекилли. Мана, уйи исиб қолди. Ажабмас, эрта-индин тузалиб кетса... 
Лекин Ҳабиба буви тузалмади... Индини эрталаб ишга кетган дадам ярим йўлдан қайтиб келди. 
Укамни тиззасига ўтказиб чой ичираётган ойим ҳайрон бўлиб дадамга қаради: 
— Тинчликми? 
Дадам негадир кўзини яширди: 
— Одамзоднинг аҳволи шу экан-да, — деди хўрсиниб. — Ҳабиба буви омонатини топширибди. 
— Вой... Вой бечора! — Ойимнинг ранги қув ўчганча шундай инграб юбордики, қўрқиб кетган 
укам бир зум олазарак бўлиб турди-да, чириллаб йиғлай бошлади. — Кеча борганимда тузалиб 
қолувди-ку! — Ойимнинг кўзидан тирқираб ёш чиқиб кетди. Укамни силтаб кўрпачага ўтказди-
ю, икки кафти билан юзини тўсганча ўкириб юборди. 
— Начора, куни битган-да, — деди дадам томоғини бўғган кўз ёшидан овози ҳириллаб. — Ким 
билибди шунақа бўлишини! 
Дадам, унинг кетидан укамни кўтарган ойим, унинг кетидан мен Эрмон буваникига югурдик. 

---

Дунёнинг ишлари (қисса). Ўткир Ҳошимов