Microsoft Word kr dunyoning ishlari ziyouz com doc

www.ziyouz.com кутубхонаси 
63
Мен жуда қийин муаммо рўпарасида қолган одамдай, елкамни қисдим. 
— Майли, бир уриниб кўраман. Аммо бу жуда мушкул иш-да... 
Сартарош ўша куни мени уйимгача кузатиб қўйди. Кузатиб қўйди-ю, бари бир тинчимади. 
Кечаси алламаҳалда эшик тақиллаб қолди. Чиқсам, сартарош қийиқчага ўроғлиқ бир нарсани 
кўтариб турибди. 
— Нима бу? — дедим ҳайрон бўлиб. 
— Иссиғида еб ола қолинг! — У тугунчани узатди. Мошкичири. Ўз қўлим билан пиширдим. 
— Э, Москвадаги мошкичиридан денг? 
— Московни мошкичириси қатта энди, ука! Унга қора қўчқорнинг пўстдумбаси солинарди. 
Бунисининг мазаси йўқроқ. Шундоқ бўлсаям, илиндим. Олинг, қўлим қайтмасин. 
Майли, сазаси ўлмасин деб сартарошнинг совғасини олдим. 
Ичкарига кириб қийиқчани очсам, устига кўк пиёз сепилган мошкичири. Инсоф билан айтганда 
қойилмақом қилиб пиширибди. Уч-тўрт қошиқ олган ҳам эдимки, ойим кириб қолди. 
— Нима бу? — деди ҳайрон бўлиб. 
Илжайдим. 
— Пора! 
Онам ёнимдаги стулга ўтириб қолди. 
— Нима? 
Кулиб юбордим. 
— Пора! Наим сартарош пора обкепти. 
Ойим гоҳ менга, гоҳ «гаримдори» нусхали косага қараб бирдан ранги ўчди. 
— Энди шу ҳунарни ўргандингми? — деди ростакамига ранжиб. — Аданг сенга пора ейишни 
ўргатган эмасдилар шекилли. 
Қарасам ойим чиндан ҳам хафа бўладиган. Иштаҳам бўғилди. Косани нари сурдим. Ойим 
жиркангандек, қийиқчани икки бармоғи орасида қисиб ушлади-да, айвонга опчиқиб ташлади. 
Ўша ёқдан алланима деб ўзига-ўзи гапиргани эшитилди... Бироқ Наим сартарошнинг пораси 
бари бир зиммамда турибди. У ҳалиям косасини олиб кетгани йўқ. Шунга қарамай, 
эшитишимча, энди чойхонада Олим паравоз ундоқ, Ҳаким найнов бундоқ, менам персаналний 
пенсия олишим керак, деган гапларни айтмайдиган бўлибди. 
ОЛТИН БАЛДОҚ 
Одамда, ҳарчанд урингани билан ўзгартиролмайдиган ғалати феъл-атворлар бўлади. Менинг 
ҳам қизиқ одатим бор: бировни ранжитиб қўйсам (адолатли хафа қилган бўлсам ҳам) ўша 
одамдан кўпроқ ўзимнинг дилим вайрон бўлиб юради. Бу одат онамдан юққан шекилли. 
Ойим бизларга ҳеч қаттиқ гапирмас, мабодо хафа қилиб қўйса бирпасдан кейин ўзи ялинар 
эди. Фақат бир марта мени қарғаган, ёмон қарғаган. Ўшанда айб кимда бўлганини ҳали ҳам 
билмайман. 
Баҳор кириб, офтобнинг илиқ нурлари елкани қизитадиган бўлиб қолган кунлар эди. Бодом 
тагида ўтириб варрак ясашга тушдим. Ўрикнинг елими қоғозга ёпишса қамишга ёпишмайди, 
қамишга ёпишса қоғозга... Бурнимни тортиб-тортиб уриниб ётибман. Ойим нарироқда, тагига 
пўстак ташлаб, кир ювяпти. Дадам «камбағалбоп кийим» деб ака-укаларга чийдухоба шим 
олиб берган. Чийдухоба асли яхши нарса-ю, чиллак ўйнагандами, копток тепгандами, бир 
думаласанг, ора-орасига лой кириб кетиши ёмон. Уч кунда бир ювавериб, онамнинг эси кетади. 
(Худди шу чийбахмал замонлар ўтиши билан бутун Европага мода бўлишини дадам хаёлига 
ҳам келтирмаган бўлса керак. Унинг учун чийдухоба «камбағалбоп кийим» эди, холос.) Хуллас, 
ойим унисини олиб бунисини қўйиб, шимларни ювар, ҳар силтаб ишқаганда жомашовдан кўпик 
сачрар, атрофни совун ҳиди тутиб кетган эди. Унинг рўпарасида Сепкилли хола тўнкарилган 
пақир устида ўтирарди. 
Сепкилли холани ёмон кўраман. Ўзинимас, қизини. «Саини сенга бераман, олсанг ҳам оласан, 

---

Дунёнинг ишлари (қисса). Ўткир Ҳошимов