O‘zbekiston Respublikasi oliy harbiy ta’lim muassasalarida o‘qishga nomzodlarni saralab olish va qabul qilish, kursantlarni o‘qishdan chetlashtirish va qayta tiklash tartibi to‘g‘risidagi nizomni tasdiqlash haqida

3-bob. Nomzodlarning ingliz va rus tilini bilish darajasini aniqlash va baholash
8. Nomzodlarning ingliz va rus tilini bilish darajasini aniqlash va baholash kichik komissiya a’zolari tomonidan kollegiallik tamoyili asosida amalga oshiriladi.
9. Nomzodlarni O‘zbekiston Respublikasi oliy harbiy aviatsiya bilim yurtida saralab olishda ularning ingliz va rus tilini bilish darajasini aniqlash uchun quyidagi mezonlardan foydalaniladi:
ingliz va rus tilini bilish darajasini aniqlash bo‘yicha:
“5” (a’lo) (86 — 100%) — nomzod tegishli berilgan mavzuni to‘liq og‘zaki yoki yozma tarzda batafsil yoritib bersa, ularni mantiqan to‘g‘ri bayon etsa, aniq mustaqil xulosa qila olsa va to‘g‘riligini asoslay olsa, farazlarni qo‘llay bilishi, o‘qituvchi tomonidan tilni bilish darajasini aniqlash uchun berilgan qo‘shimcha savollarga javob bersa, shuningdek, bilimini amalda qo‘llay olishini namoyish qilsa, ijodiy fikrlab, mustaqil mushohada yurita olishini hisobga olib, tilni bilish darajasi yuqori deb topilganda;
“4” (yaxshi) (71 — 85 %) — nomzod tegishli mavzu bo‘yicha materiallarni puxta bilib, o‘qituvchi tomonidan berilgan savollarga javob berishda sezilarli noaniqliklarga yo‘l qo‘ymagan bo‘lsa, olgan bilimlarini amalda qo‘llay olsa, o‘qituvchi tomonidan berilgan qo‘shimcha savollarga qisman to‘g‘ri javob bersa, yozma ishlarida kam xatoliklarga yo‘l qo‘yilgan deb topilganda;
“3” (qoniqarli) (55 — 70%) — nomzod asosiy materialni to‘la o‘zlashtirib, tafsilotlarini yoritib berishda qiyinchiliklarga duch kelsa, javoblarida qo‘pol xatoliklarga yo‘l qo‘ymagan bo‘lsa, o‘qituvchi tomonidan unga yordamchi (esga soluvchi) savollar berilishi zarur bo‘lsa, olgan bilimni amalda qo‘llay bilsada, mustaqil yozma va og‘zaki nutqda xatoliklarga yo‘l qo‘yilgan deb topilganda;
“2” (qoniqarsiz) (0 — 54%) — berilgan materiallar tafsilotini to‘liq o‘zlashtirmagan va tasavvurga ega bo‘lmagan, ifodalay olmagan, yozma va og‘zaki nutqda qo‘pol xatoliklarga yo‘l qo‘ygan deb topilgan nomzod saralash bosqichidan o‘tkazilmaydi.