O‘zbekiston Respublikasi oliy harbiy ta’lim muassasalarida o‘qishga nomzodlarni saralab olish va qabul qilish, kursantlarni o‘qishdan chetlashtirish va qayta tiklash tartibi to‘g‘risidagi nizomni tasdiqlash haqida

3-bob. Yakunlovchi qoidalar
16. Individual-psixologik o‘rganish sinovlarini topshirgan nomzodlarga qaydnoma rasmiylashtiriladi.
17. Mazkur qaydnomada nomzodlar tomonidan to‘plangan ballar va individual-psixologik o‘rganish bo‘yicha xulosa aks ettiriladi.
18. Qaydnoma individual-psixologik o‘rganish bo‘yicha kichik komissiya raisi va a’zolari tomonidan imzolanadi.
19. Individual-psixologik o‘rganish natijalaridan norozi bo‘lgan nomzodlar ularga nisbatan berilgan xulosani asoslantiruvchi ma’lumot bilan tanishish huquqiga ega.
O‘zbekiston Respublikasi oliy harbiy ta’lim muassasalarida o‘qishga nomzodlarni saralab olish va qabul qilish, kursantlarni o‘qishdan chetlashtirish va qayta tiklash tartibi to‘g‘risidagi nizomga
9-ILOVA
Umumjismoniy tayyorgarlik darajasini baholash
METODIKASI
1-bob. Umumiy qoidalar
1. Nomzodlarning umumjismoniy tayyorgarlik darajasi ularning mazkur Metodikada nazarda tutilgan tegishli mashqlarni bajarishini tekshirish orqali baholanadi.
2. Nomzodlarga dastlab mashqlarni bajarishga qo‘yiladigan talablar va mezonlar hamda mashqlarni bajarish tartibi nomzodlarning umumjismoniy tayyorgarlik ko‘rganligini baholash bo‘yicha kichik komissiya tarkibiga kiritilgan mutaxassislar tomonidan tushuntiriladi.
3. Nomzodlar umumjismoniy tayyorgarlik darajasini baholash tadbirlariga:
fuqaro yoshlar (talabalar) sport kiyimida;
harbiy xizmatchilar harbiy kiyimda kelishlari lozim.
4. Nomzodlar quyidagi mashqlarni bajaradi:
100 metrga yugurish;
turnikda tortilish;
3000 metrga yugurish.
5. Mashqlar oralig‘ida nomzodlarga dam olish uchun kamida 10 daqiqa vaqt beriladi.
6. Belgilangan mashqlarni uzrsiz sabablarga ko‘ra topshirmagan yoxud topshirishdan bosh tortgan nomzodlarga “qoniqarsiz” bahosi qo‘yiladi.
2-bob. Mashqlarni bajarishga qo‘yiladigan talablar va mezonlar
7. 100 metrga yugurish mashqi yuqori yoki quyi startdan amalga oshiriladi.
8. 100 metrga yugurish mashqini fuqaro yoshlar (talabalar) — 15,4 soniya ichida va harbiy xizmatchilar — 15,2 soniya ichida bajargan taqdirda, nomzodlar ushbu sinovdan “o‘tgan” deb hisoblanadi.
9. Ushbu mashq o‘yingohning yugurish yo‘lagi yoki qattiq qoplamaga ega tekis (standart) maydonda yuqori start holatidan bajariladi. Start olish tartibini o‘zlashtirish uchun dastlabki “Startga” va “Diqqat” komandalari hamda “Olg‘a” komandasi beriladi. “Startga” komandasi berilganda, start olish chizig‘iga kelib, kuchli oyoq start olish chizig‘i yaqiniga qo‘yilib, ikkinchi oyoq yarim qadam ortda qoldiriladi. “Diqqat” komandasi berilganda, tana vazni oldinda turgan oyoqqa o‘tkazilib, gavda va bosh oldinga egiladi, qo‘l tirsaklari esa bukiladi. “Olg‘a” komandasi berilganda, yugurish amalga oshiriladi.
10. Turnikda tortilish mashqini bajarishda, qo‘l kaftlari turnikda oldinga qaratilgan holda ushlanib, qo‘llar parallel uzatilgan holda tutiladi, tana bir oz bukilgan, oyoq to‘g‘ri tushirilgan, uchi to‘liq pastga uzatilib, tovonlar juft tutilgan holatdan bajariladi. Qo‘llar bukilib, tana yuqoriga ko‘tarilar ekan, jag‘ turnik ustiga to‘liq chiqarilgan holat qabul qilinadi. Qo‘llar yana to‘liq uzatilar ekan, tana bir maromda pastga tushirilib, dastlabki holat egallanadi. Tananing osilgan holati 1-2 soniya davomida saqlanadi. Juft tutilgan oyoqlarni 45^o gacha bukishga ruxsat beriladi. Tanani siltash, oyoqni old-orqaga tebratish, oyoqlarni chalishtirish, bir qo‘lda osilib olish amallari man etiladi.
Turnikda fuqaro yoshlar (talabalar) — kamida 7 marotaba va harbiy xizmatchilar — kamida 10 marotaba tortilganda, nomzodlar ushbu sinovdan “o‘tgan” deb hisoblanadi.
11. 3000 metrga yugurish mashqlari stadionning yugurish yo‘lakchalari yoki tekis joylarida, umumiy yoki alohida start berilgan holda o‘tkaziladi. Start va marra chiziqlari bir joyda belgilanishi mumkin.
12. 3000 metrga yugurish mashqini fuqaro yoshlar (talabalar) — 14,30 daqiqagacha va harbiy xizmatchilar — 13,35 daqiqagacha bajargan taqdirda, ushbu nomzodlar ushbu sinovdan “o‘tgan” deb hisoblanadi.
13. Ushbu mashq har qanday ochiq tabiatda, umumiy start olgan tarzda bajariladi. Start olish va finish marralari aynan bir joyda yoki alohida jihozlanadi. Yugurish davomida mashq ishtirokchilari bir-biriga xalal bermasligi lozim. Yugurish amalidan yurish amaliga o‘tgan yoki distansiyadan chetga chiqqan ishtirokchi mashqni bajara olmadi, deb hisoblanadi.
14. Nomzodlar belgilangan jismoniy tayyorgarlik darajasini baholash talablarining barchasini muvaffaqiyatli topshira olgan taqdirda, jismoniy tayyorgarlik sinovlaridan “o‘tgan” deb hisoblanadi.
15. Umumjismoniy tayyorgarlik sinovlaridan o‘tmagan nomzodlarga mashqlarni takroriy bajarishga ruxsat berilmaydi.