O‘zbekiston respublikasi oliy va o‘rta maxsus ta’lim vazirligi o‘zbekiston respublikasi qishloq xo‘jaligi vazirligi toshkent davlat agrar universiteti

XVI BOB. SOLIQLARNING IQTISODIY MOHIYATI VA SOLIQ TIZIMI 
 
Mavzuning 
maqsadi: 
O‘zbekiston Respublikasida amaldagi soliq 
qonunchiligiga muvofiq soliqlarning iqtisodiy ahamiyati, soliq tizimining 
xususiyatlari, amaldagi qonunchilikka muvofiq soliq turlari, o‘rmon xo‘jaligi 
tashkilotlarida soliq munosabatlari, soliq munosabatlari jarayonida ishlatiladigan 
soliq tizimi hujjatlari, soliq hisoboti shakllarining tarkibi, soliq hisoboti shakllarini 
to‘ldirish tartibi bo‘yicha tasavvur va bilimga ega bo‘lish, ko‘nikma va malaka 
shakllantirish 
 
Tayanch tushunchalar va iboralar: 
 
Soliqlar deganda - Soliq Kodeksida belgilangan, muayyan miqdorlarda 
undiriladigan, muntazam, qaytarib berilmaydigan va beg‘araz xususiyatga ega 
bo‘lgan, Budjetga yo‘naltiriladigan majburiy pul to‘lovlari tushuniladi. 
Boshqa majburiy to‘lovlar deganda – Soliq Kodeksida belgilangan davlat 
maqsadli jamg‘armalariga majburiy pul to‘lovlari, bojxona to‘lovlari, shuningdek 
vakolatli organlar hamda mansabdor shaxslar tomonidan yuridik ahamiyatga molik 
harakatlarni to‘lovchilarga nisbatan amalga oshirish uchun, shu jumladan muayyan 
huquqlarni yoki litsenziyalar va boshqa ruxsat beruvchi hujjatlarni berish uchun 
to‘lanishi lozim bo‘lgan yig‘imlar, davlat boji tushuniladi. 
Soliq solishning soddalashtirilgan tartibi - soliq solishning ayrim toifadagi 
soliq to‘lovchilar uchun belgilanadigan hamda ayrim turdagi soliqlarni hisoblab 
chiqarish va to‘lashning, shuningdek ular yuzasidan soliq hisobotini taqdim 
etishning maxsus qoidalari qo‘llanilishini nazarda tutuvchi alohida tartibiga 
aytiladi. 
Soliq to‘lovchining soliq to‘g‘risidagi qonun hujjatlariga muvofiq yuzaga 
keladigan majburiyati soliq majburiyati deyiladi.