O‘zi yo‘qdek, ovozasi o‘qdek. Sirli qo‘shin – «Vagner» haqida nimalar ma'lum?

«Vagner»ning Suriyada tor-mor etilishi. Rossiya yo‘qotishlar izini qanday yashirgan?
2018 yil 13 fevralda «Yabloko» partiyasidan Rossiya prezidentligiga nomzod Grigoriy Yavlinskiy Vladimir Putinga murojaat qilib, Suriyada Rossiya fuqarolari borligi va halok bo‘lgani haqida ommaviy hisobot taqdim etishni talab qiladi. 14 fevralda esa prezidentlikka yana bir nomzod Kseniya Sobchak Suriyadagi rossiyaliklar o‘limi yuzasidan parlament tekshiruvini o‘tkazishni taklif qiladi.
2018 yil 14 fevral kuni Vladimir Putinning matbuot kotibi Dmitriy Peskov Suriyada rossiyalik harbiy xizmatchilar yo‘qligi, ma'lum miqdorda harbiy bo‘lmagan Rossiya fuqarolari bo‘lishi mumkinligini tan oladi va rossiyalik yollanma jangchilarning Hashamda ommaviy ravishda halok bo‘lgani haqidagi ma'lumotlarni yolg‘on deb ataydi.
15 fevral kuni Rossiya tashqi ishlar vazirligining rasmiy vakili Mariya Zaxarova Suriyada 5 nafar rossiyalik halok bo‘lganini, ammo ular Rossiya qurolli kuchlariga tarkibida xizmat qiluvchi harbiylar emasligini ma'lum qiladi. «Vagner» jangchilari Suriyada hanuzgacha faoliyat olib borayotgani aytiladi.

Liviyada
2018 yilning noyabrida «Novaya gazeta» Yevgeniy Prigojin Sergey Shoygu va Xalifa Xaftar o‘rtasidagi muzokaralarda ishtirok etgani haqida yozgandi
2020 yil may oyida OAVda BMTning Liviyaga qarshi sanksiyalar bo‘yicha qo‘mitasi kuzatuv missiyasining hisobot ma'lumotlari e'lon qilindi. Unga ko‘ra, Liviyada «Vagner»ning 1200 nafarga yaqin yollanma jangchilari general Xalifa Haftar tomonida turib, Liviyaning xalqaro miqyosda tan olingan hukumatiga qarshi kurashgan. BMT kuzatuv missiyasi hisobotida rossiyalik yollanma jangchilarning soni haqida «bir qancha vizual aloqalar va ochiq manbalardan olingan ma'lumotlarga asoslangan taxminiy raqam» deyiladi.
Hisobotda yozilishicha, rossiyalik yollanma jangchilar Liviyada 2018 yildan beri «harbiy transport vositalarini tuzatish va jangovar operatsiyalarda texnik yordam ko‘rsatish, elektron kuzatuvga qarshi kurashishda maslahat berish» niqobi ostida jangovor harakatlarda ishtirok etmoqda.