Qimmatli qogozlarni royhatga olish tartibi

6-modda. Xazina majburiyatlari
O‘zbekiston Respublikasining xazina majburiyatlari — ularning egalari budjetga pul mablag‘lari berganliklarini tasdiqlovchi hamda bu qimmatli qog‘ozlarga egalik qilishning butun muddati davomida qayd etilgan daromadni olish huquqini beruvchi, taqdim etuvchiga tegishli qimmatli qog‘ozlar turidir.
Xazina majburiyatlarining quyidagi turlari chiqariladi:
uzoq muddatli — besh yil va undan ko‘proq muddatga mo‘ljallangan xazina majburiyatlari;
o‘rtacha muddatli — bir yildan besh yilgacha muddatga mo‘ljallangan xazina majburiyatlari;
qisqa muddatli — bir yilgacha bo‘lgan muddatga mo‘ljallangan xazina majburiyatlari.
Uzoq muddatli va o‘rtacha muddatli xazina majburiyatlarini chiqarish to‘g‘risidagi qaror O‘zbekiston Respublikasi Vazirlar Mahkamasi tomonidan qabul qilinadi. Qisqa muddatli xazina majburiyatlarini chiqarish to‘g‘risidagi qaror O‘zbekiston Respublikasi Moliya vazirligi tomonidan qabul qilinadi. Xazina majburiyatlarini chiqarish to‘g‘risidagi qarorlarda daromadlarni hamda majburiyat qarzlarini to‘lash shartlari belgilab qo‘yiladi.
7-modda. Depozit sertifikatlari
Depozit sertifikatlari — bu pul mablag‘lari — omonat qo‘yilgani to‘g‘risidagi, omonatchi yoki uning huquqiy vorisining belgilangan muddat tugaganidan keyin omonat summasini va unga tegishli foizlarini olishga bo‘lgan huquqini tasdiqlovchi bank — emitent guvohnomasidir.
Depozit sertifikatlarini chiqarish va ro‘yxatdan o‘tkazish qoidalarini O‘zbekiston Respublikasi Markaziy banki belgilaydi.
LexUZ sharhi
Banklarning depozit sertifikatlarini chiqarish, ro‘yxatga olish va muomalaga kiritish qoidalari (ro‘yxat raqami 522, 09.11.1998-y.)ga qarang.
8-modda. Veksel
Veksel beruvchining yoxud vekselda ko‘rsatilgan boshqa to‘lovchining vekselda nazarda tutilgan muddat kelganda veksel egasiga muayyan summani to‘lash yuzasidan qat’iy majburiyatini tasdiqlovchi qimmatli qog‘oz veksel hisoblanadi.
Veksellar oddiy va yuboriladigan veksellarga bo‘linadi.
Veksel beruvchining muayyan summadagi pulni veksel oluvchiga yoxud uning buyrug‘iga binoan belgilangan muddatda yoki uning talabiga ko‘ra to‘lashdan iborat qat’iy majburiyatini o‘z ichiga olgan hujjat oddiy veksel hisoblanadi.
Veksel oluvchining muayyan summadagi pulni oluvchiga yoxud uning buyrug‘iga binoan boshqa shaxsga belgilangan muddatda yoki uning talabiga ko‘ra to‘lash to‘g‘risidagi qatiy buyrug‘idan iborat to‘lovchiga qaratilgan hujjat yuboriladigan veksel hisoblanadi. Bunda to‘lovchi veksel bo‘yicha belgilangan muddatda to‘lovlarni amalga oshirishga (akseptni bajarishga) roziligini yozma ravishda tasdiqlashi shart.
Veksellarni (xazina veksellaridan tashqari) chiqarish, ro‘yxatdan o‘tkazish qoidalari, ularni chiqarish va muomalada yuritish shartlarini Markaziy bank Moliya vazirligi bilan birgalikda belgilaydi. Xazina veksellarini chiqarish va muomalada yuritish qoidalarini O‘zbekiston Respublikasi Moliya vazirligi belgilaydi.
LexUZ sharhi
Qo‘shimcha ma’lumot uchun Korxonalar va tashkilotlar veksellarini chiqarish va muomalaga kiritishning Vaqtinchalik tartibi (ro‘yxat raqami 149, 31.05.1995-y.), shuningdek Banklarning oddiy vekselini chiqarish va uning muomalada bo‘lish qoidalari (ro‘yxat raqami 554, 30.11.1998-y.)ga qarang.
Veksel oluvchining soliqlar bo‘yicha va boshqa majburiy to‘lovlar bo‘yicha budjetdan qarzi mavjud bo‘lsa, u faqat pul mablag‘larini olish tarzida vekselning haqini to‘lashga kirishadi va budjet bilan hisob-kitob qilib bo‘lgach, qolgan summani boshqa hisob-kitoblarga sarflashi mumkin.
(8-modda O‘zbekiston Respublikasining 1995-yil 22-dekabrdagi 179-I-son Qonuni tahririda — Oliy Majlis Axborotnomasi, 1995-y., 12-son, 269-modda)