Режа: Аудитнинг пайдо бўлиши ва ривожланиши

Молияланадиган (узоқ муддатли) лизинг шартномаси бўйича олинган асосий воситалар аудитининг хусусиятлари. Мулкни кейинчалик сотиб олиш ҳуқуқини берувчи молияланадиган лизинг шартномаси бўйича олинган асосий воситалар, биринчидан, лизинг олувчи корхонада 0310-«Узоқ муддатли ижара шартномаси бўйича олинган асосий воситалар» деган счётда ҳисобга олинади. Иккинчидан, асосий воситаларни молияланадиган лизинг шартномаси бўйича олувчи корхоналар уларга ҳар ойда белгиланган умумий тартибда эскириш ҳисоблаб, 0299 счётда акс эттириб боради, (Дебет 2010, 2310, 2510, 2710 счётлар ва кредит 0299 счёт). Учинчидан, ижарага берувчи билан асосий воситалар лизинги учун ҳисоб-китоблар лизинг олувчи корхонада шу мақсадда махсус белгиланган 6910- «Тўланадиган қисқа муддатли ижара ҳақи» ва 7910-«Тўланадиган узоқ муддатли ижара ҳақи» счётларида ҳисобга олинади. Шундай қилиб, аудитор фақат корхонада молияланадиган лизинг шартномаси бўйича олинган ёки берилган асосий воситалар ҳисобини ташкил этишнинг тўғрилигини текширмасдан, балки лизинг олувчи билан лизинг берувчи ўртасидаги ҳисоб-китобларнинг ҳолатини ҳам текшириши лозим. Лизинг олувчи билан лизинг берувчининг ўзаро ҳисоб-китобларини текшириш (солиштириш) далолатномасини ҳам текшириши зарур.
Жисмоний шахслардан ижарага олинган асосий воситалар аудити ҳам айрим хусусиятларга эга. Кўпчилик фирмалар, қўшма корхоналар, ваколатхоналар автомобилларни сотиб олинганидан кўра фойдалироқ бўлгани учун ижарага оладилар. Бунда аудитор автомашинани ишлатиш ва таъмирлаш харажатларини коплаш, ҳисоблашишлар тартиби келишилган ижара шартномаси билан танишиши лозим.
Жисмоний шахслар билан тузилган шартномага кўра ижара тўловлари ижарачи томонидан унинг харажатларига қўшилса (2010, 2310, 2510, 2710 счётлар дебет ва 6910 счёт кредит). Ҳисобланган ижара тўлови суммасидан даромад солиғи ундирилади (Дебет 6910 счёт Кредит 6410 счёт). Ижарага берувчи жисмоний шахсларга улардан ижарага олинган асосий воситалар учун ҳисобланган ижара тўлови суммасидан бюджетдан ташқари фондларга тўловлар ҳисобланмайди.
Агар асосий воситалар объектлари тадбиркор бўлган жисмоний шахслардан ижарага олинса, ҳисобланган ижара тўлови суммасидан даромад солиғи ушланмайди. Корхона бундай тўловларнинг барча турлари бўйича солиқ инспекцияси ҳар чоракликда билдириб туриши лозим. Аудитор корхонанинг ижарага берувчи жисмоний шахслар билан ҳисоб-китобларни ҳисобга олиш қоидалари ва солиқ қонунчилигига риоя қилинаётганлигига ишонч ҳосил қилиши лозим.