Rossiya Donetskdagi yana bir aholi punktini egalladi – Mudofaa vazirligi

Diqqat! Rossiya o‘zbekistonlik migrantlar uchun eshiklarni kattaroq ochmoqchi

Rossiya Federatsiyasi hukumati O‘zbekiston fuqarolarini mehnat bozoriga jalb qiluvchi pilot loyihani sezilarli darajada o‘zgartiruvchi qarorni e’lon qildi. Bu haqda “Kommersant” nashri xabar berdi.
Qayd etilishicha, bu qisman safarbarlik tufayli kuchaygan ishchilar yetishmasligi bilan bog‘liq. Rossiya Bosh vaziri Mixail Mishustin hukumatning 2022 yil 10 noyabrdagi 2035-sonli qarorini imzolagan. Bu 2021 yil oxirida boshlangan O‘zbekistondan mehnat migrantlarini maqsadli jalb etish bo‘yicha pilot loyiha parametrlarini sezilarli darajada o‘zgartiradi 
Ta’kidlanishicha, o‘zbekistonliklar Rossiyaning sanoat korxonalarida ishlashi mumkin. Shu paytgacha O‘zbekistondan mehnat muhojirlari soni qurilish va agrosanoat majmuasida 11 ming kishidan oshmasligi kerak edi. Endlikda, mehnat muhojirlarining soniga nisbatan cheklovlar olib tashlanadi.
Shuningdek, COVID'ga test topshirish va emlanish borasidagi majburiy talablar ham bekor qilingan.
Eslatib o‘tamiz, Prezident Vladimir Putin qisman harbiy safarbarlik e’lon qilganidan keyin minglab rossiyaliklar vatanidan chiqib ketgani aytiladi. Jumladan, Qozog‘istonga ham o‘n minglab ruslar qochib o‘tgan. Ko‘plab ekspertlarning fikriga ko‘ra, Rossiyani birinchi navbatda ziyoli insonlar tark etmoqda.

Zelenskiy Rossiya chekingan Xersonga bordi

Bugun, 14 noyabr kuni Ukraina Prezidenti Vladimir Zelenskiy ukrain qo‘shinlari qo‘lga kiritgan janubiy Xerson shahriga bordi. Bu haqda “Reuters” agentligi yozmoqda.
“Biz olg‘a intilyapmiz”, degan Prezident Ukraina qo‘shinlariga murojaatida. 
Shuningdek, Zelenskiy NATO va boshqa ittifoqchilarga Rossiyaga qarshi urushdagi yordami uchun minnatdorlik bildirgan.
Prezidentning so‘zlariga ko‘ra, Ukraina tinchlikni o‘rnatishga tayyor.
“Biz tinchlikka, butun yurtimiz tinchligiga tayyormiz”, degan Ukraina yetakchisi.
Avvalroq, Rossiya Tashqi ishlar vaziri Sergey Shoygu Qurolli kuchlarning Xersondan chekinishini ma’lum qilgan edi. Rossiya ushbu shaharni joriy yilning 23-27 sentyabr kunlari o‘tkazilgan “referendum” natijalariga ko‘ra, o‘zining abadiy hududi deya e’lon qilgan edi. Shuning uchun, Rossiyaning chekinish to‘g‘risidagi qarori xalqaro maydonda katta mag‘lubiyat sifatida qabul qilindi. Tahlilchilarning qayd etishicha, Prezident Vladimir Putin ushbu mag‘lubiyatga o‘zini beparvo ko‘rsatishga urinmoqda.
Eslatib o‘tamiz, Vladimir Zelenskiy rossiyalik askarlarni Xersonda 400 dan ortiq harbiy jinoyatlarni hujjatlashtirishda ayblagan edi.