Ásker analarin húrmetleymiz

ÁSKER ANALARIN HÚRMETLEYMIZ.

2020-jil 4-yanvar kúni rayon hákimyatiniń kishi májlisler zalinda 14-yanvar Ózbekstan Respublikasi «Watan qorg'awshilar kúni»niń 28 jilliq bayram múnásebeti menen «Ásker analarin húrmetleymiz» atamasinda iláj shólkemlestirildi.Ilájǵa házirgi waqitta Watan aldindag'i óz xizmet waziypasin orinlap atirg'an bir qatar rayon jaslariniń ata-analari mirát etildi.Onda shig'ip sóylewshiler, ásker jigitlerdiń ata-analarin 14-Yanvar Watan qorg'awshilar bayrami menen shin júrekten qutliqlap, xalqimizdiń tinish tatiw turmista jasawina salmaqli úles qosip atirg'an ásker jigitlerdi maqtanish penen tilge aldi.Ilájda áskerlerdiń analari rayon hákimliginiń húrmet jarliqlari hám bahali sawg'alari menen siyliqlandi.

JASLAR BELSENDILIK KÓRSETPEKTE.

2020-jilda Aral teńiziniń qurig'an ultaninan «Jasil qaplamalar»-qorg'aniw tog'aylarin payda etiw jumislari ushin seksewil hám qandim tuqimlarin jiynaw hám egiw jumislari qizg'in alip barilmaqta. Usi munásebet penen Qaraqalpaqstan Respublikasi Ishki isler Ministri A.Temirxanov,Qaraqalpaqstan Respublikasi mámleketlik tog'ay xojalig'i komiteti baslig'i U.Utambetov hәm Qaraqalpaqstan Respublikasi Jaslar awqami baslig'i A.Daniyarovlar rayon jaslari menen ushirasiw ótkerdi. Ushirasiwda Aral teńiziniń qurg'ap qalg'an maydanin kóklemzarlastiriw hám shólge shidamli seksewil tuqimlarin egiwge belsene qatnasiwg'a shaqirdi. Bunnan ruxlang'an rayon jaslari usi kúnniń ózinde Moynaq rayoni aymag'indag'i Aqbetkey elatina barip, seksewil tuqimlarin jiynaw hám egiw jumislarinda pidáyiliq kórsetti. Egis jumislarina járdemge kelgen kómekshilerge rayonliq mádeniyat bólimi hám Ishki isler Ministrliginiń «Aral juldizlari» ansambliniń yoshli konsert bag'darlamalari qoyip berildi.

HAWAZI BÁLENT JAŃLAY BERSIN.

2020- jildiń 4-7-yanvari kúnleri Qazaqstan Respublikasi Nur-Sultan qalasinda ótkerilgen xaliqaraliq kóp janrli "Gloria" festivalinda Nókis mámleketlik pedagogika instituti studenti Bahadir Quwatbaev 19-25-jas aralig'inda akademiyaliq vokal solo jónelisinen grand pri jeńimpazlig'in qolg'a kirgizdi. G'MDA mәmleketleriniń mádeniyat tarawinda qábiletli jaslari sing'a túsken festivalda jerlesimiz «Ájiniyaz» operasinan Ájiniyaz ariyasinan (librettosi I.Yusupov, namasi N.Muxameddinov) ustazi A.Nadirova basshilig'inda kámine keltirip, atqarip shig'ip, eń joqari jeńiske hám tamashagóyler itibarina eristi.

XALIQ DEPUTATLARI QARAÓZEK RAYONLIQ KEŃESINIŃ BIRINSHI SESSIYASI BOLIP ÓTTI

2020-jil 14-yanvar kúni Xaliq deputatlari Qaraózek rayonliq Keńesiniń birinshi sessiyasi bolip ótti. Sessiya májilisine hákimliktiń juwapker qánigeleri, bólimleri, huqiq-qorg'aw uyimlari, jámiyetlik shólkemleri basshilari, puqaralar jiyinlari basliqlari hám g'alaba xabar qurallari wákilleri qatnasti.

Sessiya jumisina Qaraqalpaqstan Respublikasi Joqarg'i Keńesiniń Baslig'i Musa Tajetdinovich Erniyazov qatnasti.

Sessiyaniń kún tártibinde:

- 2019-jil 22-dekabri kúni bolip ótken saylawdiń hám 2020-jil 5-yanvardag'i qayta dawis beriwdiń nátiyjeleri boyinsha qalaliq saylaw komissiyasi baslig'iniń esabati haqqinda;

- Xaliq deputatlari Qaraózek rayonliq Keńesiniń Reglamenti hám turaqli komissiyalar haqqindag'i Rejesin tastiyiqlaw haqqinda;

- Xaliq deputatlari Qara9zek rayonliq Kejesine saylang'an deputatlardiń partiya toparlarin dizimge aliw haqqinda;

- Xaliq deputatlari Qaraózek rayonliq Keńesiniń turaqli komissiyalarin dúziw haqqinda;

- Qaraózek rayoni hákimin tastiyiqlaw haqqindag'i Qaraqalpaqstan Respublikasi Joqarg'i Keńesi Baslig'iniń biyligin tastiyiqlaw haqqinda;

- Qaraqalpaqstan Respublikasi Joqarg'i Keńesi, rayonliq Keńesleri Qospa májilisiniń Másláhát keńesine Qaraózek rayonliq Keńesinen talaban usinis etiw haqqinda máseleler dodalandi.

Sessiyada kórip shig'ilg'an máseleler menen bir qatarda Qaraózek rayoni hákimi etip Jumabaev Roman Abdikadirovich saylandi hám bul boyinsha tiyisli qarar qabil etildi.

SPORTSHILARIMIZDIŃ JETISKENLIKLERI

2020-jil 10-15 yanvar kúnleri Tashkent wálayati Angren qalasinda sporttiń Boks túrinen 2004-2011-jillari tuwilg'an jas óspirimler arasinda 14-yanvar «Watan qorg'awshilar» kúnine arnalip Angren Balalar óspirimler sport mektebiniń ashiq birinshiligi bolip ótti.Bul jarista qońsilas Qazaqstan Respublikasi hám wálayatlardan 250 ge shamalas sportshilar qatnasti. Jaris keskin bellesiwlerge bay tárizde ótkerilip, og'an Qaraózek rayoni Balalar óspirimler sport mektebi shug'illaniwshilarida múnásip qatnasip qaytti. Jaris juwmag'inda 22-kg salmaqta 28-sanli mektep oqiwshisi Arislanbaev Nurim, 32-kg salmaqta Maxsetbaev Sulaymanlar I-orindi, 24-kg salmaqta 28-sanli mektep oqiwshisi Sharipov Nursultan II-orin hám 26-sanli mektep oqiwshisi Karimollaev Jetker III-orinlardi jeńip aliwg'a miyassar boldi.

JALG'ASBAY BERDIMURATOVQA NÓKISTEN JAY BERILDI.

Qazaqstan paytaxti Nur-Sulton qalasinda ótkerilgen sport gúresleri boyinsha jáhán

chempionatiniń klassik jónelisinde 77 kg salmaqta jerlesimiz Jalg'asbay Berdimuratov qarsilaslari ústinen jeńiske erisip, Tokio Olimpiadasina qatnasiw huqiqin qolg'a kiritken edi. J.Berdimuratov házirgi kúnde Berdaq atindag'i Qaraqalpaq Mámleketlik universiteti Dene-tárbiya fakulitetiniń 4-basqishinda oqip atir. Sportshig'a Qaraqalpaqstan Respublikasi Dene-tárbiya hám sport Ministrligi tárepinen 10.000.000 swm hám qimbat bahali sawg'alar berildi hámde sportshiniń jetiskenliklerin inábatqa alip Qaraózek rayoninda jaylasqan turar jayina qurlis jumislari islenip berildi hám Nókis qalasi orayinan 3 xanali jay sawg'a etildi.

QMU studenti Qaraózekli J.Berdimuratov Aziya chempionatiniń jeńimpazi. 2020-jildiń 18-23-fevral kúnleri aralig'inda Hindistanniń Nyu-Deli qalasinda sport gúresleri boyinsha úlken jastag'ilar arasinda Aziya chempionati bolip ótedi.

Quwanishli tárepi, 19-fevral kúni bul jarista Ózbekstan saylandi komandasi quraminda Qaraqalpaq Mámleketlik Universitetiniń studenti Qaraózekli Jalg'asbay Berdimuratov 82 kilogramm salmaqta gilemge shiqti.

J.Berdimuratov bronza medali ushin bolg'an bellesiwde qazaqstanli palwan Evgeniy Polivadovti 8:2 esabinda jeńip shig'ip, Aziya chempionatiniń bronza medalin qolg'a kirgizdi.

Qaraózek rayonliq Xaliq bilimlendiriw bólimine qarasli 10-sani uliwma orta bilim beriw mektebinde sporttiń "Grek-rim gúres" túri boyinsha jáhán chempionati jeńimpazi, 2021-jili Tokio olimpiadasina jollamasin qolg'a kirgizgen jerlesimiz Jalg'as Berdimuratov ózi bilim alg'an mekteptiń oqiwshilari menen ushirasti. Ol óz sózinde óziniń sporttag'i jetiskenlikleri shet el saparlarindag'i utislari haqqinda oqiwshilarg'a aytip berip, olar menen keńnen pikir alisti. Ol Qazaqstan paytaxti Nur-Sultan qalasinda ótkerilgen sport gúresleri boyinsha jáhán chempionatiniń klassik jónelisinde 77 kg salmaqta qarsilaslari ústinen jeńiske erisip, Tokio Olimpiadasina qatnasiw huqiqin qolg'a kiritken edi. Házirgi kúnde Berdaq atindag'i Qaraqalpaq Mámleketlik Universiteti Dene-tárbiya fakulitetin tabisli tamamlap, Olimpiada jarislarina qizg'in tayarliqlar kórmekte. Biz de óz gezeginde Jalg'asbay Berdimuratovqa aldag'i jarislarinda jeńimpaz bolip, elimiz bayrag'in kóklerge kótere beriwine tilekles bolip qalamiz!

BAQSILAR HÁM JIRAWLAR TAŃLAWI ÓTKERILDI.

Usi jildiń 7-fevral kúni 33-sanli uliwma orta bilim beriw mektebinde Ózbekstan Respublikasi Prezidentiniń 2019-jil 14-maydag'i «Baqsishiliq kórkem-ónerin jánede rawajlandiriw is-ilájlari haqqinda»g'i PK-4320-sanli qarari tiykarinda 2020-jildan baslap eki jilda bir márte baqsishiliq kórkem óneri jónelisinde baqsilar hám jirawlar atqariwshilig'i respublika kórik tańlawin shólkemlestiriw hám ótkeriw belgilengen. Usi maqsette rayonliq Mádeniyat bólimi tórepinen rayonimizdag'i qábiletli jaslardi qollap quwatlaw maqsetinde rayonliq Xaliq bilimlendiriw bólimine qarasli mekteplerdiń oqiwshilari arasinda «Baqsilar, hám jirawlar atqariwshilig'i» Respublika kórik tańlawiniń rayonliq basqishi ótkerildi. Tańlawg'a rayonliq Xaliq bilimlendiriw bólimine qarasli mekteplerden talantli 22 baqsilar qatnasip, xaliq qosiqlarinan yoshli namalar atqardi.Tańlaw juwmag'inda jeńimpazlar aniqlanip III-orindi 1-sanli uliwma orta bilim beriw mektebi oqiwshisi Qosnazarov Allabay, II-orindi 26-sanli uliwma orta bilim beriw mektebi oqiwshisi Jańabaeva Dilinazalar iyelegen bolsa, I-orindi 28-sanli uliwma orta bilim beriw mektebi oqiwshisi Sultanova Ug'ilxan iyelep, Respublikaliq basqishqa jollama aldi. Jeńimpazlar «Diplom» hám estelik sawg'alar menen siyliqlandi.

ÓZBEKSTAN XALIQ BILIMLENDIRIW AG'LASI KÓKIREK NISHANI MENEN SIYLIQLANDI

2020-jil 21-fevral kúni Qaraózek rayonliq Xaliq bilimlendiriw bólimine qarasli 1-sanli uliwma orta bilim beriw mektebiniń Geografiya páni mug'állimi Esbog'anova Raysaniń oqiwshisi Bezergenov Majit pánler olimpiadasiniń Qaraqalpaqstan Respublikasi basqishinda birinshi orindi iyelegeni ushin hám usi mekteptiń Qaraqalpaq tili hám ádebiyati páni mug'állimi Sag'iydullaeva Rayxanniń oqiwshisi Tlewova Ayzada pánler olimpiadasiniń Ózbekstan Respublikasi basqishinda birinshi orindi iyelep, joqari oqiw ornina grant tiykarinda oqiwg'a qabil etilgenligi hámde jaslarg'a bilim beriwdey iygilikli isleri menen tájiriybelerin inabatqa alip, mámleketimiz tárepinen Ózbekstan Xaliq bilimlendiriw ag'lasi kókirek nishani menen siyliqlandi.

“QARAÓZEKLI RASUL” FERMER XOJALIG'I RESPUBLIKAMIZDA BIRINSHI BOLIP BIYDAY TAPSIRIW JOBASIN ORINLAP SHIQTI.

Qaraózek rayoni biyilg'i 2020-jilg'i biyday zúrááti ushin 4300 ga maydang'a biyday egip, onnan mámleketke 9693 tonna biyday ónimin jetilistiriwdi rejelestirgen. Nátiyjede fermer xojaliqlari usi maydanlardan kútilgendegidey ónim toplap biyday túyeklew jumislarin shólkemleskenlik penen baslap jiberdi. Rayon aymag'inda fermer xojaliqlari biydaydan mol ónim toplap mámleketlik jobalarin orinlap shiqpaqta. Rayondag'i Qaraózek awil puqaralar jiyininda jaylasqan “Qaraózekli Rasul” fermer xojalig'i rayon hám Respublika kóleminde birinshi bolip mámleketke biyday tapsiriw jobasin orinlap shiqti. Fermer xojalig'i 39 tonna ornina 65 tonna biyday tapsirip zúráátlikti gektarina 65 sentnerge jetkerip, mámleketlik jobasin 167%ke orinladi. Rayonda biyday jiyin terim mapazi shólkemleskenlik penen dawam etpekte.

2020-2021-oqiw jilinda Qaraózek awil xojalig'i kásip-óner kolledji Berdaq atindag'i Qaraqalpaq Mámleketlik universiteti janindag'i Qaraózek agroekonomika texnikumi bolip shólkemlestirildi.

BIR PUQARA MÚDDETINEN ALDIN AZAT ETILDI

Jinayat isleri boyinsha Qaraózek rayoni sudi baslig'i M.Nietullaev basshilig'inda ótkerilgen sud májilisinde erkinen ayiriw menen baylanisli bolmag'an jaza qollanilg'an bir puqara jazani ótew dáwirinde tártip-intizamlarg'a toliq ámel qilg'anlig'i hám islegen isinen shin kewilden pushaymanlig'in esapqa alip insaniyliq prinsipleri tiykarinda Ózbekstan Respublikasi Jinayat Kodeksiniń 73-statiyasina tiykar jazadan múddetinen burin shártli túrde azat etildi.

JEŃIMPAZIMIZDI QUTLIQLAYMIZ!

Respublika Balalar kitapxanasi tárepinen karantin dáwirinde oqiwshilardiń dem alis waqitlarin mazmunli ótkeriw maqsetinde shólkemlestirilgen «JAS KITAPXANLAR» onlayn tańlawina rayonimizdag'i 28-sanli uliwma orta bilim beriw mektebiniń 5-klass oqiwshisi Abdirov Dawletyar belsene qatnasip, 90 ball toplap, qatnasiwshilar arasinda siyli I-orindi iyeledi.

Ózbekstan Respublikasi G'árezsizliginiń jigirma tog'iz jillig'i múnásebeti menen Qaraózek rayoni 2-sanli mámleketlik mektepke shekemgi bilimlendiriw shólkemi metodisti Kewnimjaeva Toxtagúl Qudaynazarovna «Sog'lom turmush» medali menen siyliqlandi.

RAYONDA GIDROPONIKA USILINDA ISSIXANA ASHILDI.

Rayonda G'árezsizligimizdiń 29 jilliq bayraminda "Qalim Bekpolat" fermer xojalig'i tárepinen jańadan qurilip pitkerilgen zamanagóy kórinistegi gidroponika issixananiń ashiliw saltanati bolip ótti. Og'an rayon hákimi sektor basshilari menen awil turg'inlari qatnasti. Ashiliw saltanatta rayon hákimi hám basqalar shig'ip sóylep, awil xalqin G'árezsizlik bayrami menen qizg'in qutliqlap, jumis baslap atirg'an issixananiń awil xalqi ushin abzalliqlari, soniń menen qatar aymaq xalqiniń bántliginiń támiynlenetug'inlig'ina ayriqsha toqtap ótti. Bunnan soń issixananiń ishki jumislari menen tanisip, qurlisshilar menen keńnen pikir alisti hám xaliq ushin islep atirg'an jumislarinda tabislar tiledi. Gidroponikaniń uliwma jer maydani bir gektardi qurap, 595,0 miń AQSh dollarliq jeńilletilgen shet el kredit qarjilari esabinan qurip pitkerilip jumis baslamaqta. Bul demek birinshi náwbette awil puqaralari, jaslardiń jumis penen bánt boliwina tiykar jaratiladi degen sóz. Aldag'i waqitta rayon xalqiniń hám bul jerde jasawshi turg'inlardiń aziq-awqatliq ónimlerine bolg'an talabi toliq orinlanatug'inina gúman joq.

RAYONDA JÁNE BIR IMARATTIŃ ASHILIWI BOLIP ÓTTI.

Rayon orayinan "QARAQUM ABBAZ" jeke kárxanasi tárepinen “Jaslar keleshegimiz” Mámleketlik dástúri tiykarinda zamanagóy kórinistegi kóp tarmaqli xaliqqa xizmet kөrsetiw orayi (avtoshkol, bitovoy texnika, mobil baylanis) imaratiniń ashiliwi bolip ótti.Ashiliw saltanatina rayon hákimi nuraniylar menen sektor basshilari hám jaslar qatnasti. Onda rayon hákimi hám basqalar bul orayda jumis baslap atirg'an jas isbilermenniń aldag'i jumislarina tabislar tilep, rayonda usinday jas isbilermenlerdiń saniniń kóbeyiwine tilek bildirdi.Smetaliq bahasi 1,0 mlrd.swmnan aslam bolg'an bul xizmet orayina “Xalq bank” rayonliq filiali tárepinen kredit qarjilari ajiratilip, qurilis jumislari tolig'i menen alip barildi.Nátiyjede rayonimizdan 20 puqaraniń bántligi támiynlengen bolsa, sonnan 12 sin jaslar quraydi.

QARAÓZEKTEN 5 HAYAL-QIZ JOQARI OQIW ORNINA GRANT TIYKARINDA OQIWG'A QABILLANDI

Prezidentimizdiń baslamasi menen biyilg'i oqiw jilinan baslap hayal-qizlardiń joqari bilim aliw imkaniyatin keńeytiw maqsetinde 4 prosentlik mámleketlik grant tiykarinda kvota ajiratilg'ani elimizde hayal-qizlar ushin úlken imkaniyat boldi. Usi tiykarda Qaraózek rayoni Máhálle hám shańaraqti qollap-quwatlaw bólimi tárepinen 81 hayal-qizdiń múrájatlari kórip shig'ilip, olarg'a usinisnamalar berildi. Rayonnan usi imkaniyat tiykarinda 5 hayal-qiz joqari ball toplap, student boliw baxtina miyassar boldi. Sonnan Qaraqalpaqstan medisinaliq institutina ekewi, Qaraqalpaq mámleketlik universitetine úshewi, grant tiykarinda oqiwg'a qabil etildi. Buniń ushin jaslarimiz Máhálle hám shańaraqti qollap-quwatlaw ministrligine sheksiz minnetdarshilig'in bildirdi. Solardiń ishinde Gulnaz Turabaeva Qaraqalpaqstan medisina institutiniń studenti boliwg'a eristi. Gulnaz Turabaeva kishkeneliginen shipaker boliwdi árman etken. Oniń endigi maqseti xaliqtiń den-sawlig'in bekkemlew, sapali medisinaliq xizmet kórsetiw bag'darinda elimizde alip barilip atirg'an islerge óz úlesin qosiw ushin tereń bilim aliw bolip tabiladi. Qaraózek rayonliq máhálle həm shańaraqti qollap-quwatlaw bóliminiń juwapli xizmetkerleri Gulnazdi erisken tabisi menen qutliqlap arnawli sertifikat hám sawg'alarin tapsirdi. Elimizde hayal-qizlardiń joqari bilimge iye boliwi ushin jaratilip atirg'an keń imkaniyatlar olardiń kásip hám ónerge iye boliwi arqali ómirde óz ornin tabiwina negiz boladi.

ARTEZIAN QUDIG'INAN SUW SHIQTI

Házirgi waqitta rayonimizdiń bir qatar aymaqlarinda sharwashiliq tarawin rawajlandiriw maqsetinde artizan qudiqlarin qaziw jumislari qizg'in alip barilmakta. Usinday jumislardiń nátiyjesinde búgin rayonimizdiń “Quralpa” awil puqaralar jiyini aymag'inan 500 metr tereńlikten suw shiqti. Usi múnásibet penen rayon hákimi hám rayon prokurori “Quralpa” awil puqaralar jiyini aymag'ina barip, ol jerdegi islenip atirg'an jumislar menen tanisti hám isshilerge úlken minnetdarshiliq bildirdi.Álbette, usi aymaqtan shiqqan bulaq, xaliqtiń suwg'a bolg'an mútájliklerin hám sharwa mallarin suwg'ariwda keń qolayliqlar jaratadi.

ENDI "ShERIMBET" AWILINIŃ BALALARI JAŃA IMÁRATTA BILIM ALADI

Qaraózek rayoni 2-sektor aymag'indag'i "Quralpa" APJ dag'i 20-sanli mektep filialiniń eski imarati jillar boyi awil xalqin qiynap keler edi. Respublika hám rayon basshilari awil turg'inlariniń múrájatlarin esapqa alip mektep imaratin iri ońlaw dástúrine kirgizdi. Búgin awil xalqi ushin úlken quwanishli jag'day boldi. Jańa imarattiń ashiliw saltanati bolip og'an rayon hákimi, rayon prokurori menen awil turg'inlari qatnasti. Ilaj dawaminda rayon hákimi awil xalqin hám mektep oqiwshilarin jańa imarattiń ashiliwi menen qutliqladi. "Sherimbet" awil turg'inlari el basshilarina óz minnetdarshiliqlarin bildirdi. Miymanlar mekteptiń ishki qolayliqlari klass jaylari menen tanisti.

RAYONDA JAŃADAN MÁMLEKETLIK EMES MEKTEPKE SHEKEMGI BILIMLENDIRIW SHÓLKEMI ASHILDI

Rayondag'i «Berdaq» awil puqaralar jiyini «Kóbeyshúngil» úlgili massiv aymag'inan 75 oring'a mólsherlengen mámleketlik jeke menshik sherikshilik tiykarinda «BUKVARYONOK» mámleketlik emes mektepke shekemgi bilimlendiriw shólkeminiń ashiliw saltanati bolip ótti. Onda rayon hákimi U.Utambetov Qaraqalpaqstan Respublikasi mektepke shekemgi bilimlendiriw ministri J.Usnatdinova hám bir qatar nuraniylar shig'ip sóylep, balalar baqshasiniń ashiliwi menen bárshe qatnasiwshilardi qizg'in qutliqladi.Bunnan soń kelgen miymanlar baqshaniń ishki qolayliqlari kishkenelerimizge jaratilg'an sharayatlar menen jaqinnan tanisti. Ashiliw máresiminde baqsha balalariniń tayarlag'an qosiq,taqmaqlari bárshege úlken zawiq bag'ishladi. Baqsha qurlisi boyinsha qosimsha mag'liwmat: Balalar baqshasiniń uliwma smetaliq bahasi 3 mlrd 085 mln swm bolsa, sonnan 2 mlrd 314 mln swm jeńilletilgen kredit qarjisi esabinan, 771 mln swm óz qarjisi esabinan qurilip pitkerildi. Jańadan boy tiklegen «BUKVARYONOK» mámleketlik emes mektepke shekemgi bilimlendiriw shólkemi 90 balag'a shekem qabillaw imkaniyatina iye.

RAYONDA JÁNE BIR EMLEW ORAYI JUMIS BASLADI.

Búgin rayondag'i Ak.S.Kamalov awil puqaralar jiyininda jaylasqan «Qarakól» awilliq shipakerlik punkti imaratiniń ashiliw saltanati bolip ótti. Og'an rayon hákimi U.Utambetov Qaraqalpaqstan respublikasi den-sawliqti saqlaw ministri M.Qurbanov hám bir qatar awil aqsaqallari menen medisina xizmetkerleri qatnasti. Onda shig'ip sóylewshiler bársheni emlew orayiniń ashiliwi menen qizg'in qutliqlap, qurilisshilarg'a óz minnetdarshiliqlarin bildirdi. Bunnan soń emlew orinindag'i nawqaslar ushin jaratilg'an qolayliqlar hám ishki múmkinshilikleri menen tanisip shiqti. Jańa imárattiń qurilis jumislarina rayonliq jergilikli byudjet esabinnan 872,0 mln qarji ajiratilip, “Qaraózek Aydos” jeke menshik kárxanasi tárepinen iri ońlaw jumislari alip barildi.

JERLESIMIZ 14 MÁMLEKET JASLARI ARASINDA SIYLI I-ORINDI IYELEDI.

Qaraózek rayoni jaslariniń hár bir tarawda erisip atirg'an jetiskenlikleri, baslama hám iskerlikleri kózdi quwandiradi. Búgingi kúnde Ózbekstan Mámleketlik Konservartoriyasinda milliy muzika sirlarin tereńnen meńgerip hám ilim jolinda da dáslepki qádemin atqan jaslardiń biri Gulnaz Allambergenova. Ol «G'árezsiz Mámleketler Dosliq Awqaminiń eń jas alimi-2020» xaliqaraliq tańlawinda 14 mámleket jaslari arasinda mádeniyat jónelisi boyinsha qatnasip, siyli I-orindi iyeledi hám arnawli kókirek nishani, dárejeli diplom menen siyliqlandi. Tańlaw awqam mámleketleri joqari oqiw orinlari studentleri arasinda ótkerilip, bundag'i maqset belsendi, izleniwsheń jaslardi qollap-quwatlaw, ilim-pán, texnika rawajlaniwina úlesin qosip kiyatirg'an jaslardi múnásip siyliqlawdan ibarat edi. Gulnaz bul tańlawda da óziniń ilimiy miynetleri menen qatnasti hám joqari baha aldi. Jas hám talapshań qizimizdiń usi kúnge shekem erisken jetiskenlikleri de talay g'ana. Mádeniyat tarawi boyinsha respublikamizda jetik qánigeler tayarlawshi Konservatoriyag'a imtixansiz kiriw baxtina miyassar bolg'an jas qábilet iyesi respublika hám xaliqaraliq tańlawlarda joqari jetiskenliklerge erisip kelmekte. Bir g'ana usi jildiń ózinde milliy mádeniyatimizdiń kóp qirlilig'in úgit-násiyatlawda Rossiya mámleketiniń Mádeniyat tarawi boyinsha «Letnyaya olimpiada» xaliqaraliq tańlawinda I-orin, Ukrainada shólkemlestirilgen «Holly music» xaliqaraliq tańlawinda I-orin hám Tashkent qalasinda ótkerilgen «Sharq atirguli» balalar hám jaslar xaliq araliq tańlawi Gran-Pri iyesi atandi. Kishkeneliginen milliy muzika, saz ásbaplarina jani qumar bolip ósken Gulnazdiń endigi maqseti milliy mádeniyatimizdi elede rawajlandiriw hám xaliqaraliq kólemde en jaydiriwdan ibarat. Zulfiya atindag'i Mámleketlik siylig'ina erisip, jaslarg'a ustazliq etiwdi aldina maqset etken qábiletli jasqa talmas g'ayrat, bálent párwaz tileymiz!

JERLESIMIZ ÓZBEKSTAN CHEMPIONI BOLDI.

Qaraózek rayoninda keyingi jillari jaslarimiz arasinda Ózbekstan hám Qaraqalpaqstan chempionlariniń qatari tolisip, rayonimiz maqtanishi bolip kiyatir. Solardiń biri Gozzal Allayarova. Ol 2001-jili Qaraózek rayoninda tuwilip, 28-sanli mektepte bilim aldi. Jaslayinan sportqa qiziqqan Gozzal, rayonimizdag'i balalar hám jas óspirimler sport mektebinde sporttiń “Erkin gúres” túri menen shug'illandi. Mektepti jaqsi bahalar menen tabisli tamamlap, Nókis Olimpiya rezervleri kollejinde oqiwin dawam etti hám usi jili grant tiykarinda Tashkent mámleketlik “Fizkulitura hám sport universiteti” niń studenti boliw baxtina miyassar boldi. Bunnan soń usi jerde sporttiń erkin gúres túri boyinsha shinig'iwlar alip bardi. Gozzal usi jildiń noyabri ayinda sporttiń erkin gúres túrinen Nawayi qalasinda ótkerilgen Ózbekstan chempionatinda qarsilaslarinan ústin kelip jeńimpazliqti qolg'a kiritti. Házirgi kúnde Tashkent qalasindag'i “Dinamo” sport kompleksinde shug'illanip atir. Biz jerlesimiz Gozzaldiń usinday jetiskenligi menen qutliqlap, aldag'i jarislarinda elimiz bayrag'in kóklerge kótere beriwine tilekles bolip qalamiz.

QARAÓZEK RAYONINDA 1 MLN. 200 MIŃ TONNA SEMENT ISLEP ShIG'ARIW ZAVODIN QURIW BOYINSHA MEMORANDUM DÚZILDI

Qaraózek rayonina xizmet sapari menen kelgen Ózbekstan Respublikasi Sirtqi isler ministrligi wákilleri, mámleketimizdiń sirt ellerdegi ayriqsha hám toliq huqiqli elshileri hám diplomatiyaliq wákilxanalari basshilari hám xaliqaraliq shólkemler wákillerinen ibarat delegasiya ag'zalari, búgin rayong'a kelip rayon hákimi tiyisli taraw basshilari hám isbilermenler menen ushirasiw ótkerdi. Ushirasiwdiń tiykarg'i maqseti, rayonimizda jańa joybarlardi ámelge asiriwda birge islesiw ushin shet el investorlarin tabiw hám islep shig'arilip atirg'an ónimlerdi eksport qiliwda shet mámleketlerden qariydar tabiwda ámeliy járdem kөrsetiw bolip tabiladi.

Ózbekstan Respublikasiniń Belgiya mámleketindegi elshisi járdeminde, Nederlandiya mámleketiniń “Arona international B.V” kompaniyasiniń wákili Dedamirzaev Temur Turgunpolatovich hám Qaraózek rayoni hákimiligi ortasinda jilliq quwatlilig'i 1 mln. 200 miń tonna mug'darinda sement islep shig'ariw zavodin quriw boyinsha memorandum dúzildi. Sonday-aq usi kúni delegasiya ag'zalari rayonliq birlesken emlewxanag'a medisinaliq buyimlardi tapsirdi.

“QOYBAQ SHAŃARAQ SHIPAKERLIK PUNKTI JUMIS BASLADI.

Qaraózek rayonindag'i “Qoybaq” APJ aymag'inan “Qoybaq Shańaraq shipakerlik punkti” niń ashiliw saltanati bolip ótti. Og'an rayon hákimi U.Utambetov, Qaraqalpaqstan Respublikasi den-sawliqti saqlaw ministri M.Qurbanov hám bir qatar medisina xizmetkerleri menen awil turg'inlari qatnasti. Onda shig'ip sóylegenler awil xalqin xizmet kórsetiw orniniń ashiliwi menen qutliqlap, ondag'i jaratilg'an qolayliqlar hám zamanagóy medisinaliq úskenelerdiń abzalliqlarina toqtap ótti. Usi kúni Qaraqalpaqstan Respublikasi kóz kesellikleri emlewxanasinan kelgen bir qatar shipakerler aymaq xalqin medisinaliq kórikten ótkerdi.