"spirituality and educational" centre under the high and secondary ministry of

INFLYATSIYA DARAJASINI PASAYTIRISH CHORALARI 
MUHOKAMA QILINDI 
Prezident Shavkat Mirziyoyev huzurida joriy yilda inflyatsiya darajasini 
pasaytirish choralari muhokamasi yuzasidan yig‘ilish o‘tkazildi. 
Ma’lumki, inflyatsiya faqatgina makroiqtisodiy ko‘rsatkich emas, aholi 
daromadi va turmush tarziga ta’sir qiluvchi omil hisoblanadi. 2022 yil yakuni bilan 
yurtimizda inflyatsiya 12,3 foizni tashkil etgan edi. Barcha iqtisodiy mexanizmlarni 
qo‘llab, joriy yilda bu ko‘rsatkichni 10 foizdan pastga tushirish maqsad 
qilinmoqda.
 
Buning uchun iste’mol tovarlari, shu jumladan, oziq-ovqat mahsulotlari ishlab 
chiqarish hajmini oshirish, ularni “daladan dasturxongacha” yetkazib berishdagi 
xarajatlarni qisqartirib, arzon bo‘lishini ta’minlash zarurligi ta’kidlandi. Qishloq 
xo‘jaligi mahsulotlari yetishtirishni ko‘paytirish uchun aholiga ajratilgan jami
200 ming gektar yerdan unumli foydalanish bo‘yicha ko‘rsatmalar berildi. 
Ushbu chora-tadbirlarni tizimli tashkil etish uchun hududlar salohiyatidan kelib 
chiqib, har bir tuman va shahar bo‘yicha alohida “yo‘l xaritalari” ishlab chiqish 
vazifasi qo‘yildi. 

---

Aholi daromadlarini oshirishda ularning bo‘sh pul mablag‘larini moliya 
bozoriga jalb qilish muhim ahamiyatga ega. Bu borada yaratilayotgan qulayliklar o‘z 
natijasini bermoqda. Jumladan, oxirgi uch yilda aholining bankdagi omonatlari
2 baravarga oshdi. 
Lekin, bu yo‘nalishda hali imkoniyatlar ko‘p. Shu bois yig‘ilishda aholi uchun 
jozibador moliyaviy xizmatlar turlarini ko‘paytirish bo‘yicha ko‘rsatmalar berildi. 
AZIM POYTAXTIMIZ YANADA OBOD, INFRATUZILMASI 
RIVOJLANGAN SHAHARGA AYLANADI 
 
Prezident Shavkat Mirziyoyev 8 fevral kuni poytaxtimizdagi bir qator muhim 
loyihalar bilan tanishdi, mahalla ahli bilan suhbatlashdi. Shuningdek, mas’ullar va 
jamoatchilik vakillari ishtirokida dolzarb masalalarni muhokama qildi. 
Davlatimiz rahbari dastlab Toshkent metropolitenidagi bunyodkorlik ishlari 
bilan tanishdi. 
Inson uchun o‘z mehnatlari samarasini ko‘rish, odamlarga quvonch ulashish – 
katta baxt. Mamlakatimizda xalqning mushkulini oson, uzog‘ini yaqin qilishga 
qaratilgan bunday xayrli ishlar juda ko‘p. 
Birgina transport sohasini olganda, so‘nggi yillarda ulkan loyihalar amalga 
oshirildi. 2020 yil avgustda Toshkent yerusti metrosining birinchi bosqichi ishga 
tushirilgan edi. O‘sha yil dekabrda Sergeli yo‘nalishi ochildi. bugungi kundagi 
yo‘lovchilar oqimidan bilish mumkinki, bu loyihalar o‘zini to‘la oqladi. 
Bu ishlar izchil davom ettirilib, mazkur ikki yo‘nalishni bog‘lovchi Qo‘yliqdan 
Sergeligacha bo‘lgan metropoliten barpo etilmoqda. Qariyb 12 kilometrlik bu qismda 
7 ta bekat bo‘ladi. Ayni kunlarda uning Quruvchilar dahasigacha borgan 5 ta bekati 
qurib bitkazildi. 
Davlatimiz rahbari ushbu transport inshootini borib ko‘rdi. Nuroniylar va 
faollar bilan suhbatda loyihaning ahamiyati haqida so‘z bordi. 
– Oxirgi yillarda bu borada ham tajriba to‘pladik. Qo‘yliq yo‘nalishida
7 ta, Sergelida 5 bekatli yerusti metrolari qurildi. Oldin Toshkent metropolitenidan 
240 ming yo‘lovchi foydalangan bo‘lsa, bugungi kunda 600 mingdan oshdi. Rejamiz 
– 1 million yo‘lovchi. Agar o‘z vaqtida buni boshlamaganimizda, shahar transportida 
kollaps bo‘lishi mumkin edi. Endi muqobil energetikani ham o‘rganmasak bo‘lmaydi, 
– dedi Shavkat Mirziyoyev. 
Prezidentimiz jamoatchilik vakillari bilan birga metroda yurdi. 
Quruvchilar dahasidan Qipchoq bekatigacha bo‘lgan qariyb 4 kilometrlik 
metro yo‘li ham yaqin oylarda ishga tushiriladi. Shu tariqa, Qo‘yliq va Sergeli 
orasidagi qatnov vaqti 15 daqiqani tashkil etadi. Mazkur yo‘nalish bir kunda
40 mingga yaqin yo‘lovchiga xizmat ko‘rsatish quvvatiga ega bo‘ladi. 
Buning evaziga shaxsiy transportlarga ehtiyoj kamayib, tirbandlik bartaraf 
etiladi. Xususan, Qo‘yliq – Sergeli yo‘nalishida harakatlanadigan kunlik avtomobillar 
soni 40 mingtagacha qisqarib, transport oqimi 12 foiz kamayishi mumkin. 
Umuman, ushbu bosqich qurib bitkazilishi bilan Toshkent metropolitenining 
jami uzunligi 70 kilometrdan ziyod, bekatlar soni 50 ta bo‘ladi. Metroda yuruvchi 
kunlik yo‘lovchilar soni 650 minggacha yetadi. 245 ta yangi ish o‘rni yaratiladi. 

---

Prezident Shavkat Mirziyoyev poytaxtimizdagi «Aysel Energy» mas’uliyati 
cheklangan jamiyati faoliyati bilan tanishdi. 
Ma’lumki, bu yilgi qish ancha sovuq bo‘lgani elektr energiyasi tizimidagi 
muammolarni yaqqol yuzaga chiqardi. Xususan, ayrim eski transformatorlar 
yuklanishni ko‘tara olmay, elektr ta’minotida uzilishlar kuzatildi. 
Davlatimiz rahbari soha mutasaddilariga elektr tarmoqlarini yangilash, zarur 
jihozlar ishlab chiqarishni kengaytirish bo‘yicha topshiriqlar bergan edi. Bu tashrif 
o‘sha vazifalar ijrosi, kelgusida energetik muammolarning oldini olishga qaratilgan 
ishlarning bir qismi. 
«Aysel Energy» yiliga 10 ming dona yirik elektr uskunalari ishlab chiqarish 
quvvatiga ega. Turkiya texnologiyasi o‘rnatilgan korxonada mahalliylashtirish 
darajasi 70 foizga yetgan. Natijada mahsulot ishlab chiqarish tannarxi va o‘rnatish 
xarajati kam. Bu eskirgan transformatorlarni nafaqat poytaxtda, balki butun 
respublikada yangilash imkonini beradi. 
Mutasaddilar bu yil mamlakatimizda 3 ming 200 ta transformator, 12 ming 
kilometr kabellarga zarurat borligi haqida axborot berdi. Davlatimiz rahbari import 
tahlilidan kelib chiqib, ishlab chiqarish hajmini oshirish, mahalliy mahsulotlarga 
buyurtmalarni ko‘paytirish muhimligini ta’kidladi. 
Umuman, energetika sohasidagi bunday ishlar elektr tarmoqlarining 
barqarorligini oshirishda muhim omil bo‘ladi. 
Davlatimiz rahbari Sergeli tumanidagi Ezgulik mahallasida bo‘lib, aholi hayoti 
bilan tanishdi. 
Bu yerda 26 ta ko‘p qavatli uy bor, 6 mingdan ziyod aholi yashaydi. 
Prezidentimiz mahalla vakillaridan hol-ahvol so‘radi. Nuroniylar o‘tgan sovuq 
kunlarda xalqimizning va davlat idoralari xizmatchilarining birligi bilan qiyinchilik 
ortda qoldirilganini aytishdi. Energetika va kommunal xizmatlar 24 soat davomida 
ishlagan, tezkor choralar ko‘rib borilgan. Xususan, mahalladagi transformator ham 
yangilangan. 
– Bu bizga saboq bo‘lishi kerak. Energetikada 3-4 karra ko‘proq zaxira 
yaratishimiz zarur. Shuning uchun qayta tiklanuvchi energetikani rivojlantirishga 
e’tibor beryapmiz. U – muqobil, ishonchli va ekologik toza, – dedi davlatimiz rahbari. 
Mahallalardagi ustuvor vazifa aholi bandligi va yoshlar tarbiyasi ekani 
ta’kidlandi. Shu bois ham bu yil yurtimizda “Insonga e’tibor va sifatli ta’lim yili” deb 
e’lon qilindi. O‘quvchilar maktabda ikkita xorijiy til va bitta kasb o‘rganib chiqishi 
uchun sharoit yaratilmoqda. Xalqimiz bu harakatni qo‘llab-quvvatlamoqda. 
Nuroniylar yurtimizga tinchlik-xotirjamlik, xalqimizga farovonlik tilab duo 
qildi. 
Shundan so‘ng Prezident Shavkat Mirziyoyev Toshkent shahrida energetika va 
transport infratuzilmasini rivojlantirish, mahallalarni obod qilish va aholi bandligini 
oshirish masalalari bo‘yicha yig‘ilish o‘tkazdi. 
Unda shahar va tumanlar mutasaddilari, jamoatchilik vakillari ishtirok etdi. 
Avvalo, energetika masalalariga e’tibor qaratildi. Bu boradagi qo‘shimcha 
manbalardan biri qayta tiklanuvchi energiya. Toshkent shahrida kamida 2 ming 
megavattga yaqin quvvatli quyosh panellarini o‘rnatish mumkinligi qayd etildi. 
Xususan, ko‘p qavatli uylar, ijtimoiy ob’ektlar va boshqa binolarning tom 
qismi, sanoat zonalari, avtoturargoh va yirik suv inshootlari hududini qamrab olish 

---

mumkin. Bu choralar ko‘rilsa, hisob-kitoblarga ko‘ra, 2023 yilda kutilayotgan
240 million kilovatt soatlik qo‘shimcha talabni 4 baravar ortig‘i bilan, ya’ni 1 milliard 
80 million kilovatt soat hajmda ta’minlash imkoniyati paydo bo‘ladi. 
Prezidentimiz elektr ishlab chiqarishda davlat monopoliyasidan ketib, raqobatli 
muhit joriy qilish zarurligini ta’kidladi. Jumladan, davlat panel o‘rnatgan 
tadbirkorlardan elektrni kafolatli sotib oladi. Keyingi yildan esa boshqa 
iste’molchilarga ham sotishi mumkin bo‘ladi. Aholi o‘z xonadonida panel o‘rnatsa, 
ehtiyojidan ortiq tarmoqqa sotgan elektr energiyasining har bir kilovatti 1 ming 
so‘mdan sotib olinadi. 
Shu bois, sanoat zonalari va yirik korxonalarda 400 million kilovatt soatlik 
quyosh panellari o‘rnatish, Yuqori Chirchiq tumanida 500 megavattli quyosh elektr 
stansiyasini qurish choralari belgilandi. Ijtimoiy soha va davlat idoralari binolarida 
ham quyosh panellari o‘rnatish, sanoat korxonalarida elektr yo‘qotishlarini 
kamaytirish, magistral issiqlik tarmoqlari va 1 ming 817 ta ko‘p qavatli uyning ichki 
isitish tizimini yangilash bo‘yicha topshiriqlar berildi. 
Umuman, shaharda qayta tiklanuvchi energiya joriy qilish uchun 1 milliard 
dollar yo‘naltiriladi. 
Yig‘ilishda 2023 yilda poytaxtda aholi bandligini ta’minlash masalalari 
ham muhokama qilindi. 
Yangi ish o‘rinlarini yaratish bo‘yicha ulkan marralarga erishishda 
tadbirkorlarga tayanish, ularni qo‘llab-quvvatlash lozimligi ta’kidlandi. 
Jumladan, bu yili Toshkent shahrida xizmatlar sohasini rivojlantirish uchun
20 trillion so‘m kredit yo‘naltiriladi, oilaviy tadbirkorlik uchun 300 milliard so‘m 
imtiyozli kreditlar ajratiladi. 
Shahar mahallalarida ijtimoiy va ishlab chiqarish infratuzilmasini yaxshilash 
uchun 1,4 trillion so‘m, shuningdek, “Tashabbusli byudjet” doirasida 573 milliard 
so‘m yo‘naltirilishi qayd etildi. 
Prezident mahallalarni obod qilish, yo‘llar va suv inshootlarini ta’mirlash 
masalalariga ham to‘xtaldi. Shuning uchun shahardagi 584 ta mahallaning har biriga 
byudjetdan qo‘shimcha 1 milliard so‘mdan, jami yana 584 milliard so‘m ajratishga 
qaror qilindi. 
Yig‘ilishda jamoat transporti sohasiga yana bir bor e’tibor qaratildi. 
Yo‘lovchilarga qulayliklarni oshirish maqsadida 1 aprelga qadar qo‘shimcha mingta 
avtobus olib kelinib, 25 ta ko‘chada avtobuslar uchun alohida yo‘laklar tashkil etilishi, 
svetoforlarni yo‘lovchi oqimiga qarab boshqarish, avtoturargohlar va parkomatlar 
tashkil qilinishi aytildi. 
Davlatimiz rahbari qurilishga ruxsat berilganda, mavjud infratuzilmaga 
yuklama bo‘yicha aniq hisob-kitob qilinmayotgani, yashil maydonlar tashkil qilish 
ishlari qurilishlar bilan hamohang olib borilmayotganini tanqid qildi. Shu bois, 
shaharning bosh rejasi tasdiqlanmaguncha yangi qurilishlarga moratoriy e’lon 
qilinadi. 
2023 yilda Toshkent shahrining yashillik darajasini 28 foizga yetkazish vazifasi 
qo‘yildi. Shu maqsadda 100 gektar maydonda bog‘ tashkil qilinib, “Toshkent yashil 
belbog‘i” loyihasi boshlanishi aytildi. 

---

Poytaxtda chiqindi bilan ishlash ham qoniqarsiz ekani ko‘rsatib o‘tildi. 
“Maxsustrans” faoliyatini isloh qilish, chiqindilarni qayta ishlash darajasini 50 foizga 
yetkazish vazifasi qo‘yildi.