Sxematexnika moduliga kirish. Elektr sxemalar asoslari

1-Ma’ruza: Elektromagnit maydon hamda elektr va magnit zanjirlariga oid asosiy tushuncha va qoidalar.

Reja

1. Materiyaning maydon shakli.

2. Elektr maydonlarining manba’si.

3. Zaryadlarning saqlanish qonuni va uning differensial shakli.

4. Elektrostatik maydon kuchlanganligi.

5.Kuch chiziqlari.

6. Elektr maydonlari uchun Superpozitsiya prinsipi.

7. Nuqtaviy zaryadning elektr maydon kuchlanganligi.

Darsning maqsadi: Talabalarga elektr maydoni materiyaning bir ko’rinishi ekanligi, elektr maydonining manbasi zaryad ekanligi va zaryadlarning saqlanish qonuni, maydonni bir emas bir nechta zaryadlar hosil qilganda natijaviy maydonning kuchlanganligini hisoblash usuli haqida ma’lumotlar berish.
O’quv faoliyatining natijalari:

1.	Elektr maydoni va uning manbasi haqida tasavvurga ega bo’ladi.
2.	Elektr zaryadlarning saqlanish qonunini o’rganadi.
3.	Elektr maydon kuchlanganligi va kuch chiziqlari to’g’risida bilimlarga ega bo’ladi.
4.	Nuqtaviy zaryad va nuqtaviy zaryadlar sistemasining elektr maydon kuchlanganligini hisoblashni o’rganadi.

Tabiatda ikki xil zaryad bor: musbat va manfiy. Bir xil ismli zaryadlar (ikkita musbat yoki ikkita manfiy) bir-biridan itariladi, har xil ismli zaryadlar (bitta musbat va bitta manfiy) bir-biriga tortiladi. Zaryadlarning ta’sirlashuvi ular orasida ta’sirlashuvni uzatuvchi materiya borligidan darak beradi, u elektr maydoni deb nomlanadi.