Tdshu koreysshunoslik fakulteti 4-kurs koreys-ingliz guruhi talabasi

TDSHU koreysshunoslik fakulteti

4-kurs koreys-ingliz guruhi talabasi

Abdumalikova Nasiba

Li Bom Sonning "Daydi o'q" asarida umummasala

muammosi

Koreys yozuvchisi Li Bom Son 1920-yilda Shimoliy Koreyada tug'ilgan. Uning "Daydi o'q" asari unga tanqidiy tanqidlar bilan birga mashhur bo'lishiga ham sabab bo'lgan. Uning Ikkinchi Jahon Urushidan keyingi mamlakatning bo'linishi, Koreya urushi va uning oqibatlaridan aziyat chekayotgan koreyslarni kuchli va realistik tarzda tasvirlagan. "Daydi o'q" asari unga ulkan shuhrat olib kelgan.

"Bir millatdan iborat ikki davlat" atamasi Shimoliy va Janubiy Koreyaga xosdir. 1910- yildan to Ikkinchi jahon urushiga qadar yagona Koreya davlati Yaponiyaning mustamlakasi bo‘lgan. Yaponlar bu hududdan turib nafaqat Koreyani, balki Xitoyning katta hududlarini nazorat qilishgan. Koreyaning bo‘linib ketishida aynan mana shu jihat asosiy sababi bo'lgan. Ikkinchi jahon urushi yakuniga ko‘ra, hududni yaponlardan ozod qilish zarurati tug‘iladi. Shimol tarafidan sobiq SSSR, janubdan esa AQSh va uning ittifoqchilari Koreya yarimorolini yapon bosqinchilaridan ozod qilishdek "ezgu maqsad" yo‘lida birlashishadi. Ular mamlakat hududini 38-paralleldan qoq ikkiga bo'lib, ikki tomonga o‘z askarlarini joylashtirishadi. Janub va Shimol ikki tomonga qarab keta boshlaydi. Bu 38-parallel ikki davlat o‘rtasidagi ramziy jarlikka aylanib qoldi.

Li Bom Sonning "Daydi o'q" asarida ana shu jarlik qurbonlarining hayot tarzi, ularning ichki kechinmalari aks ettirilgan edi. Seuldagi Ozodlik qishlog'i deb atalgan shahar Ikkinchi Jahon urushidan keyin janubga qochib ketgan Shimoliy Koreyalik qochqinlarning makoni edi. Ular Janubiy Koreyaning begona muhitida bir joyda to'planishgan ko'plab oilalar bor edi. Shu oilalardan biri hisobchi-ekspert bo'limi kotibi Song Chol- honing oilasi bo'lib, unda oilaning kattasi to'ng'ich farzand Chol-ho hisoblanardi. Oiladagi hamma vazifalar Chol-honing zimmasiga yuklatilgandi. Boshqa makonda qo'nib topgan bu oilada umidsizlik, qashshoqlik, vatan sog'inchi hukm surardi. Ularning bu yerdagi hayot tarzi juda ham og'ir edi. Ular o'z yurtlari bo'lmish Shimoliy Koreyada to'kin-sochinlikda umr go'zaronlik qilishgan edi. Mana shu 38-parallel tufayli ular hozir mana shunday og'ir ahvolda edilar. Chol-honing onasi hadeb takrorlaydigan "ketaylik" so'zi esa uyning har bir burchagida jaranglab turardi. Oldinlari baxtli bo'lgan oilaning mana shu urush tufayli zavolga yuz tutishi achinarli hol edi. O'z axloqiga to'g'ri kelmaydigan ishlarni qilishga majbur bo'lgan Chol-honing singlisi Myong-suk ham mana shu qashshoqlikning qurboni bo'ldi.

Urush qayerda bo'lmasin u hech kimga farovonlik, boylik, baxt olib kelmagan. Urush ayriliq, o'lim nafasi, umidsizlik, qashshoqlik, jabr-zulm, ko'z yoshilar ummonidir. U keltirgan talofatlarni hech bir narsa bilan oqlab bo'lmaydi. Nafaqat Koreya uchun balki butun dunyo uchun umummasalaga aylangan urush, erksizlik, kambag'allik, umidsizlik, axloq, vijdon muammolari Li Bom Sonning ushbu asarida yaqqol aks ettirilgan. Asar bosh qahramoni bo'lmish Chol-ho juda ham kuchli umidsizlikga tushib qolgan edi. Hayotining kundan-kunga og'irlashib borayotgani, yelkasidagi mas'uliyatni to'laqonli ado etolmayotgani bunga sabab bo'lgan edi. Onasining "ketaylik" so'ziga esa javob berishga ham kuch topa olmayotgandi. Chol-honing ukasi Yong-ho esa vijdoniga bo'ysunmay, qashshoqlikdan qutulish maqsadida o'g'rilik qildi. Afsuski, u buning badalini qamoqqa tushish orqali to'ladi. Dunyo yuzini ko'rishga ham ulgurmagan Chol-honing norasida bolasi ham qashshoqlikdan nobud bo'ldi. Onasiz qolgan Chol-honing qizalog'i esa bu tubsiz jarlikda nimalar bo'layotganini anglamay u sari qadam qo'yadi. Bularning barchasi 38-parallel olib kelgan talofatlarning birgina ko'rinishi edi xolos. Bu bir millatning ikkiga bo'linishi birgina Chol-honing oilasining qismatini qanchalar o'zgartirib yuborganiga amin bo'ldik. Butun dunyo uchun birdek taaluqli bo'lgan bunday umummasalalar qurshovidan chiqa olmagan oila uchun qanchadan-qancha talofatlar olib keldi.

Shu o'rinda shuni ham ta'kidlash joizki, asarning nomlanishi ham bejizga "Daydi o'q" deb nomlanmagan. Aslida ular ikkiga ayro bo'lingan millatning adashgan daydi o'qlaridir. Qay manzilga, qay makonga qo'nim topishni bilmasdan tentirab yurgan o'qdir ular. Bir xil urf-odat, an'analarga, tilga ega bo'lishsada endi ularning yo'li, dunyoqarashi, hayot tarzi, makoni, qismati butkul boshqa olam bo'lib qoldi. Endi ular bir- birlariga begonadirlar. Na ularni til va na makon birlashtira oladi. Yer zaminida bunday ikkiga bo'linib ketgan davlatlar ko'p.

Xulosa o'rnida shu aytish lozimki, ular oldin bir xil urug' va urf-odatlarga ega bo'lgan odamlar guruhi edi. Afsuski, endi ular boshqa- boshqa yurt vakillari bo'lib qolishdi. Koreya urushi paytida janubga ko'chib kelgan shimolliklar aholining qolgan qismiga qaraganda ko'proq azob chekishdi. Li Bom Sonning "Daydi o'q" asarining qahramonlari ham anashu azob chekayotgan aholi vakillari edi. Bu odamlar o'qimishli bo'lishsada, ammo kambag'al va bir-biriga begona odamlardir. Bo'lingan Koreys xalqining bu yer yuzida shunchaki adashgan o'qlar ekanligi haqiqatdir. Biroq, qashshoqlik, begonalashtirish va umidsizlik har qanday egasiz odamlarning umumbashariy ahvolidir.