Тиббиёт институтлари талабалари учун ўҚув адабиёти

Асоратлари: интерстициал ёки сегментар пневмония, плеврит, миокардит, артрит, энцефалит, Гийена- Барре синдроми, ўткир фазадан кейин бир неча ҳафта давомида астенизация ва вегетатив томир бузилишлар сақланиб қолади.
Туғма цитомегаловирусли инфекция. Ҳомиланинг зарарланиши характери бошқа касалликлардаги сингари инфицирланиш муддатига боғлиқ. Ҳомиладорликнинг эрта даврида ҳомиланинг инфицирланиши унинг ўлими ёки спонтан абортларига олиб келади. Агар инфицирланиш ҳомиладорликнинг 1-3 ойлигида юз берса, цитомегаловирус теротеген таъсир этиши мумкин. Ҳомиладорликнинг кечки муддатларида инфекция юққанда, бола ривожланиши нуқсонларсиз, лекин тугма цитомегалия билан дунёга келади. Албатта, касаллик симптомлари бола ҳаётининг биринчи кунларидаёк ривожланса, буни тугма цитомегалия дейишга асос бўлади. Кўп ҳолларда чақалоқлар туғруқ вақтида зарарланади; 40-60% ҳолларда эса касаллик серопозитив оналарнинг сути орқали юқади. Шунингдек, касаллик янги туғилган чақалоқларда қон қуйилганда ҳам ривожланиб, бунда симптомлар аста-секин пайдо бўлади. Болаларда анемия, лимфоцитоз, жигар катталашиши, тана оғирлигининг етарли даражада ошмаслиги, интерстициал пневмонияларга мойиллик аниқланади. Туғма цитомегалия учун характерли белгилар: ҳаётининг биринчи кунларидан бошлаб тери қопламаларининг сарғайиши, гемморагик тошмалар тошиши, тромбогемморагик синдром, тромбоцитлар миқдорининг камайиши, прогрессияланувчи анемия, ретикулоцитлар миқдорининг ошиши, шиллиқ пардаларга қон қуйилиши, киндикдан қон кетиш, камдан-кам ҳолларда бош мияга ва бошқа органларга қон қуйилиши, тромбоцитлар микдори маълум даражада (50х10⁹/л гача) камаяди. Жигар ва талоқнинг катталашиши 1 йилгача, геморрагик синдром ва тромбоцитопения 2-3 ҳафтагача сақланади. 1-2 ҳафта давомида сариқлик даражаси(интенсивлиги) ошиб, сўнгра аста-секин, баъзан тўлқинсимон 2-6 ой мобайнида пасаяди. Бундан ташқари, қон зардобида ферментлар (аминотрансфераза, ишқорий фосфатаза) активлиги ошиб, жигар биоптатида характерли цитомегалик ҳужайралар топилади. Туғма цитомегалияда кўпинча энцефалит ривожланади (катта ёшли болалардаги цитомегаловирусли инфекцияда энцефалит деярли учрамайди). Энцефалит ўчоқлари катта(бош мия) ярим шарларининг периваскуляр зоналарида жойлашиб, бу ерда кейинчалик некротик ўзгаришлар ва кальцинатлар пайдо бўлади. Она қорни ичидаги энцефалитлар микроцефалия, гидроцефалия ва бошкалар билан асоратланади. Марказий нерв тизимидаги ўзгаришлар кўз патологиялари (хореоретинитлар, катаракта, кўрув нервининг атрофияланиши) билан қўшилиб келади. Туғма цитомегалияда асосан пневмония, буйракларнинг зарарланиши, камдан-кам ҳолларда юрак қон- томир системасида ўзгаришлар кузатилади. Туғма цитомегаловирусли инфекция доимо тарқалган характерга эга бўлса ҳам, лекин унда сўлак безлари зарарланади. Орттирилган цитомегалия сўлак безларининг изоляцияланган зарарланиши билан кечувчи маҳаллий характерда кечади.
Цитомегаловирусли инфекция ВИЧ- инфицирланган одамларда ОИТС касаллигининг ривожланиши учун асосий патогенетик омил ҳисобланади. Айни пайтда орттирилган иммунодефицит цитомегалиянинг генерализациясини таъминлайди. Бу турдаги беморларда узоқ муддатли иситма, дармонсизлик, анорексия, қечкурунги терлаш, миалгия, артралгия кузатилиб, периферик қонда тромбоцитопения, лейкопения, атипик мононуклеарлар, бошка элементлар топилиб, жигар функцияси бузилади. Нафас органларининг доимий зарарланиши натижасида ҳансираш, гипоксия, қурук йўтал келиб чиқади. Рентгенологик жиҳатдан ўпканинг асосан пастки бўлакларида ва икки томонлама жойлашувчи интерстициал ва инфильтратив ўгаришлар аниқланади. Шу тарздаги ўзгаришлар бошқа вируслар, пневмоцисталар, ҳамда замбуруғлар (аспергиллез ва б.) таъсирида ҳам ривожланади. Цитомегаловирусларнинг асосий этиологик омили фақатгина ўпка биоптатларини текширганда кўрилади.
Иммунитети паст одамларда цитомегаловирус ошқозон – ичак трактини жароҳатлаб, қизилўнгач, ошқозон, йўғон ва ингичка ичак яраларини келтириб чикаради. Бунда яралардан қон кетиб, перитонит баъзан эса цитомегаловирусли гепатит ривожланади. ОИТС билан касалланган беморларда сурункали энцефалит, ўткир ости энцефалопатия, апатия ошиб бориб, бир неча ҳафта ёки ойдан сўнг деменция юзага келади. ОИТС касаллиги бор, шунингдек, органлар трансплантацияси операциясини бошидан кечирган беморларда цитомегалия вируси ретинит, кўз тўр пардасида некроз ўчоқлари ва кўрлик келиб чиқади. Кўздаги бу ўзгаришлар токсаплазмоз, кандидоз, герпетик инфекцияларда ҳам кузатилади. Цитомегаловирусли инфекция органлар трансплантацияси (буйрак, жигар, юрак)ни оғирлаштириб, иситма, лейкопения, гепатит, пневмония, колит, ретинит операциядан кейин 1-4 ой мобайнида кузатилади. Бу асоротлар асосан бирламчи инфицирланишда латент цитомеголовирусли инфекциянинг активизациясида оғирок кечади. Клиник белгиларнинг оғирликда кечиши иммунодепресиянинг даражаси ва қайси турдаги иммунодепрессантларнинг ишлатилишига боғлик. Суяк кўмиги трансплантацияси қилинган беморларда 20%ида цитомегаловирусли пневмония ривожланиб, унда ўлим кўрсаткичи 88% ни ташкил этиб, бунда касалликнинг максимал ривожланиш хавфи трансплантациядан кейин 5-13 ҳафталарида кузатилади. Айниқса, қари ёшдаги одамларда трансплантация органининг дисфункцияси билан тугалланади.